ലണ്ടൻ: ഓസീസ് സ്പിൻ ഇതിഹാസം ഷെയ്ൻ വോണിന്റെ നൂറ്റാണ്ടിന്റെ പന്തിനേക്കാൾ മനോഹരമായിരുന്നു സച്ചിൻ തെണ്ടുൽക്കറെ പുറത്താക്കിയ തന്റെ ഡെലിവെറിയെന്ന് ഇംഗ്ലണ്ടിന്റെ മുൻ സ്പിന്നർ മോണ്ടി പനേസർ. 2012-13ൽ നടന്ന ഇംഗ്ലണ്ടിന്റെ ഇന്ത്യൻ പര്യടനത്തിലായിരുന്നു പനേസർ സച്ചിന്റെ വിക്കറ്റ് നേടിയത്. 1993 ആഷസിൽ ഷെയ്ൻ വോണ് മൈക്ക് ഗാറ്റിങ്ങിനെതിരേ എറിഞ്ഞ നൂറ്റാണ്ടിന്റെ പന്തിനേക്കാൾ മനോഹരമാണ് സച്ചിന്റെ വിക്കറ്റെടുത്ത ഈ പന്തെന്നാണ് പനേസറുടെ അവകാശവാദം

To advertise here,

മുംബൈ വാംഖഡെ സ്റ്റേഡിയത്തിൽ നടന്ന രണ്ടാം ടെസ്റ്റിൽ പനേസർ അഞ്ചു വിക്കറ്റ് വീഴ്ത്തിയിരുന്നു. അതിൽ ഒന്ന് സച്ചിന്റെ വിക്കറ്റായിരുന്നു. പനേസറുടെ പന്തിൽ സച്ചിൻ ബൗൾഡാകുകയായിരുന്നു. 'നിങ്ങൾ ആ പന്തൊന്ന് പരിശോധിക്കൂ. സച്ചിന്റെ ബാലൻസ് കൃത്യമായിരുന്നു. എന്നാൽ അദ്ദേഹത്തിന് പന്തിന്റെ ഗതിയെ കുറിച്ച് ഒരു അറിവും ഇല്ലായിരുന്നു. അദ്ദേഹം കരുതിയത് സാധാരണ പന്തുപോലെ ഈ പന്തും കുത്തിത്തിരിഞ്ഞ് ലെഗ് സ്റ്റമ്പിലേക്ക് വരുമെന്നാണ്. എന്നാൽ അങ്ങനെ സംഭവിച്ചില്ല. അവിടെയാണ് ആ പന്ത് മഹത്തരമാകുന്നത്. വോൺ ഗാറ്റിങ്ങിനെതിരേ എറിഞ്ഞ പന്തിനേക്കാൾ മനോഹരമായിരുന്നു അത്. കൃത്യമായ പരിശീലനം നടത്തിയാണ് സച്ചിനെതിരേ ആ പന്ത് ഞാൻ എറിഞ്ഞത്. ആ ടെസ്റ്റിൽ ഞാൻ അത്രത്തോളം ആത്മവിശ്വാസത്തിലായിരുന്നു.' പനേസർ വ്യക്തമാക്കുന്നു.

മുപ്പത്തിയെട്ടുകാരനായ പനേസർ ഇംഗ്ലണ്ടിനായി 50 ടെസ്റ്റും 26 ഏകദിനവും ഒരു ട്വന്റി-20യും കളിച്ചിട്ടുണ്ട്. ടെസ്റ്റിൽ 167 വിക്കറ്റും ഏകദിനത്തിൽ 24 വിക്കറ്റും ട്വന്റി-20യിൽ രണ്ടു വിക്കറ്റും വീഴ്ത്തി.

Content Highlights: Monty Panesar feels his delivery to Sachin  was better than Warnes ball of the century