ന്യൂഡല്ഹി: എഡ്ജ്ബാസ്റ്റണില് ചരിത്ര ജയം സ്വന്തമാക്കിയ ഇന്ത്യന് ടീമിനെ അഭിനന്ദിച്ച് ഐസിസി ചെയര്മാന് ജയ് ഷാ എക്സില് പങ്കുവെച്ച കുറിപ്പിനെച്ചൊല്ലി വിവാദം. ക്യാപ്റ്റന് ശുഭ്മാന് ഗില്, ആകാശ് ദീപ്, രവീന്ദ്ര ജഡേജ, ഋഷഭ് പന്ത് എന്നിവരെ പേരെടുത്ത് പറഞ്ഞ് പോസ്റ്റില് അഭിനന്ദിച്ച ജയ് ഷാ, പേസര് മുഹമ്മദ് സിറാജിന്റെ പേര് വിട്ടുകളഞ്ഞതിനെ ചോദ്യം ചെയ്ത് നിരവധി പേരാണ് രംഗത്തെത്തുന്നത്.
ടെസ്റ്റിന്റെ ഒന്നാം ഇന്നിങ്സില് ഇന്ത്യയ്ക്കായി ആറു വിക്കറ്റുകള് വീഴ്ത്തിയ താരമാണ് സിറാജ്. രണ്ടാം ഇന്നിങ്സില് സാക് ക്രോളിയുടെ വിക്കറ്റും രണ്ട് ക്യാച്ചുകളും സിറാജ് സ്വന്തമാക്കിയിരുന്നു. ഇതില് ജോഷ് ടങ്ങിനെ പുറത്താക്കാന് സിറാജ് എടുത്ത ക്യാച്ച് ശ്രദ്ധേയമായിരുന്നു. മാത്രമല്ല ജസ്പ്രീത് ബുംറയുടെ അഭാവത്തില് ഇന്ത്യന് ബൗളിങ് നിരയെ നയിച്ചതും സിറാജ് തന്നെ. രണ്ട് ഇന്നിങ്സിലുമായി 10 വിക്കറ്റെടുത്ത ആകാശ് ദീപിന് കൃത്യമായി നിര്ദേശങ്ങള് നല്കുന്ന സിറാജിന്റെ ദൃശ്യങ്ങള് വൈറലായിരുന്നു.
ഈ സാഹചര്യത്തിലാണ് വിജയത്തില് പങ്കുവഹിച്ച താരങ്ങളെയെല്ലാം പ്രത്യേകമായി അഭിനന്ദിച്ച ജയ് ഷാ, സിറാജിനെ ഒഴിവാക്കിയത്. മുന് ബിസിസിഐ സെക്രട്ടറി കൂടിയായിരുന്ന ജയ് ഷാ. അടുത്തിടെയാണ് ഐസിസിയുടെ തലപ്പത്തെത്തിയത്.
ജയ് ഷായുടെ എക്സ് പോസ്റ്റിനു താഴെ നിരവധിയാളുകളാണ് സിറാജിന്റെ പേര് എന്തുകൊണ്ട് ഒഴിവാക്കിയെന്ന് ചോദിച്ച് എത്തിയിരിക്കുന്നത്.
Content Highlights: ICC Chairman Jay Shah`s congratulatory post omits Mohammed Siraj, sparking debate
Published: 07 Jul 2025, 06:48 pm IST
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented