വെല്ലിങ്ടൺ: ഇന്ത്യക്കെതിരായ ഒന്നാം ടെസ്റ്റിൽ ന്യൂസീലൻഡിന് മികച്ച സ്‌കോർ. ഹെന്റി നിക്കോൾസിന്റേയും ഗ്ലെൻ ഫിലിപ്‌സിന്റേയും സെഞ്ചുറി മികവിൽ 368 റൺസാണ് ആതിഥേയർ അടിച്ചെടുത്തത്. 335 പന്തിൽ 21 ഫോറിന്റെ അകമ്പടിയോടെ 175 റൺസ് നേടിയ നിക്കോൾസ് പുറത്താകാതെ നിന്നു. 216 പന്തിൽ 14 ഫോറുൾപ്പെടെ 118 റൺസാണ് ഗ്ലെൻ ഫിലിപ്‌സ് അടിച്ചെടുത്തത്.

To advertise here,

രണ്ടാം ദിനം അഞ്ച് വിക്കറ്റ് നഷ്ടത്തിൽ 243 റൺസ് എന്ന നിലയിൽ ബാറ്റിങ് തുടങ്ങിയ കിവീസിനെ നിക്കോൾസും ഫിലിപ്‌സും മുന്നോട്ടുനയിച്ചു. ഇരുവരുടേയും കൂട്ടുകെട്ട് 216 റൺസിലെത്തിയപ്പോൾ ഫിലിപ്‌സിനെ പുറത്താക്കി ആകാശ് ദീപാണ് ഇന്ത്യക്ക് ആശ്വാസം പകർന്നത്. സെഞ്ചുറി പൂർത്തിയാക്കിയതിന് പിന്നാലെ ഫിലിപ്‌സിനെ ആകാശ് ദീപ് ബൗൾഡാക്കുകയായിരുന്നു. പിന്നീടങ്ങോട്ട് വലിയ കൂട്ടുകെട്ടുകൾ പടുത്തുയർത്താൻ കിവീസിനായില്ല. നഥാൻ സ്മിത്ത് 14 റൺസിനും കെയ്ൽ ജമെയ്‌സൺ 11 റൺസിനും പുറത്തായി. മാറ്റ് ഹെന്ററിയുടെ സംഭാവന ഒരു റണ്ണായിരുന്നു. നാല് റൺസെടുത്ത ജേക്കബ് ഡഫി കൂടി വീണതോടെ കിവീസ് ഇന്നിങ്‌സ് പൂർണമായി.

ആദ്യ ദിനം 70 റൺസെടുക്കുന്നതിനിടയിൽ അഞ്ച് വിക്കറ്റ് നഷ്ടമായ ന്യൂസീലൻഡിനെ നിക്കോൾസും ഫിലിപ്‌സും ചേർന്നാണ് കര കയറ്റിയത്. ന്യൂസീലൻഡിന്റെ ഓപ്പണർമാർ തീർത്തും നിരാശപ്പെടുത്തി. ടോം ലാഥം അക്കൗണ്ട് തുറക്കും മുമ്പും ഡെവോൺ കോൺവേ നാല് റൺസിനും പുറത്തായി. രചിൻ രവീന്ദ്ര 15 റൺസെടുത്തപ്പോൾ ഡാരിൽ മിച്ചൽ ഒരു റണ്ണിന് പുറത്തായി. ടോം ബ്ലണ്ടലിന്റെ സമ്പാദ്യം അഞ്ച് റൺസായിരുന്നു.

ഇന്ത്യക്കായി ജസ്പ്രീത് ബുംറ നാല് വിക്കറ്റ് വീഴ്ത്തി. ആകാശ് ദീപ് മൂന്നും അൻഷുൽ കാംബോജ് രണ്ടും വിക്കറ്റ് വീഴ്ത്തി. പ്രസിദ്ധ് കൃഷ്ണ ഒരു വിക്കറ്റും നേടി.