മുംബൈ: ഐപിഎൽ 2027 സീസണിന് മുന്നോടിയായി വൻ കളിക്കാരെ വെച്ചുമാറി മുംബൈ ഇന്ത്യൻസും പഞ്ചാബ് കിങ്‌സും. മുംബൈ ഇന്ത്യൻസ് നായകനായിരുന്ന ഹാർദിക് പാണ്ഡ്യ ഇനി പഞ്ചാബ് കിങ്‌സിനായി കളത്തിലിറങ്ങും. പകരം ഇന്ത്യയുടെ മുൻനിര ഇടങ്കയ്യൻ ഫാസ്റ്റ് ബൗളറായ അർഷ്ദീപ് സിങ് മുംബൈ ഇന്ത്യൻസിലേക്ക് ചേക്കേറി. ഇക്കാര്യം ഐപിഎൽ തന്നെ ഔദ്യോഗികമായി പ്രഖ്യാപിച്ചു. ഐപിഎൽ ചരിത്രത്തിലെ ഏറ്റവും വലിയ ട്രേഡ് ഡീലാണിത്.

To advertise here,

18 കോടി രൂപയ്ക്കാണ് ഹാർദിക് പാണ്ഡ്യയെ പഞ്ചാബ് കിങ്‌സ് സ്വന്തമാക്കിയത്. അർഷ്ദീപ് സിങ് അതേ തുകയായ 18 കോടി രൂപയ്ക്ക് മുംബൈ ഇന്ത്യൻസിന്റെ ഭാഗമാകും. കഴിഞ്ഞ വർഷം മലയാളി താരം സഞ്ജു സാംസൺ ചെന്നൈ സൂപ്പർ കിങ്‌സിലെത്തിയതും 18 കോടി രൂപയ്ക്കാണ്. ശ്രേയസ് അയ്യർ നയിക്കുന്ന പഞ്ചാബ് കിങ്‌സ് നിരയിൽ പ്രധാന ഓൾറൗണ്ടറായിരിക്കും ഹാർദിക് പാണ്ഡ്യ കളിക്കുക. മുൻ സീസണിൽ പഞ്ചാബ് കിങ്‌സ് അർഷ്ദീപിനെ 18 കോടി രൂപയ്ക്കാണ് നിലനിർത്തിയതെങ്കിൽ, മുംബൈ ഇന്ത്യൻസ് ഹാർദിക്കിനെ 16.35 കോടി രൂപയ്ക്കാണ് നിലനിർത്തിയിരുന്നത്.

പഞ്ചാബ് കിങ്‌സിനായി 96 മത്സരങ്ങളിൽ നിന്ന് 111 വിക്കറ്റുകൾ വീഴ്ത്തിയ അർഷ്ദീപ് സിങ് മുംബൈയുടെ പേസ് ആക്രമണത്തിന് പുതിയ കരുത്ത് പകരും. 2015-ൽ മുംബൈയിലൂടെ ഐപിഎൽ കരിയർ ആരംഭിച്ച ഹാർദിക്, ഗുജറാത്ത് ടൈറ്റൻസിനെ കിരീടത്തിലേക്ക് നയിച്ചശേഷം കഴിഞ്ഞ സീസണുകളിലാണ് മുംബൈ ക്യാപ്റ്റനായി തിരിച്ചെത്തിയത്.

മുംബൈ ഇന്ത്യൻസിലെ ഹാർദിക് പാണ്ഡ്യയുടെ രണ്ടാമത്തെ ഘട്ടത്തിന് മൂന്ന് സീസണുകൾക്കുശേഷം ഇതോടെ അവസാനമാകുകയാണ്. ഗുജറാത്ത് ടൈറ്റൻസിൽ നിന്ന് തിരികെയെത്തിയ ഹാർദിക്കിന് ആരാധകരുടെ പിന്തുണ നേടിയെടുക്കാൻ കഴിഞ്ഞിരുന്നില്ല. രോഹിത് ശർമയെ നായകസ്ഥാനത്ത് നിന്ന് മാറ്റിയതിനെതിരെ ഉയർന്ന പ്രതിഷേധങ്ങൾക്കിടയിൽ, ഹാർദിക്കിന് കീഴിൽ കളിച്ച മൂന്ന് സീസണുകളിൽ രണ്ടിലും മുംബൈ പോയിന്റ് പട്ടികയിൽ അവസാന രണ്ട് സ്ഥാനങ്ങളിലാണ് ഫിനിഷ് ചെയ്തത്. ട്രേഡ് വിൻഡോയിൽ ചെന്നൈ സൂപ്പർ കിങ്‌സ്, കൊൽക്കത്ത നൈറ്റ് റൈഡേഴ്‌സ്, ഗുജറാത്ത് ടൈറ്റൻസ് എന്നീ ടീമുകളുമായി ഹാർദിക്കിന്റെ പേര് ബന്ധപ്പെട്ടിരുന്നു. ഗുജറാത്തിലേക്ക് നായകനായി മടങ്ങാൻ ഹാർദിക് ആഗ്രഹിച്ചിരുന്നെങ്കിലും, ശുഭ്മൻ ഗില്ലിന്റെ കീഴിൽ കളിക്കാരനായി മാത്രം സ്വീകരിക്കാമെന്നാണ് ഗുജറാത്ത് അറിയിച്ചത്.

ഐപിഎല്ലിൽ അഞ്ച് കിരീടങ്ങളിൽ പങ്കാളിയായ ഹാർദിക് 3,000-ത്തോളം റൺസും 82 വിക്കറ്റും നേടിയിട്ടുണ്ട്. മികച്ച ഓൾറൗണ്ടറാണെങ്കിലും സമീപകാലത്ത് കളിയിലെയും പുറത്തെയും പെരുമാറ്റത്തിന്റെ പേരിൽ കടുത്ത വിമർശനങ്ങൾ നേരിട്ടിരുന്നു. മറുഭാഗത്ത്, ഇന്ത്യയുടെ ഏറ്റവും മികച്ച ടി 20 ബൗളർമാരിലൊരാളായ അർഷ്ദീപ് സിങ് 96 മത്സരങ്ങളിൽ നിന്ന് 111 വിക്കറ്റുകൾ നേടിയിട്ടുണ്ട്. ന്യൂബോളിലെ സ്വിങ്ങും ഡെത്ത് ഓവറുകളിലെ യോർക്കറുകളും അർഷ്ദീപിന്റെ കരുത്താണ്. അർഷ്ദീപിന്റെ വരവോടെ ജസ്പ്രീത് ബുംറയ്‌ക്കൊപ്പം മുംബൈയുടെ പേസ് നിര കൂടുതൽ കരുത്തുറ്റതാകും.