മുംബൈ/ന്യൂഡൽഹി: ഇന്ത്യൻ പ്രീമിയർ ലീഗ് (ഐപിഎൽ) മെഗാ താരലേലത്തിന് മുന്നോടിയായി ചില മുൻനിര താരങ്ങൾ തങ്ങളുടെ ടീമുകളിൽ തുടരുന്നതിനായി പ്രതിഫലമായി (റീട്ടെൻഷൻ തുക) 40 കോടി രൂപവരെ ആവശ്യപ്പെട്ടതായി റിപ്പോർട്ട്.

To advertise here,

ക്രിക്ബസ് പുറത്തുവിട്ട റിപ്പോർട്ട് അനുസരിച്ച്, ഈ തുക ലഭിച്ചാൽ മാത്രമേ നിലവിലെ ടീമുകളിൽ തുടരുകയുള്ളൂവെന്നാണ് ഏതാനും താരങ്ങൾ ഫ്രാഞ്ചൈസികളെ അറിയിച്ചിട്ടുള്ളത്. ലേലത്തിൽ ഉയർന്ന തുക നേടാൻ കഴിയുമെന്ന് പ്രതീക്ഷിക്കുന്ന കൂടുതൽ കളിക്കാർ ഈ നിലപാട് സ്വീകരിച്ചേക്കുമെന്നും റിപ്പോർട്ടിൽ പറയുന്നു.

ഐപിഎൽ ചരിത്രത്തിൽ ഇതുവരെ കേട്ടുകേൾവിയില്ലാത്ത തുകയാണ് 40 കോടി രൂപ. നിലവിൽ ഐപിഎൽ ലേലത്തിൽ ഒരു താരത്തിന് ലഭിച്ച ഏറ്റവും ഉയർന്ന തുക 27 കോടി രൂപയാണ്. ഈ തുകയ്ക്ക് 2025-ലെ ലേലത്തിൽ ലഖ്‌നൗ സൂപ്പർ ജയന്റ്‌സ് ഋഷഭ് പന്തിനെ സ്വന്തമാക്കിയതാണ് നിലവിലെ റെക്കോഡ്.

നിലവിൽ ഒരു ഫ്രാഞ്ചൈസിക്ക് ലേലത്തിൽ ചിലവഴിക്കാൻ സാധിക്കുന്ന തുക 120 കോടിയാണ്. എന്നാൽ വരാനിരിക്കുന്ന മെഗാ ലേലത്തിൽ ഇത് 150 കോടി രൂപയായി ഉയർന്നേക്കുമെന്നാണ് റിപ്പോർട്ടുകൾ.

ഐപിഎൽ 2027 മിനി ലേലത്തിന് മുന്നോടിയായുള്ള റീട്ടെൻഷൻ, റിലീസ് പട്ടികകൾ സമർപ്പിക്കേണ്ട അവസാന തീയതി നവംബർ 17 വരെ നീട്ടിയിട്ടുണ്ട്. മുമ്പ് ഇത് ഇന്ത്യ-ന്യൂസീലൻഡ് അഞ്ചാം ഏകദിനം നടക്കുന്ന നവംബർ 15 ആയിരുന്നു.

ഡിസംബർ 16-ന് ഗോവയിലാണ് മിനി ലേലം നടക്കുക. നിലവിലെ സൈക്കിളിലെ അവസാന മിനി ലേലമായിരിക്കും ഇത്. 2028 എഡിഷനായുള്ള അടുത്ത മെഗാ ലേലം 2027 ഡിസംബറിൽ നടക്കാനാണ് സാധ്യത.