നഗോയ: ഏഷ്യൻ ഗെയിംസ് ജാവലിൻ ത്രോയിൽ ഇരട്ട മെഡലുമായി ഇന്ത്യ. പരിക്കിനെ തുടർന്ന് നീരജ് ചോപ്ര വിട്ടുനിന്ന മത്സരത്തിൽ വെള്ളിയും വെങ്കലവുമാണ് ഇന്ത്യ സ്വന്തമാക്കിയത്. യഷ്‌വീർ സിങ് വെള്ളിയും രോഹിത് യാദവ് വെങ്കലവും നേടി. ശ്രീലങ്കയുടെ ലോകചാമ്പ്യൻ രുമേഷ് പതിരങ്കയ്ക്കാണ് സ്വർണം.

To advertise here,

88.55 മീറ്റർ ദൂരം ജാവലിൻ പായിച്ചാണ് രുമേഷ് ഒന്നാമതെത്തിയത്. യഷ്‌വീർ 85.72 മീറ്ററും രോഹിത് 84.35 മീറ്ററും പിന്നിട്ടു. ഒരു ഘട്ടത്തിൽ യഷ്‌വീറും രോഹിതും വെള്ളിക്കായി മത്സരവും നടന്നു. മൂന്നാം ശ്രമത്തിൽ രോഹിത് 84.35 മീറ്റർ പിന്നിട്ടതോടെയായിരുന്നു അത്. എന്നാൽ അഞ്ചാം ശ്രമത്തിൽ 85 മീറ്റർ പിന്നിട്ട് യഷ്‌വീർ വെള്ളിയിലേക്ക് തന്നെ തിരിച്ചെത്തി. കരിയറിലെ ഏറ്റവും മികച്ച പ്രകടനത്തോടെയാണ് യഷ്‌വീർ വെള്ളി നേടിയത്.

അതേസമയം പാകിസ്താന്റെ ഒളിമ്പിക്‌സ് മെഡലിസ്റ്റ് നദീം അർഷാദ് നാലാം സ്ഥാനം കൊണ്ട് തൃപ്തിപ്പെടേണ്ടി വന്നു. താരത്തിന്റെ നാല് ശ്രമങ്ങളും ഫൗൾ ആയി. മൂന്നാം ശ്രമത്തിൽ കണ്ടെത്തിയ 80.29 മീറ്ററാണ് നാലാം സ്ഥാനത്തെത്തിച്ചത്.