'പോസ്റ്റ്മോർട്ടത്തെ എതിർത്തു, കള്ളം പറഞ്ഞു'; അവർ പറയുന്നു അവൻ തന്നെ കുറ്റവാളി | ഭാഗം 01

'ഉറങ്ങാനാവുന്നില്ല എനിക്ക്, കണ്ണടച്ചാൽ മുന്നിൽ എന്റെ മോളാ... ഒരു കല്യാണത്തിനോ വിശേഷത്തിനോ പോയാൽ കുഞ്ഞുങ്ങളുടെ മുഖത്തേക്ക് നോക്കാറില്ല ഞാൻ. എന്റെ കുഞ്ഞുണ്ടായിരുന്നെങ്കിൽ ആ കൂട്ടത്തിലിരുന്ന് കളിക്കേണ്ടതല്ലേ എന്ന് ഓർക്കുമ്പോൾ നെഞ്ച് പൊട്ടും.. അവളുടെ വള.. മാല.. കളിപ്പാട്ടങ്ങൾ... എല്ലാം സൂക്ഷിച്ചുവെച്ചിട്ടുണ്ട്... അത് മാത്രമല്ലേ ഞങ്ങൾക്കിനി ബാക്കിയുള്ളൂ...' 

വണ്ടിപ്പെരിയാറിലെ അമ്മയ്ക്ക് മുന്നിൽ മുഖം താഴ്ത്തി ഞാനിരുന്നു. പകരം പറയാനൊരു വാക്ക് പോലും പുറത്തുവന്നില്ല. ക്രൂരപീഡനമേറ്റ് കൊല ചെയ്യപ്പെട്ടത് പെറ്റുപോറ്റിയ മകളാണ്... ആ വേദനയ്ക്ക്‌ പകരം വെയ്ക്കാൻ ഏത് വാക്കുണ്ട്? പ്രതിയായിരുന്ന 'അർജുൻ സുന്ദറിനെ' കോടതി വെറുതെ വിട്ടതിന്റെ ഞെട്ടലിൽനിന്ന് ഇനിയും മോചിതരായിട്ടില്ല അവർ. കേസന്വേഷണത്തിലെ പാളിച്ചകൾ കോടതി പോലീസിനെതിരേ അക്കമിട്ട് നിരത്തുമ്പോൾ, പ്രോസിക്യൂഷന്റെ വാദങ്ങൾ ശക്തമല്ലെന്ന് നിയമവിദഗ്ധർ ചൂണ്ടിക്കാട്ടുമ്പോൾ എസ്റ്റേറ്റ് ലയത്തിലെ ചെറിയ മുറിയിൽ ഇപ്പോഴും കണ്ണീരുണങ്ങാതെ ഇരിപ്പുണ്ടവർ. മകനുണ്ടായി 12 കൊല്ലങ്ങൾക്കിപ്പുറം മാത്രം തങ്ങളെത്തേടിയെത്തി, പാതിവഴി പോലും താണ്ടാതെ പോയ പൊന്നോമനെയെ ഓർത്ത് ഒന്നുറക്കെ കരയാൻ പോലുമാകാതെ. കൊല്ലപ്പെട്ടതിന്റെ തലേന്ന് രാത്രിയും പാട്ടു പാടിയുറക്കിയ ആ പൂമ്പാറ്റക്കുഞ്ഞിനെക്കുറിച്ച് പറയുമ്പോൾ വിതുമ്പലായിരുന്നില്ല, മരവിപ്പായിരുന്നു അവരുടെ മുഖത്തത്രയും. മാധ്യമങ്ങൾക്കും കോടതിക്കും കാണാനെത്തുന്നവർക്കും മുന്നിൽ എത്ര ആവർത്തിയവർ ആ കഥ പറഞ്ഞിരിക്കണം? 

കളിക്കുന്നതിനിടെ അബദ്ധത്തിൽ കഴുത്തിൽ ഷാൾ കുരുങ്ങി മരണപ്പെട്ടുവെന്ന് കരുതിയ കുഞ്ഞ് കൊടുംക്രൂരയ്ക്കിരയായി കൊല്ലപ്പെട്ടതാണെന്നറിഞ്ഞ നിമിഷം തകർന്നു പോയതാണവർ. മകനെപ്പോലെ കണ്ടവൻ പ്രതിയായി മുന്നിലേക്കെത്തിയതും മറക്കില്ലവർ. ആ ക്രൂരകൃത്യത്തിന് അർഹിക്കുന്ന ശിക്ഷ ലഭിക്കുമെന്ന ആത്മവിശ്വാസം മാത്രമായിരുന്നു ജീവിക്കാനുള്ള ഏക പ്രതീക്ഷ. പക്ഷേ, ഡിസംബർ 14-ന് കട്ടപ്പന കോടതി വരാന്തയിൽ പ്രതിയെ വെറുതെ വിടുകയാണെന്ന വിധി കേട്ട് അലറിക്കരയാനേ അവർക്കായുള്ളൂ. പ്രതി കുറ്റം ചെയ്തതായി തെളിയിക്കാൻ പോലീസിനോ പ്രോസിക്യൂഷനോ കഴിഞ്ഞില്ലെന്നായിരുന്നു കോടതിയുടെ വിധി പ്രസ്താവം. വിധിക്കെതിരേ അപ്പീൽ നൽകി കാത്തിരിക്കുന്നതിനിടെയാണ് അർജുന്റെ ബന്ധുവിന്റെ കുത്തേറ്റ് കുഞ്ഞിന്റെ അച്ഛൻ ആശുപത്രിയിലായിരിക്കുന്നത്. 

അസ്വാഭാവിക മരണം കൊലപാതകമായപ്പോൾ

2021 ജൂൺ 30-നാണ് എസ്റ്റേറ്റ് ലയത്തിൽ ആറ് വയസുകാരിയെ കഴുത്തിൽ ഷാൾ കുരുങ്ങി മരിച്ചനിലയിൽ കണ്ടെത്തിയത്. കളിക്കുന്നതിനിടെ അബദ്ധത്തിൽ ഷാൾ കുരുങ്ങി മരണം സംഭവിച്ചതാകാമെന്നായിരുന്നു പ്രാഥമിക നിഗമനം. എന്നാൽ, പോസ്റ്റ്‌മോർട്ടം റിപ്പോർട്ടിൽ പീഡനം നടന്നതായി തെളിഞ്ഞതോടെയാണ് കേസിന്റെ ഗതി മാറിയത്. സംശയമുള്ളവരെ ചോദ്യം ചെയ്തതോടെയാണ് മൊഴിയിലെ വൈരുദ്ധ്യം കണക്കിലെടുത്ത് തൊട്ടടുത്ത ലയത്തിൽ താമസിക്കുന്ന അർജുൻ സുന്ദറിലേക്ക് പോലീസിന്റെ ശ്രദ്ധ തിരിയുന്നത്. സംഭവദിവസം കുട്ടിയുടെ സഹോദരൻ അടക്കമുള്ളവർക്കൊപ്പമുണ്ടായിരുന്ന അർജുൻ, കുട്ടി മരണപ്പെട്ടതായി കരുതുന്ന സമയം അവർക്കൊപ്പം ഇല്ലാതിരുന്നതും സംശയത്തിന് ആക്കംകൂട്ടി. മിഠായി നൽകി കുട്ടിയെ നിരന്തരം  ഉപയോഗിച്ചിരുന്നതായും സംഭവദിവസം കുഞ്ഞിനെ ലൈംഗികമായി ഉപദ്രവിക്കുകയും ബോധരഹിതയായതോടെ ഷാൾ മുറുക്കി കൊലപ്പെടുത്തി അർജുൻ കെട്ടിത്തൂക്കിയായിരുന്നുവെന്നും ചോദ്യം ചെയ്യലിൽ അർജുൻ സമ്മതിച്ചതായും പോലീസ് റിപ്പോർട്ടിൽ പറയുന്നു. തുടർന്ന് വീടിന്റെ ജനലിലൂടെ രക്ഷപ്പെട്ട ഇയാൾ തൊട്ടപ്പുറത്തെ വീട്ടിൽപോയി വിശ്രമിച്ചെന്നും പിന്നീട് സംസ്‌കാരച്ചടങ്ങുകളിലടക്കം ഭാവവ്യത്യാസമില്ലാതെ പങ്കെടുത്തെന്നുമായിരുന്നു കുറ്റപത്രം. 

90 ദിവസം കഴിഞ്ഞാൽ പ്രതിക്ക് സ്വാഭാവികജാമ്യം ലഭിക്കാനുള്ള സാധ്യതപോലും നൽകാതെയാണ് കൊലപാതകം, ബലാത്സംഗം ഉൾപ്പെടെയുള്ള വകുപ്പുകൾ ചുമത്തി 78 ദിവസത്തിനകം അന്വേഷണസംഘം കുറ്റപത്രം സമർപ്പിച്ചത്. അന്ന് പോലീസ് കാണിച്ച ജാഗ്രതയെ സകലരും അഭിനന്ദിച്ചു. ദൃക്‌സാക്ഷികളില്ലാത്ത കേസിൽ സാഹചര്യത്തെളിവുകളും ശാസ്ത്രീയ തെളിവുകളുമായിരുന്നു പ്രോസിക്യൂഷൻ ഹാജരാക്കിയത്. സാഹചര്യത്തെളിവുകൾ എതിരാവുകയും ഒരു സാക്ഷി പോലും കൂറുമാറുകയും ചെയ്യാത്ത കേസിൽ പക്ഷേ, ശാസ്ത്രീയ തെളിവുകൾ തിരിച്ചടിയായി. ഡി.എൻ.എ. അടക്കമുള്ള പരിശോധനകളിൽ വ്യക്തതയില്ലാതായതോടെയാണ് കേസിൽ പ്രതിയെ കോടതി വെറുതെവിട്ടത്. പിഴച്ചത് അന്വേഷണം നടത്തിയ പൊലീസ് സംഘത്തിനാണോ കേസ് വാദിച്ച പബ്ലിക് പ്രോസിക്യൂട്ടർക്കാണോ വിധിപ്രസ്താവിച്ച കോടതിക്കാണോ എന്ന ചർച്ച മുൻപെങ്ങുമില്ലാത്ത വിധം ഉയർന്നുവന്നു. വിധി കേൾക്കാനെത്തിയ പെൺകുട്ടിയുടെ ബന്ധുക്കൾ അതിവൈകാരികമായാണ് അന്ന് പ്രതികരിച്ചത്. കേസിൽ അർജുനല്ലാതെ മറ്റൊരു പ്രതിയില്ലെന്ന് ആണയിടുന്നു ബന്ധുക്കൾ. 

'ഒന്നുകിൽ അവനെ കൊല്ലണം അല്ലെങ്കിൽ ആത്മഹത്യ ചെയ്യണം. ഇനിയെന്തിന് ജീവിക്കണം. ഈ രണ്ടരവർഷം കാത്തിരുന്നത് ഈ വിധിക്ക് വേണ്ടിയാ. എന്റെ കുഞ്ഞ് പോയി. ഇനി എത്രയോ കുഞ്ഞുങ്ങൾ വളർന്നു വരുന്നുണ്ട്. ഇവന്റെ വിധി മറ്റുള്ളവർക്കൊരു പാഠമാകണമെന്നോർത്താണ് അന്ന് ഞാൻ കോടതിയിലെത്തിയത്. കോടതിയെ വിശ്വസിച്ച് പോയി. പക്ഷേ, വിധി കേട്ടപ്പോൾ ചാവാനാണ് തോന്നിയത്. ഒരു അഞ്ച് വർഷമെങ്കിലും ശിക്ഷ നൽകിയിരുന്നെങ്കിൽ ഞങ്ങൾക്കൊരു സമാധാനമായേനെ. മോനെപ്പോലെ കരുതിയതാ അവനെ. എത്രതവണ ആഹാരം കൊടുത്തിട്ടുണ്ടെന്നറിയോ. എന്റെ മുന്നിൽ വന്നാൽ ഉറപ്പാണ്...ഞാനെന്തെങ്കിലും ചെയ്ത് പോകും'; അമ്മ പറഞ്ഞു

'കടയിൽനിന്ന് ചേച്ചി വരാൻ വൈകുമോ എന്നവൻ എന്നോട് ചോദിച്ചു'- വളർത്തമ്മയ്ക്ക് പറയാനുള്ളത്

അച്ഛനും അമ്മയും ജോലിക്ക് പോവുന്നതിനാൽ തൊട്ടുമുന്നിലെ ലയത്തിൽ താമസിക്കുന്ന അച്ഛന്റെ സഹോദരനും ഭാര്യയ്ക്കുമൊപ്പമായിരുന്നു കുഞ്ഞ് അധികസമയവും. കുഞ്ഞുങ്ങളില്ലാതിരുന്ന അവർക്കും അവളായിരുന്നു ആശ്വാസം. അന്ന് പക്ഷേ, മുൻപ് ജോലിചെയ്തിരുന്ന കടയിൽ പോകേണ്ട ആവശ്യമുണ്ടായിരുന്നതിനാൽ വളർത്തമ്മ കുഞ്ഞിനെ സഹോദരനൊപ്പം നിർത്തി. അന്നത്തെ ദിവസത്തെ അവർ ഓർത്തെടുക്കുന്നതിങ്ങനെ:

"കോവിഡ് കാലമായതിനാൽ ഓൺലൈൻ ക്ലാസായിരുന്നു അന്ന്. സമീപത്തുള്ള ട്യൂഷൻ ക്ലാസിൽ പോകാൻ കുഞ്ഞിനെ ഒരുക്കി നിർത്തിയാണ് ഞാൻ ജോലിക്കായി പോയത്. വഴിയിൽ അർജുനെ കണ്ടിരുന്നു. 'ചേച്ചി എവിടെ പോവാന്ന് അവനെന്നോട് ചോദിച്ചു. കടയിലേക്കാണെന്ന് പറഞ്ഞപ്പോൾ വൈകുന്നേരമാകുമോ വരാൻ എന്നും ചോദിച്ചു. അതെയെന്ന് പറഞ്ഞിട്ടാ ഞാൻ കടയിലേക്ക് പോയത്. പിന്നെ.." അവർക്ക് വാക്കുകൾ മുഴുമിക്കാനായില്ല. 

ട്യൂഷന് പോയ കുഞ്ഞിനെ പന്ത്രണ്ടരയോടെയാണ്‌ സഹോദരൻ കൂട്ടിക്കൊണ്ട് വരുന്നത്. ജോലിക്കിടെ ഉച്ചഭക്ഷണം കഴിക്കാൻ തൊഴിലാളികൾ ലയത്തിൽ തിരികെയെത്തുന്നതും ഈ സമയത്താണ്. 11 മണിക്ക് വന്നാൽ ഒരു മണിക്കാണ് മടങ്ങുക.

"ഭക്ഷണം കഴിച്ച് തിരികെപോവുമ്പോൾ ദാ.. ഈ പടിക്കെട്ടിൽ നിന്ന് പോയ് വാ അമ്മാന്ന് പറഞ്ഞ് ടാറ്റാ തരുന്നതാണ് എന്റെ കണ്ണിലെ അവസാന കാഴ്ച... അപ്പോഴും മോൾടെ അരികിൽ അവനുണ്ടായിരുന്നു. എന്നിട്ടാണ് പോലീസ് ചോദിച്ചപ്പോ അവൻ കുഞ്ഞിനെ അന്ന് കണ്ടില്ലെന്ന് പറഞ്ഞത്'. അർജുനെക്കുറിച്ചും മകളെക്കുറിച്ചും അന്ന് നടന്ന സംഭവങ്ങളെക്കുറിച്ചും കുട്ടിയുടെ അമ്മ പറഞ്ഞു തുടങ്ങി.

"അവനൊരിക്കലും അങ്ങനെയൊന്നും ചെയ്യാനാവില്ലെന്ന് ഉറച്ചു വിശ്വസിച്ചവരാണ് ഞങ്ങൾ. ഒരു കുടുംബം പോലെ കഴിഞ്ഞവർ. അവനെ കസ്റ്റഡിയിലെടുത്ത വിവരമറിഞ്ഞ് അച്ഛനും അമ്മയും പൊട്ടിക്കരയുന്നത് കണ്ടിട്ട് അവരെ ആശ്വസിപ്പിച്ചതാ ഞങ്ങൾ. പോലീസ് അടിച്ച് സമ്മതിപ്പിച്ചതാണെങ്കിൽ സ്‌റ്റേഷനിൽ പോയി അവനെ ഞങ്ങൾക്ക് സംശയമില്ലെന്ന് പറയാമെന്നും പറഞ്ഞതാ. പിറ്റേന്ന് തെളിവെടുപ്പിന് കൊണ്ടുവരുമ്പോഴും അവൻ ചെയ്തില്ലെന്ന് വിളിച്ചു പറയുമെന്ന് ഞങ്ങളെല്ലാവരും കരുതി. ഒന്നുമുണ്ടായില്ല. ഹീറോ പോലെ വന്ന് എല്ലാം വള്ളി പുള്ളി വിടാതെ പറഞ്ഞു. ജനലിൽ ഇറങ്ങുന്നത് വരെ കാണിച്ചു. അവൻ ചെയ്തിട്ടില്ലെങ്കിൽ ഇവനിതെങ്ങനെ പറഞ്ഞു? അവനെയിനി വേണ്ട, കൊന്നേക്ക് എന്നാണ് അവന്റെ അപ്പൻ അന്ന് പറഞ്ഞത്. എന്നിട്ട് അതേ മനുഷ്യൻ അവനെ ഇറക്കാൻ ചെലവാക്കിയത് ലക്ഷങ്ങളാ. കുടിക്കാൻ കഞ്ഞിപോലും വേണ്ടവിധമില്ലാത്ത വീട്ടുകാരാ അവര്. പിന്നെങ്ങനെ ലക്ഷങ്ങൾ? അടുത്തമാസം അർജുൻ ഇറങ്ങും. ഞങ്ങൾ തിരികെ അങ്ങോട്ട് തന്നെ വരുമെന്ന് കഴിഞ്ഞമാസം തന്നെ ഇവിടെയുള്ള ഒരു പയ്യനെ വിളിച്ച് അയാൾ പറഞ്ഞുവത്രെ. അതിൽനിന്ന് ഞങ്ങളെന്താണ് മനസിലാക്കേണ്ടത്. മോൻ പുറത്ത് വരുമെന്ന് അയാൾക്കറിയാമായിരുന്നു. ഞങ്ങളാണ് മണ്ടന്മാരായത്". 

എല്ലാവരോടും നന്നായി സംസാരിക്കുമായിരുന്നെങ്കിലും ഒറ്റയ്ക്ക് ഒരു വീട്ടിലും പോകുന്ന ശീലം മകൾക്കില്ലായിരുന്നുവെന്ന് അമ്മ പറയുന്നു. ഇടക്കാലത്ത് മകൾ അർജുന് അരികിലേക്ക് പോകാൻ മടികാണിച്ചിരുന്നതും അമ്മ ഓർമ്മിച്ചു.

"അവൻ എടീ, പോടീ എന്നൊക്കെയേ വിളിക്കൂ. അത് കുഞ്ഞിന് ഇഷ്ടപ്പെടാഞ്ഞിട്ടാവുമെന്നാണ് ഞാൻ കരുതിയത്. കുഞ്ഞിനെ മൂന്ന് വയസ് മുതൽ ഉപദ്രവിച്ചിരുന്നുവെന്ന് അവൻ പോലീസിനോട് പറഞ്ഞപ്പോഴാണ് അറിയുന്നത്. അവളെ ഒറ്റയ്ക്ക് നിർത്താറുണ്ടായിരുന്നില്ല. എപ്പോഴും ഞാനോ അനുജന്റെ ഭാര്യയോ ഉണ്ടാകും. കൊറോണ ആയതുകൊണ്ടാണ് അന്ന് മോളെ കൊണ്ടുപോകാതിരുന്നത്. പിന്നെ വീട്ടിൽ മോനുണ്ടല്ലോ എന്നോർത്തു. ഇങ്ങനെയാകുമെന്ന് കരുതിയില്ല".

'അതുവരെ കൂടെയുണ്ടായിരുന്നു, പക്ഷേ പിന്നെ': സഹോദരന് പറയാനുള്ളത്

12 വയസിന്റെ വ്യത്യാസമുണ്ട് സഹോദരനും പെൺകുട്ടിയും തമ്മിൽ. അനുജത്തിയെ ജീവനായിരുന്നു അവന്. ചേട്ടനെ കണ്ടാൽ കിറുക്കനെപ്പോലുണ്ട്. പോയി മുടിവെട്ടാൻ പറ എന്ന് പറഞ്ഞ് തന്റെ അടുക്കലേക്ക് അനുജത്തിയെ പറഞ്ഞയച്ചത് അർജുനാണെന്ന് സഹോദരൻ പറയുന്നു. അവളുടെ നിർബന്ധം സഹിക്കവയ്യാതെയാണ് സഹോദരനും രണ്ട് കൂട്ടുകാരും അർജുനൊപ്പം മുടിവെട്ടാനായി വീടിന് സമീപത്തെ മരച്ചോട്ടിലേക്ക് പോയതെന്നാണ് സഹോദരന്റെ സാക്ഷ്യം. അർജുന്റെ അച്ഛൻ സമീപത്ത് വിറക് കീറുന്നുമുണ്ടായിരുന്നു. ലയത്തോട് ചേർന്നുകിടക്കുന്ന സ്ഥലമാണെങ്കിലും ചെടികളുടെ മറവുള്ളതിനാൽ കുഞ്ഞ് ഇരിക്കുന്ന ഭാഗത്തേക്ക് നേരിട്ട് നോട്ടമെത്തുമായിരുന്നില്ല

"2.30-നാണ് അന്നെനിക്ക് ഓൺലൈൻ ക്ലാസ് തുടങ്ങുന്നത്. വീട്ടിലിരുന്ന് ക്ലാസ് കാണുന്നതിനിടയ്ക്കാണ് സുഹൃത്തിനൊപ്പം മുടിവെട്ടാൻ പോകുന്നത്. പിന്നാലെ മറ്റൊരു സുഹൃത്ത് കൂടി വന്നു. ഞാൻ പോകുമ്പോൾ കൊച്ച് മൊബൈലിൽ വീഡിയോ കണ്ടിരിപ്പുണ്ടായിരുന്നു. അപ്പോഴും ഞാൻ ക്ലാസ് കാണുന്നുണ്ട്. അർജുനും അങ്ങോട്ട് വന്നു. കൂട്ടത്തിലുള്ള ഒരാളെക്കൊണ്ട് പാഷൻ ഫ്രൂട്ട് പറിപ്പിച്ച അർജുൻ അത് കൊണ്ടുവെയ്ക്കാനായി വീടിനകത്തേക്ക് പോയിട്ട് പിന്നെ വന്നത് ക്ലാസ് തീരാറായപ്പോഴാണ്. 3.30-നാണ് എന്റെ ക്ലാസ് തീരുന്നത്'; സഹോദരൻ പറയുന്നു. മുടിവെട്ടി മുറിയിലെത്തിയ കുഞ്ഞിനെ തിരക്കാതിരിക്കാൻ 'വാടാ...നമുക്ക് പോയി വെള്ളം കൊണ്ടുവരാമെന്ന് പറഞ്ഞു", 

വെള്ളം കൊണ്ടുവരാൻ പോകാനായി അടുത്ത മുറിയിൽ ഉറങ്ങുകയായിരുന്ന കുട്ടിയുടെ അച്ഛന്റെ സഹോദരിയുടെ മകനേയും വിളിച്ചു. പോകാനിറങ്ങുമ്പോഴാണ് കുളിക്കാനായി വിളിച്ചിട്ട് കുഞ്ഞിനെ കാണുന്നില്ലെന്ന് പറഞ്ഞ് മുത്തശ്ശി കരയുന്നത്. ലയത്തിലെ ഒരു മുറി അകത്തുനിന്ന് കൊളുത്തിട്ട നിലയിലായിരുന്നു. സഹോദരൻ ആണ് കത്തികൊണ്ട് കൊളുത്തൂരിയത്. ഷാളിൽ കുരുങ്ങിക്കിടക്കുന്ന രീതിയിലായിരുന്നു കുഞ്ഞ്. ബഹളം കേട്ട് പാഞ്ഞെത്തിയ അർജുൻ സഹോദരന്റെ കൈയിൽനിന്ന് കുഞ്ഞിനെ വാങ്ങി ബന്ധുകൂടിയായ നഴ്‌സിനടുത്തേക്ക് ഓടി. എത്രയും പെട്ടെന്ന് ആശുപത്രിയിലെത്തിക്കാനാണ് പൾസ് നോക്കി അവർ പറഞ്ഞതെന്നാണ് പോലീസ് കുറ്റപത്രം

പോലീസ് അർജുനെ പ്രതിയാക്കിയപ്പോൾ അർജുൻ തന്നെയാണ് പ്രതിയെന്ന വിശ്വാസത്തിലേക്ക്  കുട്ടിയുടെ സഹോദരനെ എത്തിച്ച പ്രധാന ഘടകം അർജുൻ സഹോദരനു മുന്നിൽ വെച്ച ഒരാവശ്യമായിരുന്നു. പോലീസ് ചോദിച്ചാൽ മുടിവെട്ടുന്ന സമയത്ത് എല്ലാവരും ഒരുമിച്ചുണ്ടായിരുന്നുവെന്ന് പറയണമെന്നതായിരുന്നു അർജുന്റെ ആവശ്യം.

'സംഭവശേഷം പോലീസ് ആരോടാക്കെ എന്തൊക്കെ ചോദിച്ചുവെന്ന് അർജുൻ അന്വേഷിച്ചു-' അച്ഛന് പറയാനുള്ളത്

"പന്തുകളിക്കിടെ കാലിന് പരിക്ക് പറ്റി മുടന്തി നടക്കുകയാണെന്ന് പറഞ്ഞവന് കുഞ്ഞിനെ എടുത്ത് ഓടുമ്പോഴും വെള്ളം കൊണ്ടുവരാൻ പോകാമെന്ന് പറയുമ്പോഴും വേദനയില്ലായിരുന്നോ?' പെൺകുട്ടിയുടെ അച്ഛൻ ചോദിക്കുന്നു. വൈകുന്നേരമാണ് വോളിബോൾ കളിക്കാറ്. അതിന് തൊട്ടുമുൻപായാണ് അരക്കിലോമീറ്ററോളം അപ്പുറത്ത് നിന്ന് വെള്ളം കൊണ്ടുവെയ്ക്കുക. അന്ന് മാത്രം 3.30 ആവുമ്പോഴേക്ക് വെള്ളം കൊണ്ടുവരാമെന്ന് അവൻ പറഞ്ഞത് ശ്രദ്ധതിരിക്കാനല്ലാതെ മറ്റെന്തിനാണ്?

അർജുന്റെ അച്ഛന്റെ സഹോദരനാണ് കുഞ്ഞ് താഴെ വീണുവെന്നും വേഗം ആശുപത്രിയിലേക്ക് വരണമെന്നും എന്നെ വിളിച്ച് പറയുന്നത്. അർജുന്റെ അച്ഛനും മറ്റൊരാളും കൂടിയാണ് കുഞ്ഞിനെ ആശുപത്രിയിലെത്തിച്ചത്. ഞാൻ അവിടെയെത്തിയപ്പോ നിറയെ ആളുകൾ. ആരേയും അകത്തേയ്ക്ക് വിടുന്നില്ല. കുഞ്ഞ് മരിച്ചുപോയി അപ്പായെന്ന് അർജുനാണ് എന്നോട് പറയുന്നത്. കളിക്കുന്നതിനിടെ ഷാൾ കഴുത്തിൽ കുരുങ്ങിയതാണെന്ന് പറഞ്ഞപ്പോൾ മകനെ ഞാൻ കുറേ വഴക്ക് പറഞ്ഞു. ഡോക്ടർ അറിയിച്ചതനുസരിച്ച് പോലീസും എത്തിയിരുന്നു. കുഞ്ഞിന്റെ ശരീരത്തിൽ മുറിപ്പാടുകൾ കണ്ട ഡോക്ടർ പോസ്റ്റ്‌മോർട്ടം ചെയ്യണമെന്ന് അറിയിച്ചതോടെ അർജുൻ കരച്ചിലും ബഹളവുമായി. 'കുട്ടി ഷാളിൽ തൂങ്ങി മരിച്ചതല്ലേ, എന്തിനാണ് കേസ് എടുക്കുന്നത്, എന്തിനാണ് പോസ്റ്റ്‌മോർട്ടം ഒക്കെ ചെയ്യുന്നത്, അവൾ കുഞ്ഞല്ലേ' എന്ന് ചോദിച്ചുള്ള അവന്റെ കരച്ചിലിൽ ഞങ്ങളും വീണുപോയി. അതാണ് ആദ്യം പോസ്റ്റ്‌മോർട്ടം ചെയ്യേണ്ടതില്ലെന്ന് കരുതിയത്. 

ആശുപത്രിയിൽനിന്ന് ഞങ്ങൾ എത്തുമ്പോഴേക്കും പോലീസ് വീട് സീൽ ചെയ്തിരുന്നു. പക്ഷേ, പോലീസ് പിറ്റേ ദിവസം മാത്രമാണ് സ്ഥലത്തെത്തിയതെന്നാണ്  വിധിയിൽ പറഞ്ഞത്. അത് സത്യമല്ല. പോസ്റ്റ്‌മോർട്ടം കഴിഞ്ഞ് പിറ്റേ ദിവസം വൈകിട്ടാണ് കുഞ്ഞിന്റെ ബോഡി ലഭിക്കുന്നത്. പന്തലിടാനും മരണാനന്തര ചടങ്ങിനുമെല്ലാം അർജുൻ മുന്നിൽ തന്നെയുണ്ടായിരുന്നു. പിറ്റേ ദിവസം വൈകിട്ട് കുഞ്ഞിന്റെ അടക്കം കഴിഞ്ഞാണ് കുഞ്ഞ് കിടന്ന മുറിയൊഴിച്ച് വീടിന്റെ ബാക്കി ഭാഗം പോലീസ് തുറന്നു തന്നത്. അപ്പോഴും കുഞ്ഞിന് പീഡനമേറ്റ വിവരമോ കൊലപാതകമാണെന്നോ പോലീസ് ഞങ്ങളോട് പറഞ്ഞിരുന്നില്ല.  രാത്രി അമ്മയ്‌ക്കൊപ്പം അർജുൻ എന്റടുത്ത് കട്ടിലിൽ വന്നിരുന്ന് കുറേ കരഞ്ഞു. പക്ഷേ, ആ വരവ് കുഞ്ഞിന് കൊടുത്ത മിഠായിയുടെ കടലാസ് എടുത്തു കളയാനാണെന്ന് പോലീസിനോട് പറഞ്ഞപ്പോഴാണ് ഞങ്ങളറിയുന്നത്

അറുപതോളം പേരുടെ മൊഴി അന്നെടുത്തിരുന്നു. എല്ലാവരോടും കുഞ്ഞിനെക്കുറിച്ചും ചോദിച്ചിരുന്നു. അർജുൻ മാത്രമാണ് അന്ന് കുഞ്ഞിനെ കണ്ട കാര്യം പറയാതിരുന്നത്. ഇതാണ് പോലീസിന് അവനിൽ സംശയമുണ്ടാക്കിയ ആദ്യത്തെ കാര്യം. അറിയാതെ എങ്ങാനും പറഞ്ഞുപോയതാണോ എന്നറിയാൻ പോലീസ് പലതവണ ചോദിച്ചു. അപ്പോഴും കുഞ്ഞിനെ കണ്ടില്ലെന്നാണ് അവൻ പറഞ്ഞത്. നിന്റെ പെരിയമ്മ നിന്നെ കണ്ടതായി പറഞ്ഞല്ലോ എന്ന് പറഞ്ഞതും അവൻ ഞങ്ങളിരിക്കുന്നിടത്തേക്ക് ഓടി വന്നു. പോലീസ് ചോദിച്ചപ്പോ കുഞ്ഞിനെ കണ്ട കാര്യം പറയാൻ ഞാൻ മറന്നു അപ്പാ, ഞാനിനി പ്രതിയാകുമോ' എന്ന് ചോദിച്ച് അവൻ കരയാൻ തുടങ്ങി. 'നീയെന്തിനാ അതിന് പേടിക്കുന്നതെന്ന്' ഞങ്ങളിലൊരാൾ ചോദിക്കുകയും ചെയ്തു. " - പെൺകുട്ടിയുടെ അച്ഛൻ പറഞ്ഞു

ജനലും വാതിലും അടഞ്ഞ് കിടന്നതുകൊണ്ട് കളിക്കുന്നതിനിടെ സംഭവിച്ചതാവുമെന്നാണ് ഞങ്ങളും കരുതിയത്. കുഞ്ഞിന്റെ കഴുത്തിൽ കുരുക്കിടാതെ രണ്ട് ചുറ്റുചുറ്റി കഴുത്തിൽ മുറുകി കിടക്കുന്നതുപോലെയായിരുന്നു ഷാൾ ഉണ്ടായിരുന്നത്. കയറിലും കുരുക്കുണ്ടാക്കാതെ ചുറ്റി ഇട്ടതായിരുന്നു. പെട്ടെന്ന് ആരു കണ്ടാലും കുഞ്ഞിനെന്തോ അബദ്ധം സംഭവിച്ചതാണെന്നേ തോന്നൂ. അങ്ങനെ തോന്നിപ്പിക്കാനാണ് ഈ രീതിയിൽ കുരുക്കിട്ടതെന്നൊക്കെ പിന്നീടാണ് അറിയുന്നത്. കുഞ്ഞിനെ കൊന്ന് ഇറങ്ങിപ്പോന്നത് ജനാല വഴിയാണെന്ന് അവൻ തന്നെയാണ് പറഞ്ഞത്. മാധ്യമങ്ങളിൽ കാണിക്കുകയും ചെയ്തു. എന്നിട്ടും കോടതി ചോദിച്ചത് ഇത്ര ഉയരത്തിലുള്ള ജനാല വഴി അവനെങ്ങനെ പുറത്ത് കടക്കുമെന്നാണ്. ആളുകൾ കാണില്ലേ എന്നും കോടതി ചോദിച്ചു. അവിടെ മുഴുവൻ അഴയിൽ തുണി ഉണങ്ങാനിട്ടിരുന്നു. അതിനിടയിലൂടെ അവൻ പുറത്ത് കടന്നാൽ ആരും കാണില്ല.' പെൺകുട്ടിയുടെ അച്ഛൻ പറഞ്ഞു.

അർജുനെ ഒഴിച്ച് മറ്റാരെയും ചോദ്യം ചെയ്തിരുന്നില്ലെന്ന വാദവും പെൺകുട്ടിയുടെ അച്ഛൻ നിരാകരിച്ചു. "അവനെ മാത്രമല്ല, അന്ന് ഈ ലയത്തിലുണ്ടായിരുന്ന സകലരേയും പോലീസ് ചോദ്യം ചെയ്തിരുന്നു. അച്ഛനായ എന്നേയും എന്റെ മകനേയും അവന്റെ കൂട്ടുകാരേയുമെല്ലാം ചോദ്യം ചെയ്തിട്ടുണ്ട്.''

പ്രതി അർജുനാണെന്ന് തെളിയിക്കാൻ പ്രോസിക്യൂഷൻ നിരത്തിയ തെളിവുകളിൽ പ്രധാനപ്പെട്ടതായിരുന്നു അർജുൻ സ്ഥിരമായി മിഠായി വാങ്ങിയിരുന്നുവെന്ന കടക്കാരന്റെ സാക്ഷ്യപ്പെടുത്തൽ. ഇത് കള്ളമാണെന്നായിരുന്നു അർജുന്റെ വാദം. എന്നാൽ, അമ്പത് രൂപയ്ക്കും നൂറ് രൂപയ്ക്കും വരെ അർജുൻ മിഠായി വാങ്ങിയിട്ടുണ്ടെന്ന് കടക്കാരൻ പലതവണകളായി പൊതുസമൂഹത്തിനും മാധ്യമങ്ങൾക്കും മുൻപാകെ വെളിപ്പെടുത്തിയിട്ടുണ്ട്..

'കടക്കാരന് ഇവനെതിരേ മൊഴി പറയേണ്ട ആവശ്യമെന്താണ്? ഇവൻ തന്നെയാണ് അവരെ കോടതി കയറ്റിയത്. അവൻ തന്നെയല്ലേ അവിടുന്നാണ് മിഠായി വാങ്ങാറെന്ന് പോലീസിനോട് പറഞ്ഞത്. അന്നേ ദിവസം കുഞ്ഞിനൊപ്പം അവനെ കണ്ടിരുന്നുവെന്ന് ഭാര്യ മാത്രമല്ല, അർജുന്റെ പെരിയമ്മ (അച്ഛന്റെ ജ്യേഷഠന്റെ ഭാര്യ)യും പറഞ്ഞിരുന്നല്ലോ. അവരും കള്ളം പറഞ്ഞതാണോ അപ്പോൾ?', കുട്ടിയുടെ  അച്ഛൻ ചോദിക്കുന്നു

എല്ലാവരോടും പെട്ടെന്നിണങ്ങുന്ന, വാതോരാതെ വിശേഷം പറയുന്ന പെൺകുട്ടിയെ ഇന്നുമോർക്കുന്നുണ്ട് ലയത്തിലുള്ളവർ. ചുറ്റുവട്ടത്തൊന്നും ആ പ്രായത്തിലുള്ള കുഞ്ഞുങ്ങളില്ലാത്തതിനാൽ എല്ലാവർക്കും പ്രിയപ്പെട്ടവൾ. ആടാനും പാടാനും മാത്രമല്ല, പഠിക്കാനും മിടുമിടുക്കി. പെൺകുട്ടി കൊല്ലപ്പെട്ടതിന്റെ പതിനാറാം ദിവസമായിരുന്നു അവളുടെ പിറന്നാൾ. വാങ്ങിത്തരേണ്ട സാധനങ്ങളും കേക്കും അവൾ നേരത്തേ പറഞ്ഞുവച്ചിരുന്നു. പൊട്ടിച്ചിരികൾക്ക് പകരം കൂട്ടക്കരച്ചിലായിരുന്നു അന്ന് ആ വീട്ടിൽ നിറഞ്ഞത്. കണ്ണീരോടെ അച്ഛൻ കേക്ക് മുറിച്ചു. അതിന് ശേഷം വന്ന ഓരോ പിറന്നാളിനും അവർ കേക്ക് മുറിച്ചു. വാശിപിടിച്ചും കൊഞ്ചിയും അവൾ ആവശ്യപ്പെട്ടിരുന്ന കാര്യങ്ങൾ ചെയ്തു. ഇന്ന്, വിശേഷാവസരങ്ങളിലെല്ലാം അവൾക്കായി  ഉടുപ്പുകളും കളിപ്പാട്ടങ്ങളും വാങ്ങാറുണ്ടവർ. ഒരു വിളിക്കപ്പുറം ഇപ്പോഴും മകളുണ്ടെന്ന വിശ്വാസത്തിൽ... 

(അടുത്ത ലക്കങ്ങളിൽ കുറ്റവിമുക്തനാക്കപ്പെട്ട അർജുന്റെ അഭിഭാഷകന്റെ വാദങ്ങളും വിധിയിലേക്കു നയിച്ച ശാസ്ത്രീയ തെളിവുകളുടെ പോരായ്മകളും വായിച്ചറിയാം)