അബുദാബി: മൂന്ന് തൊഴിൽ തർക്ക കേസുകൾ കേവലം മൂന്ന് മാസത്തിനുള്ളിൽ പരിഹരിച്ച് 948 തൊഴിലാളികൾക്കായി 78.11 ലക്ഷത്തിലധികം ദിർഹം വീണ്ടെടുത്ത് നൽകിയതായി അബുദാബി ലേബർ കോർട്ട് തിങ്കളാഴ്ച അറിയിച്ചു. മൊത്തം 1.23 കോടി ദിർഹം ആവശ്യപ്പെട്ട് നൽകിയ ഹർജികളിലാണ് ലേബർ കോർട്ടിന്റെ നിർണ്ണായക ഇടപെടൽ ഉണ്ടായത്. നടപടിക്രമങ്ങളുടെ ഭാഗമായി കേസിൽ ഉൾപ്പെട്ട 457 തൊഴിലാളികൾക്ക് അവരുടെ മുഴുവൻ സാമ്പത്തിക ആനുകൂല്യങ്ങളും തുകയായിത്തന്നെ ലഭിച്ചു. ബാക്കിയുള്ള 491 തൊഴിലാളികൾക്ക് തുകയുടെ ഒരു വിഹിതം ഉടനടി ലഭ്യമാക്കുകയും ശേഷിക്കുന്ന തുക കൃത്യമായ ഗഡുക്കളായി നൽകാനുള്ള ധാരണയിലെത്തുകയും ചെയ്തു. ഇതിലൂടെ തൊഴിലാളികൾക്ക് ലഭിക്കാനുള്ള കുടിശ്ശിക തുക പൂർണ്ണമായും ഉറപ്പാക്കാൻ സാധിക്കും.
അബുദാബി ലേബർ കോർട്ട്, മാനവവിഭവശേഷി സ്വദേശിവൽക്കരണ മന്ത്രാലയം, കേസിൽ ഉൾപ്പെട്ട കമ്പനികൾ എന്നിവരുടെ സംയുക്ത മധ്യസ്ഥ ശ്രമങ്ങളിലൂടെയാണ് തുക വീണ്ടെടുക്കാനായത്. ജുഡീഷ്യൽ ഡെപ്പോസിറ്റുകൾ വഴിയും ഇരുവിഭാഗങ്ങളും തമ്മിലുള്ള സൗഹാർദ്ദപരമായ ഒത്തുതീർപ്പിലൂടെ നേരിട്ടുള്ള പേയ്മെന്റുകൾ വഴിയുമാണ് പണം കൈമാറിയത്. തൊഴിൽപരമായ അവകാശങ്ങൾ വീണ്ടെടുക്കുന്നതിനൊപ്പം, നിലവിലുള്ള കമ്പനികളിൽ തന്നെ ജോലിയിൽ തുടരാൻ ഈ ഒത്തുതീർപ്പിലൂടെ തൊഴിലാളികൾക്ക് സാധിച്ചു. തൊഴിലുടമയും തൊഴിലാളിയും തമ്മിലുള്ള ബന്ധം തകരാതെ കാത്തുസൂക്ഷിക്കാനും ഇത് വഴിയൊരുക്കി. യു.എ.ഇ നിയമങ്ങൾക്ക് അനുസൃതമായി തൊഴിൽ തർക്കങ്ങൾ അതിവേഗം പരിഹരിക്കാനും തൊഴിൽ രംഗത്ത് സുസ്ഥിരമായ അന്തരീക്ഷം ഉറപ്പാക്കാനും ലേബർ കോർട്ടും മന്ത്രാലയവും പ്രതിജ്ഞാബദ്ധമാണെന്ന് അധികൃതർ വ്യക്തമാക്കി.

To advertise here,