മനാമ: പ്രാദേശികവും അന്താരാഷ്ട്രവുമായ സമാധാനം, സുരക്ഷ, സമൃദ്ധി എന്നിവയ്ക്കായി സംവാദത്തിനും പരസ്പര ധാരണയ്ക്കും പങ്കാളിത്തത്തിനുമുള്ള ആഗോള വേദിയാണ് 22-ാമത് ഐ.ഐ.എസ്.എസ്. മനാമ ഡയലോഗെന്ന് ബഹ്‌റൈൻ വിദേശകാര്യ മന്ത്രി ഡോ. അബ്ദുല്ലത്തീഫ് ബിൻ റാഷിദ് അൽ സയാനി. ഫോറത്തിന്റെ വിജയത്തെ അദ്ദേഹം അഭിനന്ദിച്ചു.

To advertise here,

ബഹ്‌റൈൻ രാജാവ് ഹമദ് ബിൻ ഈസ അൽ ഖലീഫയുടെ കാഴ്ചപ്പാടും കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫയുടെ നിർദേശങ്ങളും ഈ വേദി പ്രതിഫലിപ്പിക്കുന്നുവെന്ന് മന്ത്രി പറഞ്ഞു.

മന്ത്രിമാർ, ഉന്നത ഉദ്യോഗസ്ഥർ, വിദഗ്ധർ, പ്രാദേശിക-അന്താരാഷ്ട്ര സംഘടനകളുടെ പ്രതിനിധികൾ എന്നിവരെ ഒരുമിപ്പിച്ച ഫോറം ഉദ്ഘാടനം ചെയ്ത കിരീടാവകാശിയെയും പ്രധാനമന്ത്രിയെയും ഡോ. അൽ സയാനി അഭിനന്ദിച്ചു. സുരക്ഷ, സ്ഥിരത, സുസ്ഥിര വികസനം എന്നിവ മുന്നോട്ടുകൊണ്ടുപോകുന്നതിനായി തീരുമാനമെടുക്കുന്നവർക്കിടയിൽ സംവാദം വളർത്താനും അന്താരാഷ്ട്ര പങ്കാളിത്തം ശക്തിപ്പെടുത്താനുമുള്ള ബഹ്‌റൈന്റെ പ്രതിബദ്ധതയാണ് സംഗമം വ്യക്തമാക്കുന്നതെന്നും അദ്ദേഹം പറഞ്ഞു.

ഹോർമുസ് കടലിടുക്കും ബാബ് അൽ മന്ദാബും ഉൾപ്പെടെയുള്ള സുപ്രധാന ജലപാതകളും നാവിഗേഷൻ സ്വാതന്ത്ര്യവും സംരക്ഷിക്കുന്നതിന് അന്താരാഷ്ട്ര സഹകരണം വേണമെന്ന കിരീടാവകാശിയുടെ ആഹ്വാനവും മന്ത്രി എടുത്തുപറഞ്ഞു. ആഗോള ഊർജ-ഭക്ഷ്യ വിതരണത്തിനും വ്യാപാരത്തിനും സാമ്പത്തിക സ്ഥിരതയ്ക്കും ഈ ജലപാതകൾ നിർണായകമാണെന്നും അദ്ദേഹം ചൂണ്ടിക്കാട്ടി.

2026–27 കാലയളവിലേക്കുള്ള ഐക്യരാഷ്ട്രസഭാ സുരക്ഷാ സമിതിയിലെ ബഹ്‌റൈന്റെ അംഗത്വവും ഗൾഫ് സഹകരണ കൗൺസിലിന്റെ അധ്യക്ഷസ്ഥാനവും മനാമ ഡയലോഗ് നടക്കുന്ന സമയത്താണെന്ന് മന്ത്രി പറഞ്ഞു. ബഹ്‌റൈന്റെ നയതന്ത്രത്തിലുള്ള അന്താരാഷ്ട്ര വിശ്വാസത്തെയും ആഗോള സമാധാനത്തിനും സുരക്ഷയ്ക്കും രാജ്യം നൽകുന്ന പിന്തുണയെയും ഇത് പ്രതിഫലിപ്പിക്കുന്നുവെന്ന് മന്ത്രി പറഞ്ഞു. അന്താരാഷ്ട്ര നിയമത്തോടുള്ള ആദരവും പങ്കിട്ട ഉത്തരവാദിത്തവും അടിസ്ഥാനമാക്കി സഹിഷ്ണുത, സഹവർത്തിത്വം, അന്താരാഷ്ട്ര സഹകരണം എന്നിവ പ്രോത്സാഹിപ്പിക്കുന്നതിൽ ബഹ്‌റൈൻ പ്രതിജ്ഞാബദ്ധമാണെന്നും അദ്ദേഹം വ്യക്തമാക്കി.