മനാമ: മുഹറഖ് കേന്ദ്രമായി പ്രവർത്തിക്കുന്ന പ്രമുഖ മലയാളി കൂട്ടായ്മയായ മുഹറഖ് മലയാളി സമാജത്തിന്റെ 2026–28 കാലയളവിലേക്കുള്ള പുതിയ ഭരണസമിതിയെ തെരഞ്ഞെടുത്തു. അബ്ദുൽ മൻഷീർ പ്രസിഡന്റായും ശിവശങ്കർ ജനറൽ സെക്രട്ടറിയായും തങ്കച്ചൻ ചാക്കോ ട്രഷററായും തെരഞ്ഞെടുക്കപ്പെട്ടു.

To advertise here,

എബ്രഹാം ജോൺ മുഖ്യ രക്ഷാധികാരിയായും കൃഷ്ണകുമാർ, അനസ് റഹീം എന്നിവർ രക്ഷാധികാരികളായും തെരഞ്ഞെടുക്കപ്പെട്ടു. അൻവർ നിലമ്പൂരാണ് ഉപദേശക സമിതി ചെയർമാൻ.

പ്രമീജ് കുമാർ, ഗോകുൽ കൃഷ്ണൻ എന്നിവർ വൈസ് പ്രസിഡന്റുമാരും പ്രമോദ് കുമാർ, മൊയ്തീൻ എന്നിവർ ജോയിന്റ് സെക്രട്ടറിമാരുമാണ്. ശ്രീകുമാർ താമരക്കുളം അസിസ്റ്റന്റ് ട്രഷററായി തെരഞ്ഞെടുക്കപ്പെട്ടു.

വകുപ്പ് സെക്രട്ടറിമാരായി ബാഹിറ അനസ് (എന്റർടൈൻമെന്റ് ആൻഡ് മീഡിയ), അരുൺ ദേവ് (ജീവകാരുണ്യ വിഭാഗം), സുനിൽ കുമാർ വില്യാപ്പള്ളി (മെമ്പർഷിപ്പ്), സുജിത് ഗോപിനാഥ് (കായിക വിഭാഗം) എന്നിവരെയും തെരഞ്ഞെടുത്തു. ലത്തീഫ് കെ., അനസ് റഹീം, സുനിൽ കുമാർ, ശിവശങ്കർ എന്നിവർ തെരഞ്ഞെടുപ്പ് നടപടികൾക്ക് നേതൃത്വം നൽകി.

കഴിഞ്ഞ എട്ട് വർഷമായി മുഹറഖ് കേന്ദ്രമായി പ്രവർത്തിക്കുന്ന സമാജം നിരവധി ജീവകാരുണ്യ, കലാ-സാംസ്‌കാരിക, കായിക പരിപാടികൾ സംഘടിപ്പിച്ചിട്ടുണ്ട്. അംഗങ്ങളുടെ ആരോഗ്യസംരക്ഷണത്തിന് മുൻഗണന നൽകി പ്രതിമാസ സൗജന്യ ആരോഗ്യപരിശോധനാ സൗകര്യവും സംഘടന ഒരുക്കിവരുന്നു.

വനിതാ വേദി, മഞ്ചാടി ബാലവേദി, സർഗവേദി, ഹെൽപ് ഡെസ്‌ക് എന്നിവ സമാജത്തിന്റെ ഉപഘടകങ്ങളാണ്. കേരള സർക്കാരിന്റെ മലയാളം മിഷൻ ബഹ്‌റൈൻ ചാപ്റ്ററിന് കീഴിലുള്ള മലയാളം പാഠശാലയും സംഘടന നടത്തിവരുന്നു.

സമാജത്തിൽ പുതിയതായി അംഗത്വമെടുക്കാൻ താൽപര്യമുള്ളവർ 38487192, 33874100 എന്നീ നമ്പറുകളിൽ ബന്ധപ്പെടണമെന്ന് ഭാരവാഹികൾ വാർത്താക്കുറിപ്പിൽ അറിയിച്ചു.