ഇസ്രയേലിൽ പോളിങ്ങ് തുടങ്ങി, അവസാനനിമിഷം ഭയം ആയുധമാക്കി നെതന്യാഹു

ടെൽ അവീവ്: ലോകം ഉറ്റ് നോക്കുന്ന ഇസ്രയേൽ പൊതുതിരഞ്ഞെടുപ്പ് ആരംഭിച്ച് മൂന്ന് മണിക്കൂർ പിന്നിട്ടു. രാജ്യം പോളിങ്ങിലേക്ക് കടക്കുന്ന അവസാന നിമിഷംവരെ കടുത്ത ഭീതി പടർത്തുന്ന പ്രചാരണമാണ് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു അഴിച്ചുവിട്ടത്. രണ്ടാം ലോക മഹായുദ്ധ കാലത്ത് ജൂതർ നേരിട്ട വംശഹത്യയെ ഓർമിപ്പിച്ചുകൊണ്ട്, തനിക്ക് വോട്ട് ചെയ്തില്ലെങ്കിൽ രാജ്യം 'രണ്ടാം ഹോളോകോസ്റ്റിന്' ഇരയാകേണ്ടിവരുമെന്നാണ് അഭിപ്രായ സർവേകളിൽ പിന്നിൽ നിൽക്കുന്ന നെതന്യാഹു മുന്നറിയിപ്പ് നൽകുന്നത്. പ്രചാരണത്തിന്റെ ഭാഗമായി തെൽ അവീവിൽ ആണവബോംബ് പതിച്ച് കത്തിയമരുന്നതിന്റെ എഐ ചിത്രവും അദ്ദേഹം സമൂഹമാധ്യമങ്ങളിൽ പങ്കുവെച്ചു.

തിരഞ്ഞെടുപ്പിന്റെ തൊട്ടുമുൻപ് വോട്ടർമാർക്കിടയിൽ പരിഭ്രാന്തി സൃഷ്ടിച്ച് ഭരണം നിലനിർത്താനുള്ള തന്ത്രമായാണ് നെതന്യാഹുവിന്റെ ഈ നീക്കത്തെ രാഷ്ട്രീയ നിരീക്ഷകർ വിലയിരുത്തുന്നത്. 78 വർഷത്തെ ചരിത്രത്തിലെ ഏറ്റവും നിർണായകമായ തിരഞ്ഞെടുപ്പിനെ രാജ്യം അഭിമുഖീകരിക്കുമ്പോൾ, താൻ അധികാരത്തിൽ തുടർന്നില്ലെങ്കിൽ ഇസ്രയേൽ സമ്പൂർണ നാശത്തിലേക്ക് കൂപ്പുകുത്തുമെന്നാണ് 77-കാരനായ നെതന്യാഹു വാദിക്കുന്നത്. താൻ ഭരണത്തിലില്ലെങ്കിൽ ഇറാൻ രാജ്യത്തെ നാമാവശേഷമാക്കുമെന്നും അദ്ദേഹം ആവർത്തിക്കുന്നു.

സുരക്ഷാ ഭീഷണികൾക്ക് പുറമെ, രാജ്യം വൻ സാമ്പത്തിക തകർച്ചയിലേക്ക് നീങ്ങുകയാണെന്ന മുന്നറിയിപ്പും അദ്ദേഹം നൽകി. യുഎസ് സൈനിക സഹായം നിലയ്ക്കുമെന്നും അന്താരാഷ്ട്ര ഉപരോധങ്ങൾ കടുക്കുമെന്നും സമ്മതിക്കുന്ന അദ്ദേഹം, ഇതിനെ മറികടക്കാൻ ഇറാന്റേതിന് സമാനമായ 'പ്രതിരോധ സമ്പദ്വ്യവസ്ഥ' അനിവാര്യമാണെന്ന് വ്യക്തമാക്കുന്നു. ഇതിനായി ക്രിപ്‌റ്റോ കറൻസി അധിഷ്ഠിതമായ അടഞ്ഞ സാമ്പത്തിക വ്യവസ്ഥ ഒരുക്കുകയാണെന്നും നെതന്യാഹു പ്രഖ്യാപിച്ചു.

ഓഹരി വിപണിയുടെ തകർച്ച, കുതിച്ചുയരുന്ന തൊഴിലില്ലായ്മ, അനിയന്ത്രിതമായ വിലക്കയറ്റം എന്നിവ മുന്നിൽക്കണ്ടാണ് നെതന്യാഹു 'സൂപ്പർ സ്പാർട്ട' മാതൃക മുന്നോട്ടുവെക്കുന്നതെന്ന് രാഷ്ട്രീയ നിരീക്ഷകർ ചൂണ്ടിക്കാട്ടുന്നു. ഇസ്രയേലിന്റെ ഗ്ലോബൽ ടെക് പ്രതിച്ഛായയെ ഇല്ലാതാക്കി രാജ്യത്തെ പൂർണമായും ഒറ്റപ്പെടുത്തുന്നതാണ് ഈ പ്രഖ്യാപനമെന്ന് വിമർശകർ വിലയിരുത്തുന്നു. ഒക്ടോബർ 7 ദുരന്തത്തിന്റെ ഉത്തരവാദിത്തം ഏറ്റെടുക്കാനോ സ്വതന്ത്ര അന്വേഷണ കമ്മീഷനെ നിയോഗിക്കാനോ വിസമ്മതിക്കുന്ന അദ്ദേഹം, താൻ തുടങ്ങിയ ജുഡീഷ്യൽ പരിഷ്‌കാരങ്ങളുമായി മുന്നോട്ട് പോകുമെന്നും വ്യക്തമാക്കി.

തീവ്ര വലതുപക്ഷ-അൾട്രാ ഓർത്തഡോക്‌സ് സഖ്യത്തെ നയിക്കുന്ന നെതന്യാഹുവിന് എതിരെ ശക്തമായ പ്രതിപക്ഷ നിരയെ നയിക്കുന്നത് മുൻ സൈനിക മേധാവി ഗാഡി ഐസൻകോട്ടാണ്. ഗാസ യുദ്ധത്തിൽ മകൻ കൊല്ലപ്പെട്ട ഐസൻകോട്ട്, ജനകീയ അടിത്തറയുള്ള സൈനികനെന്ന നിലയിൽ വലിയ മുന്നേറ്റമാണ് കാഴ്ചവെക്കുന്നത്. അതേസമയം, യുഎസ് മുൻ പ്രസിഡന്റ് ഡൊണാൾഡ് ട്രംപ് നെതന്യാഹുവിന് പരസ്യപിന്തുണ പ്രഖ്യാപിച്ചെങ്കിലും വോട്ടർമാരെ ഇത് എത്രത്തോളം സ്വാധീനിക്കുമെന്നതിൽ രാഷ്ട്രീയ നിരീക്ഷകർ സംശയം പ്രകടിപ്പിക്കുന്നു.

ആകെ 73.3 ലക്ഷം പേർക്കാണ് വോട്ടവകാശമുള്ളത്. വിദേശത്ത് താമസിക്കുന്ന 6.3 ലക്ഷത്തോളം പൗരന്മാർക്ക് പ്രവാസി വോട്ടിങ് അനുവദിക്കാത്തതിനാൽ ആയിരക്കണക്കിനാളുകൾ വോട്ട് ചെയ്യാനായി നേരിട്ട് രാജ്യത്തേക്ക് എത്തി. പാർലമെന്റായ നെസ്സറ്റിലെ 120 സീറ്റുകളിലേക്ക് 38 പാർട്ടികളാണ് മത്സരിക്കുന്നത്. കേവല ഭൂരിപക്ഷത്തിന് 61 സീറ്റുകൾ വേണം. പാർലമെന്റിൽ പ്രാതിനിധ്യം ലഭിക്കാൻ കുറഞ്ഞത് 3.25 ശതമാനം വോട്ട് നേടണം.

വോട്ടെടുപ്പിന്റെ പശ്ചാത്തലത്തിൽ വെസ്റ്റ് ബാങ്കിൽ ഇസ്രയേൽ സൈന്യം സമ്പൂർണ ലോക്ക്ഡൗൺ ഏർപ്പെടുത്തി. വോട്ടവകാശമില്ലെങ്കിലും തിരഞ്ഞെടുപ്പ് ഫലം പലസ്തീൻ ജനതയുടെ ഭാവിയെയും നിർണായകമായി ബാധിക്കും. ജനസംഖ്യയുടെ 20 ശതമാനത്തോളം വരുന്ന അറബ് വംശജരുടെ പോളിങ് ശതമാനം ഇത്തവണ ഗണ്യമായി ഉയരുമെന്നാണ് പ്രവചനം. കഴിഞ്ഞ തവണത്തെ 56 ശതമാനത്തിൽനിന്ന് ഇത് 63 ശതമാനത്തിലേക്ക് ഉയർന്നേക്കും. തങ്ങളുടെ നിലനിൽപ്പിനെത്തന്നെ ചോദ്യംചെയ്യുന്ന തീവ്ര വലതുപക്ഷത്തെ അധികാരത്തിൽനിന്ന് താഴെയിറക്കാൻ വോട്ട് വിനിയോഗിക്കണമെന്ന് അവർ കരുതുന്നു.

ഇതോടെ, പ്രചാരണത്തിന്റെ മുന യുണൈറ്റഡ് അറബ് ലിസ്റ്റ് (റാം) പാർട്ടി തലവൻ മൻസൂർ അബ്ബാസിന് നേരെ തിരിക്കുകയാണ് നെതന്യാഹു ചെയ്തത്. 'ഞാൻ പുറത്തായാൽ ഈ അറബ് പാർട്ടി അധികാരം പിടിച്ചെടുക്കും; അവർ ഇസ്രയേലിനെ ഉള്ളിൽനിന്ന് തകർക്കും' എന്ന രീതിയിലാണ് നെതന്യാഹു തീവ്ര ജൂത ദേശീയവാദികൾക്കിടയിൽ പ്രചാരണം നടത്തുന്നത്. എതിരാളിയായ ഗാഡി ഐസൻകോട്ട് പുൽത്തകിടിയിലൂടെ ഓടിവന്ന് മൻസൂർ അബ്ബാസിനെ ആലിംഗനം ചെയ്യുന്ന വ്യാജ എഐ വീഡിയോകൾ വരെ നെതന്യാഹുവിന്റെ തിരഞ്ഞെടുപ്പ് പ്രചാരണ വിഭാഗം നിർമിച്ച് പ്രചരിപ്പിച്ചു.

ചൊവ്വാഴ്ച രാവിലെ 7-ന് ആരംഭിച്ച വോട്ടെടുപ്പ് രാത്രി 10-ന് പൂർത്തിയാകും. തൊട്ടുപിന്നാലെ എക്‌സിറ്റ് പോൾ ഫലങ്ങൾ പുറത്തുവരും. ഔദ്യോഗിക ഫലം നവംബർ നാലോടെ മാത്രമേ വ്യക്തമാകൂ. തിരഞ്ഞെടുപ്പിന് തൊട്ടുമുമ്പ് പുറത്തുവന്ന സർവേകളിൽ ഗാഡി ഐസൻകോട്ടിന്റെ നേതൃത്വത്തിലുള്ള പ്രതിപക്ഷ സഖ്യം രണ്ട് മുതൽ ആറ് സീറ്റുകൾ വരെ മുന്നിലാണെങ്കിലും, ഇരു മുന്നണികൾക്കും വ്യക്തമായ 61 സീറ്റ് ഭൂരിപക്ഷം ലഭിക്കില്ലെന്നാണ് പ്രവചനം. വ്യക്തികൾക്കല്ല, പാർട്ടികൾക്കാണ് ഇവിടെ വോട്ട് രേഖപ്പെടുത്തുന്നത് എന്നതിനാൽ രാജ്യവ്യാപകമായി ലഭിക്കുന്ന വോട്ടിന്റെ ആനുപാതിക അടിസ്ഥാനത്തിലാണ് സീറ്റുകൾ വിഭജിക്കുക.

ഇസ്രയേൽ ചരിത്രത്തിൽ ഇന്നുവരെ ഒരു പാർട്ടിക്കും ഒറ്റയ്ക്ക് കേവല ഭൂരിപക്ഷം ലഭിച്ചിട്ടില്ല. അതിനാൽ സഖ്യസർക്കാർ രൂപീകരണ ചർച്ചകൾ ആഴ്ചകളോ മാസങ്ങളോ നീളാനും, ധാരണയിലെത്താനായില്ലെങ്കിൽ രാജ്യം വീണ്ടും മറ്റൊരു തിരഞ്ഞെടുപ്പിലേക്ക് നീങ്ങാനും സാധ്യതയേറെയാണ്.