ടെൽ അവീവ്: ഇസ്രായേലിൽ തിരഞ്ഞെടുപ്പിൽ വിദേശ രാജ്യങ്ങൾ സ്വാധീനം ചെലുത്താൻ ശ്രമിച്ചെന്ന ആരോപണത്തിൽ ആഭ്യന്തര രഹസ്യാന്വേഷണ ഏജൻസിയായ ഷിൻ ബെറ്റിനൊപ്പം അന്താരാഷ്ട്ര രഹസ്യാന്വേഷണ ഏജൻസിയായ മൊസാദും അന്വേഷണത്തിൽ പങ്കാളിയാകുന്നു. അറബ് വോട്ടർമാരുടെ പങ്കാളിത്തം കൂട്ടാനായി നിയമവിരുദ്ധമായി പണം രാജ്യത്തേക്ക് ഒഴുകിയെന്ന ആരോപണമാണ് ഏജൻസികൾ അന്വേഷിക്കുന്നതെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു.

To advertise here,

ഖത്തർ, തുർക്കി തുടങ്ങിയ രാജ്യങ്ങൾക്ക് ഈ വിഷയത്തിൽ പങ്കുണ്ടോയെന്നാണ് പ്രധാനമായും പരിശോധിക്കുന്നത്. വിദേശ ഗൂഢാലോചനകൾ പുറത്തുകൊണ്ടുവരാനാണ് ഷിൻ ബെറ്റ് മൊസാദിന്റെ സഹായം തേടിയതെന്ന് ടൈംസ് ഓഫ് ഇസ്രായേൽ റിപ്പോർട്ട് ചെയ്തു. തിരഞ്ഞെടുപ്പിൽ ഇടപെട്ടെന്ന ആരോപണങ്ങളെ ഖത്തർ, തുർക്കി വിദേശകാര്യ മന്ത്രാലയങ്ങൾ പൂർണമായും തള്ളിക്കളഞ്ഞിരുന്നു.

അന്വേഷണം നടക്കുന്നുണ്ടെങ്കിലും തിരഞ്ഞെടുപ്പ് ഫലങ്ങളുടെ സാധുതയെ ചോദ്യംചെയ്യുന്ന രീതിയിലല്ല ഇതെന്നും, കുറ്റക്കാർക്കെതിരെ മാത്രമായിരിക്കും നടപടിയെന്നും സെൻട്രൽ ഇലക്ഷൻ കമ്മിറ്റി വ്യക്തമാക്കി. പ്രധാനമന്ത്രി ബെഞ്ചമിൻ നെതന്യാഹുവിന്റെ ഓഫീസ് നൽകിയ സൂചനകളെത്തുടർന്നാണ് പോലീസും സുരക്ഷാ ഏജൻസികളും അന്വേഷണം ആരംഭിച്ചത്. വിദേശ ഫണ്ട് എത്തിയതിന്റെ കൃത്യമായ വിവരങ്ങൾ കണ്ടെത്താൻ വരുംദിവസങ്ങളിൽ കൂടുതൽ അന്വേഷണം ഉണ്ടാകും.

120 അംഗ നെസ്സറ്റിൽ നെതന്യാഹുവിന്റെ സഖ്യത്തിന് 53 സീറ്റുകളും പ്രതിപക്ഷ സഖ്യത്തിന് 48 സീറ്റുകളുമാണ് ലഭിച്ചത്. കേവലഭൂരിപക്ഷത്തിന് 61 സീറ്റുകൾ വേണമെന്നിരിക്കെ, 19 സീറ്റുകൾ നേടിയ റാ'അം, ജോയിന്റ് ലിസ്റ്റ് എന്നീ അറബ് പാർട്ടികളുടെ പിന്തുണയോടെ പ്രതിപക്ഷത്തിന് പുതിയ സ്പീക്കറെ തിരഞ്ഞെടുക്കാനും അധികാരത്തിലെത്താനും സാധിക്കും. അങ്ങനെവന്നാൽ മുൻ സർക്കാരിന്റെ നിയമപരിഷ്കാരങ്ങൾ റദ്ദാക്കാനും സാധിക്കും. ഇതു തടയാനാണ് നെതന്യാഹുവിന്റെ ശ്രമം.

തിരഞ്ഞെടുപ്പിൽ ഇടപെട്ടെന്ന ഇസ്രായേലിന്റെ ആരോപണം ഖത്തർ നേരത്തെ തള്ളിയിരുന്നു. ഇസ്രയേലിലെ ചില രാഷ്ട്രീയക്കാരുടെയും മാധ്യമപ്രവർത്തകരുടെയും രാഷ്ട്രീയ പരാജയങ്ങൾ മറച്ചുവെക്കാൻ ഖത്തറിനെ ബലിയാടാക്കുകയാണെന്നും ഇത്തരം വ്യാജ പ്രചാരണങ്ങൾ അസംബന്ധവും അപകടകരവുമാണെന്നും ഖത്തർ വിദേശകാര്യ മന്ത്രാലയ വക്താവ് ഡോ. മജീദ് അൽ അൻസാരി പറഞ്ഞിരുന്നു.