വാഷിങ്ടണ്: യു.എസിന്റെ 47-ാം പ്രസിഡന്റായി ഡൊണാള്ഡ് ട്രംപ് സത്യപ്രതിജ്ഞ ചെയ്ത് അധികാരമേറ്റു. തലസ്ഥാനമായ വാഷിങ്ടണ് ഡി.സിയിലെ യു.എസ്. ക്യാപിറ്റോള് മന്ദിരത്തിലെ റോട്ടന്ഡ ഹാളില് നടന്ന ചടങ്ങില് ചീഫ് ജസ്റ്റിസ് ജോണ് റോബര്ട്സ് സത്യവാചകം ചൊല്ലിക്കൊടുത്തു. 1861-ല് എബ്രഹാം ലിങ്കണ് സത്യപ്രതിജ്ഞയ്ക്ക് ഉപയോഗിച്ച ബൈബിളും 1955-ല് തന്റെ അമ്മ നല്കിയ ബൈബിളും തൊട്ടായിരുന്നു ട്രംപിന്റെ സത്യപ്രതിജ്ഞ. വൈസ് പ്രസിഡന്റ് ജെ.ഡി. വാന്സും സത്യപ്രതിജ്ഞ ചെയ്തു.
സ്ഥാനമൊഴിയുന്ന പ്രസിഡന്റ് ജോ ബൈഡന്, സ്ഥാനമൊഴിയുന്ന വൈസ് പ്രസിഡന്റ് കമല ഹാരിസ്, ഇന്ത്യന് വിദേശകാര്യ മന്ത്രി എസ്.ജയശങ്കര്, മുന് യു.എസ് പ്രസിഡന്റുമാരായ ബില് ക്ലിന്റണ്, ജോര്ജ് ബുഷ്, ബരാക്ക് ഒബാമ, ഹിലരി ക്ലിന്റണ്, ടെസ്ല സി.ഇ.ഒ ഇലോണ് മസ്ക്, ആമസോണ് സി.ഇ.ഒ ജെഫ് ബെസോസ്, മെറ്റ സി.ഇ.ഒ മാര്ക്ക് സക്കര്ബര്ഗ്, ആപ്പിള് സി.ഇ.ഒ ടിം കുക്ക്, ഓപ്പണ് എ.ഐ സി.ഇ.ഒ സാം ആള്ട്ട്മാന്, ആല്ഫാബെറ്റ് സി.ഇ.ഒ സുന്ദര് പിച്ചൈ, ഹംഗറിയുടെ പ്രധാനമന്ത്രി വിക്തോര് ഓര്ബന്, അര്ജന്റീന പ്രസിഡന്റ് ഹാവിയേര് മിലേയ്, ചൈനീസ് വൈസ് പ്രസിഡന്റ് ഹാന് ഷെങ്, ഇറ്റാലിയന് പ്രസിഡന്റ് ജോര്ജിയ മെലോണി, എല്സാല്വദോര് പ്രസിഡന്റ് നയീബ് ബുക്കേലെ, റിലയന്സ് ചെയര്മാന് മുകേഷ് അംബാനി, ഭാര്യ നിത അംബാനി തുടങ്ങി ലോകനേതാക്കന്മാരും സമ്പന്നരും ഉള്പ്പടെ നിരവധി പ്രമുഖര് സത്യപ്രതിജ്ഞ ചടങ്ങില് പങ്കെടുത്തു.
2016-ന് ശേഷം 2024-ലും പ്രസിഡന്റ് സ്ഥാനത്തേക്ക് എത്തുന്നതോടെ തുടര്ച്ചയായി അല്ലാതെ രണ്ടു തവണ പ്രസിഡന്റാകുന്ന രണ്ടാമനായി ട്രംപ് മാറി. 1885 മുതല് 1889 വരേയും 1893 മുതല് 1897 വരേയും അധികാരത്തിലിരുന്ന ഗ്രോവന് ക്ലീവ്ലാന്ഡായിരുന്നു മുന്പ് ഈ റെക്കോര്ഡിന് ഉടമ. 2016-ല് ഡെമോക്രാറ്റിക് സ്ഥാനാര്ഥി ഹിലരി ക്ലിന്റനെ പരാജയപ്പെടുത്തിയാണ് റിപ്പബ്ലിക്കനായ ട്രംപ് അമേരിക്കയുടെ 45-ാമത് പ്രസിഡന്റാകുന്നത്. അമേരിക്കയുടെ ചരിത്രത്തില്, അധികാരമേറ്റ ഏറ്റവും പ്രായം കൂടിയ പ്രസിഡന്റുമാരില് ഒരാളാണ് അദ്ദേഹം.
2020-ല് തുടര്ഭരണ സാധ്യത തേടി മത്സരിച്ചെങ്കിലും 232-നെതിരേ 306 ഇലക്ടറല് കോളേജ് വോട്ടിന് ജോ ബൈഡന് മുന്പില് അടിയറ പറയേണ്ടിവന്നു. 2016-ല് ട്രംപ് ഇലക്ടറല് കോളേജ് വോട്ടിന്റെ ബലത്തിലാണ് അമേരിക്കയുടെ പ്രഥമ പൗരനായതെങ്കില് ഇത്തവണ ഇലക്ടറല് കോളേജിന് പുറമേ, പോപ്പുലര് വോട്ടുകളും സെനറ്റും നേടിയാണ് ഇത്തവണ ട്രംപ് അധികാരത്തിലെത്തുന്നത്. സ്ഥാനമൊഴിഞ്ഞ വൈസ്. പ്രസിഡന്റും ഇന്ത്യന് വംശജയുമായ കമല ഹാരിസിനെയാണ് മൃഗീയ ഭൂരിപക്ഷത്തില് ട്രംപ് പരാജയപ്പെടുത്തിയത്.
Content Highlights: donald trump Inauguration
Published: 20 Jan 2025, 10:30 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented