200 രൂപകൊണ്ട് ജീവിക്കാനാവുമോ? ഞങ്ങളത് പഠിക്കുകയാണ്| കാണാമറയത്തെ ഉരുള്‍ ജീവിതങ്ങള്‍

ഇരുന്നൂറ് രൂപകൊണ്ട് നിങ്ങള്‍ക്ക് എത്രദിവസം കഴിയാനാവും

ഈ ഇരുന്നൂറ് രൂപ കണ്ടോ രാവിലെ വീട്ടില്‍ നിന്നിറങ്ങുമ്പോള്‍ വണ്ടിക്ക് എണ്ണയടിക്കാന്‍ പോക്കറ്റിലെടുത്തു സൂക്ഷിച്ചതാണ്. ഇപ്പോ സമയം വൈകുന്നേരം മൂന്ന് മണിയോട് അടുക്കാറായി. എന്തെങ്കിലും ഓട്ടം കിട്ടിപ്പോവുമ്പോള്‍ എണ്ണയടിക്കാമല്ലോ എന്ന് കരുതി ഇതുവരെ പോക്കറ്റില്‍ തന്നെ എടുത്തുവെച്ചതാണ്. പക്ഷേ, ഇതുവരെ ഒറ്റ ഓട്ടവും കിട്ടിയില്ല. രാവിലെ ഒമ്പത് മണിക്ക് വീട്ടില്‍ നിന്നിറങ്ങിയതാണ്. തന്റെ പോക്കറ്റിലെ 200 രൂപ പുറത്ത് കാണച്ച് ഓട്ടോ ഡ്രൈവര്‍ നിഷാദ് പറയുന്നു. നിങ്ങള്‍ക്ക് ഒരു ദിവസം കഴിയാന്‍ എത്ര രൂപ വേണ്ടി വരും. ഇതാണ് ഇന്ന് ഓരോ ചൂരല്‍മലക്കാരന്റേയും അവസ്ഥ. പ്രത്യക്ഷത്തില്‍ എല്ലാം ശരിയാവുന്നു എന്ന് പറയുമ്പോഴും കുടുംബത്തില്‍ പുരുഷന്‍മാര്‍ മാത്രം ജോലിക്ക് പോയിരുന്ന ഭൂരിഭാഗം വീട്ടുകാരുടേയും അവസ്ഥ ഇതാണ്. എല്ലാവരുമെത്തി വീട് കിട്ടിയതിനെ കുറിച്ചും സര്‍ക്കാര്‍ സഹായത്തെ കുറിച്ചുമെല്ലാം മാത്രമാണ് സംസാരിക്കുന്നത്. അതിനപ്പുറമുള്ള ഇന്നും ശരിയാവാത്ത ജീവിതങ്ങളെ കുറിച്ച് ആരും ചര്‍ച്ച ചെയ്യുന്നില്ല. അവര്‍ എങ്ങനെ കഴിയുന്നുവെന്ന് ആര്‍ക്കുമറിയില്ല.

നേരത്തെയൊക്കെ ടൂറിസ്റ്റുകളെകൊണ്ടും മറ്റ് വിരുന്നകാരെ കൊണ്ടും വെള്ളാര്‍മല സ്‌കൂളിലെ കുട്ടികളെ കൊണ്ടുമല്ലാം നിറഞ്ഞിരുന്നതായിരുന്നു ചൂരല്‍മല അങ്ങാടി. അവരായിരുന്നു ഞങ്ങളുടെ വരുമാനവും. അല്ലലില്ലാതെ ജീവിച്ചവര്‍. ജീവന്‍ നഷ്ടപ്പെട്ടതിനെ കുറിച്ച് മാത്രം എല്ലാവരും പറയുമ്പോള്‍ ബാക്കിയുള്ളവര്‍ എങ്ങനെ അതിജീവിച്ചുപോവുന്നുവെന്ന് ആരുമറിയാത്ത ആരോടും പറയാനാവാത്ത സങ്കടമാണ്. ഇന്ന് ചൂരല്‍മല അങ്ങാടിയില്‍ കുറച്ച് പോലീസുകാരും ഓന്നോ രണ്ടോ കടകളും മാത്രമാണുള്ളത്. ഇവിടം വെറും ശവപ്പറമ്പായി. നമുക്കെല്ലാം സാഹചര്യങ്ങളോട് പെട്ടെന്ന് പൊരുത്തപ്പെടാനാവും. പക്ഷേ, വീട്ടിലെ കുഞ്ഞുങ്ങള്‍ അങ്ങനെയല്ല. അവര്‍ എല്ലാം പെട്ടെന്ന് മറക്കും. അവര്‍ നേരത്തെ ജീവിച്ച് പോരുന്ന തരത്തില്‍, അല്ലെങ്കില്‍ അവര്‍ക്ക് കിട്ടേണ്ട കാര്യങ്ങള്‍ കിട്ടിയില്ലെങ്കില്‍ സങ്കടമാവും. ഇതെല്ലാം വീട്ടിലുള്ള പുരുഷന്‍മാരുടെ തീരാത്ത നോവാണ്. പറഞ്ഞറിയിക്കാനാവാത്ത സങ്കടമാണ്.

ഈ കിട്ടുന്ന ഇരുന്നൂറ് രൂപ കൊണ്ട് എങ്ങനെയാണ് ഞങ്ങള്‍ മുന്നോട്ട് പോവുക. ദുരന്തം കഴിഞ്ഞ ശേഷം ഇവിടെ ഒരു പത്ത് ഓട്ടോറിക്ഷകളാണ് ഓടാനെത്തുന്നത്. ബാക്കിയുള്ളവര്‍ സ്‌പെഷ്യല്‍ പെര്‍മിറ്റില്‍ മേപ്പാടി ഓടുന്നു. മൂന്നൂറ് രൂപയില്‍ കൂടുതല്‍ ഓട്ടം കിട്ടിയ ദിവസം ഇതുവരെയുണ്ടായിട്ടില്ല. സ്വന്തമായി ഓട്ടോ ഉണ്ട് എന്ന പേരില്‍ സര്‍ക്കാര്‍ സഹായത്തിനും പുറത്താണ്. മറ്റെവിടെയുമിട്ട് ഓടാനുള്ള സാഹചര്യവുമില്ല. ഇതൊക്കെ പറയുമ്പോള്‍ അതിലും വലതല്ലേ വീടും കുടുംബാംഗങ്ങളും നഷ്ടപ്പെട്ടവരുടെ അവസ്ഥയെന്ന് തോന്നാം. പക്ഷേ, ജീവന്‍ തിരിച്ചുകിട്ടിയവരുടെ മുന്നോട്ട് പോക്ക് കഴിഞ്ഞ ഒരു വര്‍ഷമായി ഇങ്ങനെയാണ്. മാനസികമായും സാമ്പത്തികമായും തകര്‍ന്ന് പോയവര്‍. പലരും ലോണെടുത്തും മറ്റുമൊക്കെയാണ് വണ്ടി വാങ്ങി ഓട്ടം തുടങ്ങിയത്. വീടിന്റെ ലോണും കുട്ടികളുടെ പഠിപ്പുമൊക്കെ എല്ലാം പാതിവഴിയിലായി. ഞങ്ങളുടെ വീടുകളിലെല്ലാം ഭൂരിഭാഗവും പുരുഷന്‍മാര്‍ മാത്രമാണ് ജോലിക്ക് പോയിരുന്നത്. അത്തരക്കാരാണ് എവിടേയും എത്താനാവാതെ പോവുന്നതും. നമ്മള്‍ ഒറ്റപ്പെട്ടവരെ കുറിച്ച് എപ്പോഴും പറയില്ലേ... പക്ഷേ, ആരും കാണാതെ പോവുകയാണ് ഞങ്ങളെ പോലുള്ളവരുടെ സങ്കടം, അവരുടെ അതിജീവനം.  

ഇത് നിഷാദിന്റെയും ഷംസീറിന്റെയും നൗഫലിന്റെയും വേലപ്പന്റെയും മാത്രം അവസ്ഥയല്ല. ടൗണ്‍ഷിപ്പെന്ന വാഗ്ദാനവും സഹായവുമെല്ലാം ഒരുവഴിക്ക് നടക്കുമ്പോഴും പഴയ ജീവിതത്തിലേക്ക് ഇന്നുമവര്‍ക്ക് തിരിച്ചെത്താനായിട്ടില്ല. ജോലിയും കൂലിയുമില്ലാത്തവരായി ചൂരല്‍മലയിലെയും മുണ്ടക്കൈയിലെയും ജനങ്ങള്‍ മാറി. സാങ്കേതികത്വത്തില്‍ കുടുങ്ങി സഹായങ്ങള്‍ കിട്ടാതെ, കിടപ്പാട ലിസ്റ്റില്‍ പെടാതെ പോയവര്‍ ഇന്നും നിസ്സഹായാരാണ്. പ്രത്യക്ഷത്തില്‍ എല്ലാം ശരിയാവുന്നുവെന്ന പ്രതീതിയുണ്ടാവുമ്പോഴും ഒരുപാട് ജീവിതങ്ങളാണ് ഒന്നുമല്ലാതായി പോയത്. അവരെ ഇനിയും ചേര്‍ത്തുപിടിക്കുക തന്നെ വേണം.

മകള്‍, വീട്, ജീവിതമാര്‍ഗം|  ഉരുളെടുത്ത നഷ്ടത്തില്‍ തിരിച്ചു കയറാനാവാതെ സുരേഷ്

ഒരുവര്‍ഷത്തിനപ്പുറത്തെ അര്‍ധരാത്രി, അന്ന് ഇരുട്ടിന്റെ മറപിടിച്ചെത്തിയ പ്രളയജലം തൂത്തെറിഞ്ഞു കളഞ്ഞത് ചൂരല്‍മലക്കാരന്‍ സുരേഷിന്റെ സ്വപ്നങ്ങളും ജീവിതവുമാണ്. ഭാര്യക്കും മകള്‍ക്കുമൊപ്പം ഒരുമിച്ച് കിടുന്നുറങ്ങിയ ആ രാത്രിയിലെ മഴ അന്ന് സംഹാരരൂപം പൂണ്ടപ്പോള്‍  ചെളിയില്‍ നിന്ന് പറിച്ചെടുത്ത ജീവനുകളില്‍ ഒഴുകിയില്ലാതായിപ്പോയത് തന്റെ പ്രിയപ്പെട്ട മകള്‍. രണ്ടാം ദിനം കോഴിക്കോട്ട് സോഫ്റ്റ് വെയര്‍ എന്‍ജിനിയര്‍ ജോലിക്ക് കയറേണ്ടവള്‍. ജീവന്റെ തുടിപ്പു തേടിയിറങ്ങിയവര്‍ക്ക്  മകളുടെ ജീവനറ്റ ശരീരം  കിട്ടിയത് പോത്തുകല്ലില്‍ വെച്ച്. ഒരായുഷ്‌കാലം സ്വരുക്കൂട്ടിയതും സ്വന്തമെന്ന് കരുതിയതുമെല്ലാം  പ്രളയജലമന്ന് ചിതറിത്തെറുപ്പിച്ചു കളഞ്ഞു.  മറ്റ് രണ്ട് പെണ്‍മക്കള്‍ ദുരന്ത ദിനം വീട്ടിലില്ലാത്തത് കൊണ്ടുമാത്രം ജീവന്‍ തിരിച്ചുകിട്ടി. 

കാല്‍നൂറ്റണ്ടോളമുള്ള അധ്വാനം, ഒടുവിലുയര്‍ന്ന കുഞ്ഞുവീട്. അതാണ് മണ്ണിനടിയിലായത്. താങ്ങാവേണ്ട മകളും ഇരമ്പിയൊഴുകി വന്ന ഉരുളിന്റെ ശക്തിയറിഞ്ഞു. ഇന്ന് ചൂരല്‍മല ടൈലറിംഗ് എന്ന ബോര്‍ഡ് വെച്ച് വാടക ക്വാര്‍ട്ടേഴ്‌സിലും മേപ്പാടി ടൗണിലുമായി അതിജീവനത്തിന്റെ മെഷീന്‍ ചക്രങ്ങള്‍ വീണ്ടും ചവിട്ടുമ്പോഴും പിടിച്ച് നില്‍ക്കാനാവാതെ തളര്‍ന്ന് പോവുന്നു സുരേഷും കുടുംബവും. സര്‍ക്കാരിന്റെ ടൗണ്‍ഷിപ്പില്‍ ഇടം കിട്ടിയിട്ടുണ്ട്. പക്ഷെ അതിനപ്പുറമുള്ള നഷ്ടത്തെ കൈവിട്ടുപോയ ജീവിതത്തെ ഇവര്‍ക്ക് തിരിച്ചുപിടിക്കാനാവുന്നില്ല

മൂക്കോളം മുങ്ങിയ കട്ടച്ചെളിയില്‍ നിന്ന് ജീവിതത്തിലേക്ക് പിടിച്ചുകയറിയെങ്കിലും ആ അച്ഛന്റേയും അമ്മയുടേയും മാനസിക നിലതന്നെ തളര്‍ന്നുപോയി. നീണ്ടകാലത്തെ ആശുപത്രിവാസം, തീരാകണ്ണീര്‍, പറഞ്ഞറിയിക്കാനാവാത്ത നഷ്ടം. ചൂരല്‍മല ടൈലറിംഗ് എന്ന ബോര്‍ഡ് കാണുമ്പോള്‍ കയറിവരുന്നവര്‍ മാത്രമാണ് ഇന്ന് സുരേഷിന്റെ കടയിലെ ആവശ്യക്കാര്‍. താങ്ങാനാവാത്ത സാമ്പത്തിക ബാധ്യതയില്‍ ജീവിതം തന്നെ സ്തംഭിച്ച് നില്‍ക്കുമ്പോഴും വീടിന് മുന്നിലെ ആ മാലിന്യമലയിറങ്ങി അതിജീവന മാര്‍ഗം തേടുന്നു സുരേഷ്. പഴയ ജീവിതത്തെ തിരിച്ച് പിടിക്കാന്‍ ഒരുവര്‍ഷത്തിനിപ്പുറവും തുണിസഞ്ചിയും കൈയിലേന്തി നടന്നു നീങ്ങുന്നു ഈ അച്ഛന്‍.