കോഴിക്കോട്: കോഴിക്കോട് എൻ.ഐ.ടിയിൽ കെ.എസ്.യു. പ്രവർത്തകരും പോലീസും തമ്മിൽ സംഘർഷം. ഗാന്ധി രക്തസാക്ഷി ദിനത്തിൽ ഗോഡ്സെയെ പ്രകീർത്തിച്ച് രംഗത്തെത്തിയ പ്രൊഫസർ ഷൈജ ആണ്ടവനെ ഡീൻ ആക്കി സ്ഥാനക്കയറ്റം നൽകിയ നടപടിക്കെതിരേയാണ് കെ.എസ്.യു. പ്രതിഷേധം. കെ.എസ്.യു. പ്രവർത്തകർക്ക് നേരെ പോലീസ് ലാത്തിച്ചാർജ്ജ് നടത്തി.

To advertise here,

നാല് മണിയോടെയായിരുന്നു കെ.എസ്.യു. പ്രവർത്തകർ എൻ.ഐ.ടിയിലേക്ക് മാർച്ച് നടത്തിയത്. ബാരിക്കേഡ് കടന്ന എൻ.ഐ.ടിയുടെ അകത്തേക്ക് പ്രവേശിക്കാൻ ശ്രമിക്കവെയാണ് പ്രതിഷേധക്കാരും പോലീസും തമ്മിൽ വാക്കേറ്റമുണ്ടാകുന്നത്. പിന്നീട് പ്രതിഷേധക്കാർക്കെതിരേ പോലീസ് ലാത്തി വീശുകയായിരുന്നു. പിരിഞ്ഞു പോകാത്ത പ്രതിഷേധക്കാരെ റോഡിലൂടെ വലിച്ചിഴച്ച് അറസ്റ്റ് ഉൾപ്പെടെയുള്ള നടപടികളിലേക്ക് പോലീസ് കടന്നത്. 50-ഓളം പ്രവർത്തകരെ അറസ്റ്റ് ചെയ്ത് നീക്കി. 

2024 ജനുവരിയിൽ, ഗാന്ധിജിയുടെ രക്തസാക്ഷിത്വദിനത്തിൽ ‘ഹിന്ദുമഹാസഭാ പ്രവർത്തകനായ നാഥുറാം വിനായക് ഗോഡ്സെ ഭാരതത്തിലെ ഒരുപാടുപേരുടെ ഹീറോ’ എന്ന കുറിപ്പോടെ അഡ്വക്കേറ്റ് കൃഷ്ണരാജ് എന്ന പ്രൊഫൈലിൽനിന്നും പോസ്റ്റുചെയ്ത ഗോഡ്സെയുടെ ചിത്രത്തിനുതാഴെയാണ് ഷൈജ ആണ്ടവൻ കമൻറിട്ടത്. ‘ഗോഡ്സെ, ഇന്ത്യയെ രക്ഷിച്ചതിൽ അഭിമാനമുണ്ട്’ എന്നായിരുന്നു ഷൈജ ആണ്ടവന്റെ കമൻറ്. സംഭവം വിവാദമായതോടെ ഇവർ കമൻറ് പിൻവലിക്കുകയായിരുന്നു.

എ.ബി.വി.പി. ഉൾപ്പെടെയുള്ള വിദ്യാർഥി-യുവജന സംഘടനകൾ രംഗത്തെത്തിയതോടെ പോലീസ് കേസെടുത്ത് അന്വേഷണമാരംഭിക്കുകയായിരുന്നു. വിദ്യാർഥി-യുവജന സംഘടനകളുടെ വൻപ്രതിഷേധത്തെത്തുടർന്ന് കുന്ദമംഗലം പോലീസ് കേസെടുത്ത് അറസ്റ്റുചെയ്ത് ജാമ്യത്തിൽ വിടുകയായിരുന്നു.