തിരുവനന്തപുരം: സംസ്ഥാനത്തെ ജില്ലാ, താലൂക്ക് ആശുപത്രികളിൽ നഴ്‌സിങ് കോളേജുകൾ ആരംഭിക്കുമെന്ന് മുഖ്യമന്ത്രി വി.ഡി. സതീശൻ പ്രഖ്യാപിച്ചു. പ്രാരംഭഘട്ടത്തിൽ ഷിഫ്റ്റ് അടിസ്ഥാനത്തിൽ നടപ്പിലാക്കും. ബി.എസ്‌സി. നഴ്‌സിങ്ങും അനുബന്ധകോഴ്‌സുകളും ആരംഭിക്കുന്നതിന് ഒരു വർഷത്തിനുള്ളിൽ ആശുപത്രികളിൽ സൗകര്യമൊരുക്കും.

To advertise here,

കേരള ഗവ. നഴ്‌സസ് യൂണിയൻ (കെ.ജി.എൻ.യു.) 38-ാം സംസ്ഥാന പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. നഴ്‌സിങ് സീറ്റുകൾ 50 ശതമാനം വർധിപ്പിക്കും. ആറുമാസ ഇന്റേൺഷിപ്പ് പരിശീലനം പരിഷ്കരിക്കും. നഴ്സിങ് സർവകലാശാല യാഥാർഥ്യമാക്കും. രോഗികളുടെയും നഴ്‌സുമാരുടെയും അനുപാതം ക്രമീകരിക്കാനായി പുതിയ തസ്തികകൾ സൃഷ്ടിക്കുമെന്നും അദ്ദേഹം അറിയിച്ചു.

മന്ത്രി കെ. മുരളീധരൻ മുഖ്യപ്രഭാഷണം നടത്തി. കെ. കരുണാകരൻ മെമ്മോറിയൽ മെഡിക്കൽ കോളേജിന്റെ പ്രാരംഭപ്രവർത്തനങ്ങൾക്ക് മുഖ്യമന്ത്രി ആറുകോടി രൂപ അനുവദിച്ചതായി അദ്ദേഹം അറിയിച്ചു. രണ്ടുമാസത്തിനുള്ളിൽ തൃശ്ശൂർ മെഡിക്കൽ കോളേജിൽ പെറ്റ് സ്കാന്റെ പ്രവർത്തനവും തിരുവനന്തപുരം മെഡിക്കൽ കോളേജിൽ റോബോട്ടിക് സർജറിയും ആരംഭിക്കുമെന്നും അദ്ദേഹം പ്രഖ്യാപിച്ചു.

സംസ്ഥാന പ്രസിഡന്റ് കെ.എസ്. സന്തോഷ് അധ്യക്ഷത വഹിച്ചു. എം.എൽ.എ.മാരായ എൻ. ശക്തൻ, എം.ആർ. ബൈജു, കോൺഗ്രസ് നേതാവ് വി.എസ്. ശിവകുമാർ, കെ.പി.സി.സി. ജനറൽ സെക്രട്ടറി കെ.എസ്. ശബരീനാഥൻ, കെ.ജി.എൻ.യു. സംസ്ഥാന പ്രസിഡന്റ് കെ.എസ്. സന്തോഷ്, ജനറൽ സെക്രട്ടറി എസ്.എം. അനസ്, ഭാരവാഹികളായ ദിനേശ് ചന്ദന, എൽ. ആശ, ടി.എസ്. ബിന്ദു, ജോസ്മി ജോർജ് എന്നിവർ സംസാരിച്ചു.