പുതിയ നിപ കേസുകളില്ല; ; മരുന്നിന് ക്ഷാമമില്ല, ശക്തമായ നടപടികൾ എടുത്തിട്ടുണ്ടെന്ന് ആരോഗ്യമന്ത്രി

കോഴിക്കോട്: സംസ്ഥാനത്തെ നിപ പ്രതിരോധ പ്രവർത്തനങ്ങളെക്കുറിച്ച് വിശദീകരണവുമായി ആരോഗ്യ മന്ത്രി കെ. മുരളീധരൻ. വൈറസ് ബാധിച്ച വ്യക്തിയുടെ ആരോഗ്യനില ഗുരുതരമായി തുടരുകയാണെന്നും നിലവിൽ വെന്റിലേറ്ററിലാണെന്നും മന്ത്രി പറഞ്ഞു.

ചികിത്സയുടെ ഭാഗമായി പത്താം തീയതി രാത്രി കോഴിക്കോട് മെഡിക്കൽ കോളേജിലേക്ക് മാറ്റിയത് മുതൽ രോഗിക്ക് റിബാവറിൻ മരുന്ന് നൽകുന്നുണ്ട്. ഇതിനുപുറമെ, ജൂൺ 12-ന് മോണോക്ലോണൽ ആന്റിബോഡിയുടെ ആദ്യ ഡോസും നൽകി. ഇന്ത്യയിൽ സ്റ്റോക്ക് ഇല്ലാതിരുന്ന റെംഡെസിവിർ മരുന്ന് ആരോഗ്യവകുപ്പ് അഡീഷണൽ സെക്രട്ടറി രേണുവിന്റെ ഇടപെടലിലൂടെ ബഹ്‌റൈനിൽനിന്ന് കണ്ണൂരിലെത്തിച്ചു. ഇതിൻ്റെ ആദ്യ ഡോസ് ഞായറാഴ്ച രോഗിക്ക് നൽകിയിട്ടുണ്ട്.

നിലവിൽ പുതിയ കേസുകളൊന്നും റിപ്പോർട്ട് ചെയ്തിട്ടില്ല. സമ്പർക്കപ്പട്ടികയിലുള്ള രോഗലക്ഷണങ്ങൾ പ്രകടിപ്പിച്ച 11 പേരുടെ പരിശോധനാഫലം നെഗറ്റീവാണ്. ഇതുവരെ ആകെ 30 പരിശോധനകൾ നടത്തിയതിൽ രോഗിയുടേതൊഴികെ ബാക്കി 29 എണ്ണവും നെഗറ്റീവാണ്. നിലവിൽ 100 പേരാണ് സമ്പർക്കപ്പട്ടികയിലുള്ളത്. ഇതിൽ നാല് പേർ ഹൈ റിസ്ക് വിഭാഗത്തിലും 82 പേർ ലോ റിസ്ക് വിഭാഗത്തിലുമാണ്. സമ്പർക്കപ്പട്ടികയിൽ 44 ആരോഗ്യപ്രവർത്തകരും ഉൾപ്പെടുന്നുണ്ടെന്ന് മന്ത്രി അറിയിച്ചു.

രോഗബാധ റിപ്പോർട്ട് ചെയ്ത രാമനാട്ടുകര മുൻസിപ്പാലിറ്റിയിലെ അഞ്ചാം ഡിവിഷനിൽ 320 വീടുകളിലായി 1047 പേരെ സർവേ നടത്തിയതിൽ ആർക്കും നിലവിൽ നിപ ലക്ഷണങ്ങളില്ലെന്ന് കണ്ടെത്തി. നിരീക്ഷണത്തിൽ കഴിയുന്നവർക്ക് തദ്ദേശ സ്വയംഭരണ സ്ഥാപനങ്ങളുടെ സഹായത്തോടെ ഭക്ഷണവും മറ്റ് അവശ്യസാധനങ്ങളും വീടുകളിൽ എത്തിക്കുന്നുണ്ട്.

സംസ്ഥാനത്ത് ജനുവരി മുതൽ ഇതുവരെ ആകെ 135 ഷിഗെല്ല കേസുകൾ സ്ഥിരീകരിച്ചതായി മന്ത്രി അറിയിച്ചു. രോഗബാധയെത്തുടർന്ന് മൂന്ന് മരണങ്ങളാണ് റിപ്പോർട്ട് ചെയ്തത്.  ഇതിൽ രണ്ട് മരണങ്ങൾ കോഴിക്കോട് ജില്ലയിലാണ്. നിലവിൽ നാല് കുട്ടികൾ ഐസിയുവിൽ ചികിത്സയിലുണ്ട്. ഇതിൽ രണ്ട് പേരുടെ നില ഗുരുതരമാണ്. രോഗബാധിതരിൽ 68 പേർ കോഴിക്കോട് ജില്ലയിലാണ്. വയനാട് (16), തിരുവനന്തപുരം (14), മലപ്പുറം (13), കൊല്ലം (6), ആലപ്പുഴ (6), തൃശൂർ (4), ഇടുക്കി (3), എറണാകുളം (2), കണ്ണൂർ (2), കോട്ടയം (1) എന്നിങ്ങനെയാണ് മറ്റ് ജില്ലകളിലെ കണക്കുകൾ.

ഷിഗെല്ല പ്രതിരോധത്തിനായി ജൂൺ ആദ്യവാരം മുതൽ 'സ്റ്റോപ്പ് ഡയറിയ' ക്യാമ്പയിൻ നടത്തുന്നുണ്ട്. ജലസ്രോതസ്സുകളുടെ ക്ലോറിനേഷൻ ഊർജിതമാക്കാനും വിദ്യാലയങ്ങളിലെ കിണറുകൾ പരിശോധിക്കാനും ഹോട്ടൽ പരിശോധന കർശനമാക്കാനും നിർദേശം നൽകിയിട്ടുണ്ട്. ഭക്ഷണത്തിന് മുമ്പും ശുചിമുറി ഉപയോഗിച്ച ശേഷവും കൈകൾ സോപ്പിട്ട് കഴുകുന്നതുൾപ്പെടെയുള്ള വ്യക്തിശുചിത്വം പാലിക്കണമെന്നും ആരോഗ്യവകുപ്പ് നിർദേശം നൽകി.

നിപ വ്യാപനം ഇല്ലാത്തതിനാലും വിവിധ വകുപ്പുകളുടെ ഏകോപനത്തിന് തിരുവനന്തപുരമാണ് കൂടുതൽ സൗകര്യമെന്നതിനാലുമാണ് കോഴിക്കോട്ട് നേരിട്ട് എത്താത്തതെന്നും അതിൽ പ്രതിപക്ഷം വിമർശിക്കേണ്ട കാര്യമില്ലെന്നും മന്ത്രി അറിയിച്ചു. സർക്കാരുമായി പൂർണമായി സഹകരിക്കാത്തതിനാലാണ് ഡി.എച്ച്.എസ്സിനെ മാറ്റിയതെന്നും മന്ത്രി വ്യക്തമാക്കി.