കൊച്ചി: സംസ്ഥാനത്തെ വിവിധ സഹകരണ ബാങ്കുകൾ കേന്ദ്രീകരിച്ച് എൻഫോഴ്സ്മെന്റ് ഡയറക്ടറേറ്റ് (ഇ.ഡി.) റെയ്ഡ് ആരംഭിച്ചു. എറണാകുളം, തൃശ്ശൂർ, കോഴിക്കോട് ജില്ലകളിലാണ് വിവിധ സംഘങ്ങളായി ഇ.ഡി. പരിശോധന മുന്നോട്ട് കൊണ്ടുപോകുന്നത്. കള്ളപ്പണം വെളുപ്പിക്കൽ തടയൽ നിയമപ്രകാരം (പി.എം.എൽ.എ.) എടുത്ത കേസുകളിലാണ് ഇ.ഡി.യുടെ ഈ പരിശോധന നടക്കുന്നത്.

To advertise here,

ബാങ്കുകളുമായി ബന്ധപ്പെട്ട കേസുകളിൽ നേരത്തെ ഉൾപ്പെടുകയും അറസ്റ്റിലാവുകയും ചെയ്തവരുടെ വീടുകളിലും അവരുമായി ബന്ധപ്പെട്ട കേന്ദ്രങ്ങളിലുമാണ് പരിശോധന പ്രധാനമായും നടക്കുന്നത്. കരുവന്നൂർ കള്ളപ്പണ ഇടപാട് കേസ് പുറത്തുവന്നതിന് പിന്നാലെ സഹകരണ ബാങ്കുകളിലെ തട്ടിപ്പുകൾ സംബന്ധിച്ച് നിരവധി പരാതികൾ ഇ.ഡി.ക്ക് ലഭിച്ചിരുന്നു. ഇതിന്റെ അടിസ്ഥാനത്തിൽ നിരവധി സഹകരണ ബാങ്കുകൾ ഇ.ഡി.യുടെ നിരീക്ഷണത്തിലാവുകയും, പോലീസ് രജിസ്റ്റർ ചെയ്ത കേസുകൾക്ക് പിന്നാലെ ഇ.ഡി. കേസ് എടുത്ത് അന്വേഷണം നടത്തുകയുമായിരുന്നു.

എറണാകുളത്ത് അങ്കമാലി അർബൻ സഹകരണ സംഘത്തിലും അതിനോട് അനുബന്ധിച്ചുള്ള കേന്ദ്രങ്ങളിലുമാണ് എൻഫോഴ്സ്മെന്റ് ഡയറക്ടറേറ്റ് പരിശോധന നടത്തുന്നത്. അങ്കമാലി അർബൻ സഹകരണ സംഘത്തിൽ തട്ടിപ്പ് നടന്ന സമയത്ത് അങ്കമാലി, കാലടി പ്രദേശങ്ങളിലെ പ്രാദേശിക കോൺഗ്രസ് നേതാക്കളായിരുന്നു ബാങ്ക് ഭരണസമിതിയിലുണ്ടായിരുന്നത്. ഇവരിൽ പലരും കേസിൽ പ്രതികളാവുകയും ചെയ്തിട്ടുണ്ട്.

എറണാകുളത്തിനും തൃശ്ശൂരിനും പുറമേ, കോഴിക്കോട് ഇ.ഡി. യൂണിറ്റിന്റെ നേതൃത്വത്തിൽ ഏഴോളം കേന്ദ്രങ്ങളിൽ റെയ്ഡ് പുരോഗമിക്കുന്നുണ്ട്. 32 കോടിയോളം രൂപയുടെ തട്ടിപ്പ് നടന്നെന്ന പരാതിയെത്തുടർന്നാണ് തൃശ്ശൂർ കുട്ടനെല്ലൂർ സഹകരണ ബാങ്കിൽ ഇ.ഡി. പരിശോധന നടക്കുന്നത്. രാവിലെ ബാങ്കിലെത്തിയ ഇ.ഡി. സംഘം പരിശോധന തുടരുകയാണ്. കുട്ടനെല്ലൂർ ബാങ്കിന് പുറമേ തൃശ്ശൂർ ജില്ലയിൽ നാലിടങ്ങളിലായി ഇ.ഡി. റൈഡ് നടത്തുന്നുണ്ട്.

കരുവന്നൂർ സഹകരണ ബാങ്കിൽ നടന്ന തട്ടിപ്പിന് സമാനമായ രീതിയിലാണ് കുട്ടനെല്ലൂരിലും ക്രമക്കേടുകൾ നടന്നിട്ടുള്ളതെന്നാണ് ലഭ്യമാകുന്ന വിവരം. ബിനാമി പേരുകളിൽ വായ്പകൾ നൽകുക, വ്യാജരേഖകൾ നിർമ്മിച്ച് വായ്പ അനുവദിക്കുക തുടങ്ങിയവയാണ് ഇവിടെ നടന്ന പ്രധാന തട്ടിപ്പുകളെന്നാണ് വിവരം. മൂല്യം കുറഞ്ഞ ഭൂമി ഈടായി പണയപ്പെടുത്തി ബിനാമികളുടെ പേരിൽ വായ്പകൾ നൽകിയതായും രേഖകളിൽ കൃത്രിമം കാണിച്ചതായും പരാതികളിൽ ചൂണ്ടിക്കാട്ടുന്നു.

2017 മുതൽ ബാങ്കിലുണ്ടായ കിട്ടാക്കടങ്ങൾ സ്ഥാപനത്തെ വലിയ സാമ്പത്തിക പ്രതിസന്ധിയിലാക്കിയിരുന്നു. വലിയ തുക വായ്പയായി നൽകിയതും ആ തുകകൾ തിരിച്ചടവായി ലഭിക്കാതെ പോയതുമാണ് ബാങ്കിനെ പ്രതിസന്ധിയിലാക്കിയത്. ബിനാമി വായ്പകളാണ് കുട്ടനെല്ലൂർ ബാങ്കിന് ഏറ്റവും വലിയ പ്രശ്നമായി നിലനിന്നിരുന്നത്. റിസോർട്ട് ഉടമയായ സുധാകരൻ നൽകിയ പരാതിയിലാണ് തട്ടിപ്പ് വിവരം ആദ്യമായി പുറത്തുവന്നത്. തുടർന്ന് നിരവധി ആളുകൾ സമാന പരാതികളുമായി രംഗത്തെത്തുകയായിരുന്നു.