പാലക്കാട്: ഉപതിരഞ്ഞെടുപ്പില്‍ പാലക്കാട് മണ്ഡലത്തിലുണ്ടായത് കൃഷ്ണകുമാര്‍ വിരുദ്ധ തരംഗമാണെന്ന് ആരോപിച്ച് കോണ്‍ഗ്രസ് നേതാവ് സന്ദീപ് വാര്യര്‍. സ്ഥാനാര്‍ഥി നിര്‍ണയം തന്നെ ബി.ജെ.പിക്ക് തിരിച്ചടിയായെന്നും മുന്‍ ബി.ജെ.പി. പ്രവര്‍ത്തകന്‍ കൂടിയായിരുന്ന സന്ദീപ് വാര്യര്‍ കുറ്റപ്പെടുത്തി. അടിസ്ഥാന വോട്ടുകള്‍ നഷ്ടപ്പെട്ടിട്ടില്ലെന്ന് സ്ഥാനാര്‍ഥിയും ബി.ജെ.പിയും അവകാശപ്പെടുന്നുണ്ടെങ്കിലും ഓരോ ബൂത്തില്‍ നിന്നും 30 മുതല്‍ 50 വരെ കേഡര്‍ വോട്ടുകള്‍ ചോര്‍ന്നിട്ടുണ്ടെന്നും അദ്ദേഹം പറഞ്ഞു. 

To advertise here,

കേരളത്തിലെ ബി.ജെ.പിയെ കൈയടക്കി വെച്ചിരിക്കുന്ന കെ.സുരേന്ദ്രന്‍, വി.മുരളീധരന്‍, കൃഷ്ണകുമാര്‍ എന്നിവരുടെ കോക്കസ് യാതൊരു ജനാധിപത്യ മര്യാദയും പാലിക്കാതെയാണ് കൃഷ്ണകുമാറിനെ സ്ഥാനാര്‍ഥിയാക്കിയത്. സംസ്ഥാനാധ്യക്ഷനായ കെ.സുരേന്ദ്രന്‍ നേരിട്ടാണ് തിരഞ്ഞെടുപ്പ് പ്രചാരണങ്ങള്‍ക്ക് നേതൃത്വം നല്‍കിയതെന്നും ഇതൊക്കെ തന്നെയാണ് ബി.ജെ.പിയുടെ കനത്ത പരാജയത്തിനുള്ള കാരണങ്ങളെന്നും സന്ദീപ് വാര്യര്‍ അഭിപ്രായപ്പെട്ടു.

പാല്‍ സൊസൈറ്റി മുതല്‍ പാര്‍ലമെന്റ് വരെ ഏത് തിരഞ്ഞെടുപ്പ് നടന്നാലും കൃഷ്ണകുമാറിനെ സ്ഥാനാര്‍ഥിയാക്കുന്ന സമയത്ത് ജയിക്കുകയെന്നതല്ല ബി.ജി.പി. ലക്ഷ്യമിടുന്നത്. പകരം കോടിക്കണക്കിന് വരുന്ന തിരഞ്ഞെടുപ്പ് ഫണ്ടുമായി ബന്ധപ്പെട്ട ചില നിഗൂഢലക്ഷ്യങ്ങളാണ് ഇവര്‍ക്കുള്ളത്. ജയിക്കുകയായിരുന്നില്ല കൃഷ്ണകുമാറിന്റെ ലക്ഷ്യം, മറിച്ച് ഞങ്ങള്‍ ജയിക്കുന്നതിന് മുമ്പ് മറ്റൊരാള്‍ ജയിക്കേണ്ട എന്ന ഉദേശത്തോടെയാണ് കൃഷ്ണ കുമാറിനെ സുരേന്ദ്രന്‍ സ്ഥാനാര്‍ഥിയാക്കിയതെന്നും സന്ദീപ് വാര്യര്‍ പറഞ്ഞു.

അച്ചടക്കത്തിന്റെ പേരില്‍ അടിമത്ത മനോഭാവത്തോടെ നില്‍ക്കുന്ന ഒരുകൂട്ടം ആളുകളുടെ കേന്ദ്രമായി ബി.ജെ.പി. മാറി. അതില്‍ ജനാധിപത്യമായി പ്രതികരണങ്ങള്‍ക്ക് അവസരമില്ല. ആത്മവിമര്‍ശനം നടത്തുന്ന സ്വഭാവവും ബി.ജെ.പിക്കില്ലെന്നും സന്ദീപ് പറഞ്ഞു. ഏകാധിപത്യപരമായ ഉത്തരവുകള്‍ അടിച്ചേല്‍പ്പിക്കുക, ഇത് മറ്റുള്ളവര്‍ അന്തമായി അനുസരിക്കുകയെന്നല്ലാതെ ഒരു തരത്തിലുള്ള ജനാധിപത്യപരമായ പ്രവര്‍ത്തനവും ബി.ജെ.പിയില്‍ നടക്കുന്നില്ലെന്നും സന്ദീപ് ആരോപിച്ചു. 

പൊതുജനങ്ങളുടെയോ സാധാരണ പാര്‍ട്ടി പ്രവര്‍ത്തകരുടെയോ അഭിപ്രായം ചോദിക്കുക പോലും ചെയ്യാതെയാണ് കൃഷ്ണകുമാറിനെ സ്ഥാനാര്‍ഥിയായി തീരുമാനിച്ചത്. ഈ അവസരത്തില്‍ അഭിപ്രായം പറയാതിരുന്നവര്‍ തിരഞ്ഞെടുപ്പില്‍ തോറ്റപ്പോള്‍ നേതൃത്വത്തിന്റെ നെഞ്ചത്ത് കയറുന്നതില്‍ കാര്യമില്ല. ഇപ്പോള്‍ നേതൃത്വത്തിനെതിരെ രംഗത്തെത്തിയിട്ടുള്ളവരാരും ആത്മാഭിമാനത്തോടെയും ആര്‍ജവത്തോടെയും അഭിപ്രായം പറയാന്‍ നട്ടെള്ളുവരല്ല. സന്ദീപ് അഭിപ്രായപ്പെട്ടു.

ബി.ജെ.പിക്ക് പറയാന്‍ കഴിയാത്ത കാര്യങ്ങള്‍ സി.പി.എമ്മിനെ കൊണ്ട് പറയിപ്പിക്കുകയാണ്. ഞാന്‍ തള്ളികളഞ്ഞ പ്രസ്താവനങ്ങള്‍ എന്റെ മേല്‍ അടിച്ചേല്‍പ്പിച്ച് മുസ്‌ലീം വിഭാഗത്തിനിടയില്‍ ഭിന്നിപ്പുണ്ടാക്കാന്‍ പരസ്യം കൊടുത്തതിന് പിന്നില്‍ സി.പി.എമ്മിന് പാലക്കാട് ജയിക്കാന്‍ വേണ്ടിയല്ല. മറിച്ച് ബി.ജെ.പിയെ ജയിപ്പിക്കാനുള്ള ക്വട്ടേഷന്‍ പണിയായിരുന്നു അത്. സി.പി.എം.-ബി.ജെ.പി. അന്തര്‍ധാര ഏറ്റവും പ്രകടമായി പുറത്തുവന്ന ഒരു തിരഞ്ഞെടുപ്പ് കൂടിയായിരുന്നു പാലക്കാട്ടേതെന്നും അദ്ദേഹം പറഞ്ഞു.

പാലക്കാട്ടെ ജനങ്ങളെ ഹിന്ദുവെന്നും മുസ്‌ലീമെന്നും ക്രിസ്ത്യാനിയെന്നും വേര്‍തിരിച്ച് വോട്ട് നേടാനുള്ള ശ്രമമാണ് ബി.ജെ.പി. നടത്തിയത്. അതിന് സി.പി.എമ്മിന്റെ സഹായവുമുണ്ടായി. ബി.ജെ.പിക്ക് പറയാന്‍ കഴിയാത്ത വര്‍ഗീയത സി.പി.എമ്മിനെ കൊണ്ടാണ് പറയിപ്പിച്ചത്. അഴിമതി കേസുകള്‍ മറച്ചുവെക്കുന്ന കാര്യത്തിലും പരസ്പരം സഹായിക്കുന്ന കാര്യത്തിലും ബി.ജെ.പിയും സി.പി.എമ്മും തമ്മിലുള്ള അവിശുദ്ധ കൂട്ടുകെട്ട് ജനങ്ങള്‍ക്ക് മനസിലായിട്ടുണ്ടെന്നും സന്ദീപ് പറഞ്ഞു.