ന്യൂ‍ഡൽഹി: പ്രധാനമന്ത്രി നരേന്ദ്രമോദിയെ വീണ്ടും വെല്ലുവിളിച്ച് ലോക്സഭാ പ്രതിപക്ഷ നേതാവ് രാഹുൽ ഗാന്ധി. മാധ്യമപ്രവർത്തകരുമൊത്തുള്ള ദീപാവലി സൽക്കാരത്തിൽ സംസാരിക്കാൻ പ്രധാനമന്ത്രി ടെലിപ്രോംപ്റ്റർ ഉപയോഗിച്ചതിനെ രാഹുൽ ഗാന്ധി പരിഹസിച്ചു. സ്വന്തം ആളുകളും വേദിയും അനുകൂലമായ അന്തരീക്ഷവും ഉണ്ടായിരുന്നിട്ടും എഴുതി തയ്യാറാക്കിയ സ്ക്രിപ്റ്റ് പ്രധാനമന്ത്രിക്ക് ആവശ്യമായി വന്നത് അദ്ദേഹത്തിന്റെ സമ്മർദം മൂലമാണെന്ന് അദ്ദേഹം ആരോപിച്ചു.

To advertise here,

പ്രധാനമന്ത്രിയെ രാഹുൽ ഗാന്ധി വീണ്ടും സംവാദത്തിന് വെല്ലുവിളിച്ചു. വേണമെങ്കിൽ ടെലിപ്രോംപ്റ്ററും ഇഷ്ടമുള്ള മോഡറേറ്ററേയും കൂടെക്കൊണ്ടുവന്നോളൂവെന്നും അദ്ദേഹം പരിഹസിച്ചു. പ്രധാനമന്ത്രി താനുമായി നേർക്കുനേർ സംവാദത്തിന് വന്നാൽ അദ്ദേഹത്തിന്റെ രാഷ്ട്രീയ ജീവിതം തന്നെ അവസാനിക്കുമെന്നും അത് അദ്ദേഹത്തിനും തനിക്കും അറിയാമെന്നും രാഹുൽ ഗാന്ധി അവകാശപ്പെട്ടു.

തന്നെ 'രാജ്യദ്രോഹി' എന്ന് പ്രധാനമന്ത്രി നിരന്തരം വിളിക്കുന്നു. രാജ്യത്തെ യഥാർഥ രാജ്യദ്രോഹി ആരാണെന്ന് ജനങ്ങൾ അറിയണം. ആര്, ആരെ, എന്നുമുതലാണ് നിയന്ത്രിക്കുന്നതെന്നും ജനങ്ങൾ അറിയണം. തന്റെ ഫോണിൽ അതിനുള്ള തെളിവുകളുണ്ടെന്നും അദ്ദേഹം അവകാശപ്പെട്ടു. തന്റെ ഫോൺ ചോർത്തുന്നതിനാൽ പ്രധാനമന്ത്രിക്ക് അത് വ്യക്തമായിട്ടറിയാമെന്നും രാഹുൽ പറഞ്ഞു.

സമീപകാലത്തായി പ്രധാനമന്ത്രി തനിക്കെതിരെയുള്ള വിമർശനങ്ങളിൽ നിന്നും ആക്രമണങ്ങളിൽ നിന്നും വളരെ ജാഗ്രതയോടെ വിട്ടുനിൽക്കുന്നത് അദ്ദേഹത്തിന്റെ മനസ്സിലെ ഭയം മൂലമാണെന്നും രാഹുൽ ഗാന്ധി പറഞ്ഞു.