കിരണ്‍ ബേദിയെ തിരിച്ചുവിളിക്കണം: പുതുച്ചേരി മുഖ്യമന്ത്രിയുടെ നേതൃത്വത്തില്‍ ധര്‍ണ

പുതുച്ചേരി: ലഫ്റ്റനന്റ് ഗവര്‍ണര്‍ കിരണ്‍ ബേദിയെ കേന്ദ്രസര്‍ക്കാര്‍ തിരിച്ചുവിളിക്കണമെന്നാവശ്യപ്പെട്ട് പുതുച്ചേരി മുഖ്യമന്ത്രി വി. നാരായണസാമിയുടെ നേതൃത്വത്തിലുള്ള ധര്‍ണ നാലാം ദിവസത്തിലേക്ക്. രാജ് നിവാസിന് സമീപമാണ് ധര്‍ണ നടക്കുന്നത്.  

കോണ്‍ഗ്രസിന്റെ നേതൃത്വത്തിലുള്ള ഭരണകക്ഷിയായ ഡെമോക്രാറ്റിക് സെക്കുലറിന്റെ നേതൃത്വത്തില്‍ നാല് ദിവസത്തെ ധര്‍ണയാണ് ആരംഭിച്ചിരിക്കുന്നത്. തിരഞ്ഞെടുക്കപ്പെട്ട സര്‍ക്കാരിനെ പ്രവര്‍ത്തിക്കാന്‍ കിരണ്‍ ബേദി അനുവദിക്കുന്നില്ലെന്ന് ആരോപിച്ചാണ് പ്രതിഷേധം. മുഖ്യമന്ത്രിയെ കൂടാതെ മന്ത്രിമാരും ഭരണകക്ഷിയിലെ ജനപ്രതിനിധികളും പാര്‍ട്ടി പ്രവര്‍ത്തകരും ഉള്‍പ്പെടെയുള്ളവര്‍ ധര്‍ണയില്‍ പങ്കെടുക്കുന്നുണ്ട്. 'കോര്‍പ്പറേറ്റ് മോദി പുറത്തുപോകുക', 'കിരണ്‍ ബേദിയെ തിരിച്ചുവിളിക്കുക' തുടങ്ങിയ മുദ്രാവാക്യങ്ങളെഴുതിയ പ്ലക്കാര്‍ഡുകള്‍ ഉയര്‍ത്തിയാണ് ധര്‍ണ.

തിരഞ്ഞെടുക്കപ്പെട്ട സര്‍ക്കാരിന് ഭരണനിര്‍വ്വഹണം നടത്താന്‍ കിരണ്‍ ബേദി അനുവദിക്കുന്നില്ലെന്നും സര്‍ക്കാരിന്റെ ദൈനംദിന കാര്യങ്ങളില്‍ പോലും അനാവശ്യമായി ഇടപെടുകയാണെന്നും മുഖ്യമന്ത്രി ആരോപിച്ചു. കഴിഞ്ഞ മൂന്ന് ദിവസങ്ങളായി ജനങ്ങള്‍ സമാധാനപരമായി പ്രതിഷേധിക്കുകയാണെന്നും അദ്ദേഹം വ്യക്തമാക്കി.

Puducherry Chief Minister Continues Dharna against Kiran Bedi