ന്യൂഡൽഹി: ലഷ്‌കറെ തൊയ്ബ ഭീകരർ പാകിസ്താനിലെ കറാച്ചിക്കടുത്തുള്ള ഒരു പ്രദേശത്ത് വിനോദസഞ്ചാരത്തിന്റെ മറവിൽ സമുദ്രമേഖലയിൽ പരിശീലനം നേടിക്കൊണ്ടിരിക്കുന്നുവെന്ന് ഇന്റലിജൻസ് വിവരം. കറാച്ചിയിൽ നിന്ന് വെറും 50 കിലോമീറ്റർ അകലെയുള്ള ചർണ ദ്വീപിൽ ഭീകരർക്ക് സ്കൂബ ഡൈവിങ് കോംബാറ്റ് സ്വിമ്മിംഗ്, വെള്ളത്തിനടിയിലെ മറ്റ് പ്രവർത്തനങ്ങൾ എന്നിവയിൽ പരിശീലനം നൽകിവരികയാണെന്ന് ഇന്റലിജൻസ് വൃത്തങ്ങളെ ഉദ്ധരിച്ച് എൻഡിടിവി റിപ്പോർട്ട് ചെയ്തു. ലഷ്കറിന്റെ 'ദാവ മറൈൻ വിംങ്' അല്ലെങ്കിൽ 'സദാ-ഇ-ഹുറിയത്ത്' എന്ന് വിളിക്കുന്ന സംഘമാണ് പരിശീലനം നടത്തുന്നത്.

To advertise here,

പാക് അധിനിവേശ കാശ്മീരിലെ മംഗ്ല അണക്കെട്ടിലും, പ്രത്യേക നീന്തൽക്കുളങ്ങളിലും ഈ ഭീകര സംഘടന പരിശീലനം നടത്തുന്നതായി നേരത്തെ കണ്ടെത്തലുണ്ടായിരുന്നു. ഇതിൽ ചില കേന്ദ്രങ്ങൾക്കുനേരെ ബോംബുകളും ക്രൂയിസ് മിസൈലുകളും ഉപയോഗിച്ച് ഇന്ത്യ ആക്രമണം നടത്തിയിരുന്നു.

കറാച്ചിക്ക് സമീപമുള്ള ദ്വീപിൽ സമുദ്രതല പ്രവർത്തനങ്ങൾക്കായി പരിശീലനം നേടുന്ന ലഷ്‌കർ ഭീകരരുടെ സംഘം വിനോദസഞ്ചാരികളെന്ന പേരിലാണ് ഇങ്ങോട്ടേക്കെത്തിയിരിക്കുന്നതെന്നും ഇന്റലിജൻസ് വൃത്തങ്ങൾ പറയുന്നു.

ലഷ്‌കറിന്റെ തന്നെ ഒരു പ്രോക്‌സി ഗ്രൂപ്പായ പാകിസ്താൻ മർക്കസി മുസ്ലിം ലീഗിന്റെ (PMML) അംഗങ്ങളാണ് പരിശീലകർ. സമുദ്ര മേഖലയിൽ പ്രവർത്തിക്കാൻ ലഷ്‌കർ കഠിനമായി പരിശ്രമിക്കുന്നുണ്ടെന്നാണ് രഹസ്യാന്വേഷണ വിവരങ്ങൾ സൂചിപ്പിക്കുന്നത്.

26/11 മുംബൈ ആക്രമണം നടത്തിയ ലഷ്കർ ഭീകരർ കടൽമാർഗ്ഗമാണ് നഗരത്തിൽ എത്തിച്ചേർന്നത്. കടൽ മാർഗ്ഗം വലിയ തോതിലുള്ള ആക്രമണങ്ങൾ നടത്താൻ ഇപ്പോൾ സജീവമായി പ്രവർത്തിച്ചുവരികയാണെന്ന് ഇന്റലിജൻസ് വൃത്തങ്ങൾ പറയുന്നത്. ഇക്കാര്യത്തിൽ രാജ്യത്തെ സുരക്ഷാ ഏജൻസികൾ പൂർണ്ണമായും ജാഗ്രത പുലർത്തുന്നുണ്ടെന്നും ഏത് ഭീഷണിയും നേരിടാൻ ഒരുക്കമാണെന്നും അധികൃതർ വ്യക്തമാക്കി.