ന്യൂഡൽഹി: മുഖ്യതിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെ ഇംപീച്ച് ചെയ്യുന്ന പ്രതീകാത്മക പരിപാടിക്കായി തയ്യാറാക്കിയത് പഴയ ലോക്‌സഭാ മാതൃകയിലെ വേദി. 18 വർഷമായി രാഹുൽ ഗാന്ധിയുടെ കൂടെയുള്ള മുൻ എസ്.പി.ജി. ഓഫീസർ കോട്ടയം കൂരോപ്പടയിലെ കെ.ബി. ബൈജുവിന്റെ നേതൃത്വമാണ് ഇതിനുപിന്നിൽ. രണ്ടുദിവസംകൊണ്ടാണ് ബൈജുവും സംഘവും പാർലമെൻറ് പശ്ചാത്തലം ചിത്രങ്ങളാക്കിയതും പ്രിന്റെടുത്ത് പ്ലൈവുഡിൽ തീർത്ത മേശകളിലൊട്ടിച്ച് ജീവസ്സുറ്റതാക്കിയതും.

To advertise here,

അധ്യക്ഷതവഹിച്ച ‘സ്പീക്കർ’ മീരാകുമാറിന്റെ പിന്നിൽ ലോക്‌സഭാ ചെയറിന് പിന്നിലെപ്പോലെ ബോർഡിലൊട്ടിച്ച പെയിന്റിങ് വെച്ചു. ഇരുവശവും പാർലമെന്റിലേതുപോലെ വലിയ ടി.വി. സ്‌ക്രീനുകളും സ്ഥാപിച്ചു. മുന്നിൽ ലോക്‌സഭാ സെക്രട്ടേറിയറ്റിലേതിനു സമാനമായ കസേരകളിൽ ഡെപ്യൂട്ടി സ്പീക്കർമാരായി ‘നിയമിതരായ’ അവധേഷ് പ്രസാദും സൗഗത റോയും ഇരുന്നു. മുന്നിൽ ആദ്യ മൂന്നു വരികളിൽ 21 പ്രതിപക്ഷ പാർട്ടികളിലെ പ്രധാന നേതാക്കൾക്കും എം.പി.മാർക്കും ഇരിക്കാൻ 210 കസേരകളും ലോക്‌സഭാ മാതൃകയിൽ പ്രത്യേക െഡസ്‌കും. പ്ലൈവുഡിൽ തയ്യാറാക്കിയ െഡസ്കിൽ പഴയ ലോക്‌സഭാ െഡസ്കിന്റെ ചിത്രങ്ങൾ പ്രിന്റെടുത്ത് ഒട്ടിക്കുകയായിരുന്നു. ഒറ്റനോട്ടത്തിൽ ഒറിജിനലാണെന്നു തോന്നും.

രാഹുൽഗാന്ധിയുടെ ഭാരത് ജോഡോ യാത്രാവേളയിലും ഛാത്രോം കീ ഗൂഞ്ച് പരിപാടിയിലും സ്ഥിരമായി തയ്യാറാക്കുന്ന ജോലിക്കാരെ വെച്ചാണ് കെ.ബി. ബൈജുവും സംഘവും ഇതെല്ലാം തയ്യാറാക്കിയത്. അശോക ഹോട്ടലിൽ നടുത്തളമടക്കമുള്ള പഴയ പാർലമെന്റ് പുനരാവിഷ്കരിക്കാനായിരുന്നു ആദ്യം ആലോചിച്ചതെന്ന് ബൈജു പറഞ്ഞു. ആ പദ്ധതി തെറ്റിയതിനാൽ രണ്ടുദിവസംകൊണ്ട് പ്ലൈവുഡ് കസേരയിൽ പ്രിന്റൊട്ടിച്ച് ഇവ തയ്യാറാക്കി. കസേരകൾ ഖാർഗെയുടെ വസതിയിൽ സ്ഥിരം ഉപയോഗിക്കുന്ന കുഷൻ കസേരകൾ തന്നെയായിരുന്നു. പ്രത്യേകം ക്ഷണിതാക്കളായി എത്തിയവർക്ക്, മൂന്നുവരിക്കുശേഷം കസേരകൾമാത്രം ഇരിക്കാനായി ക്രമീകരിച്ചു. ആദ്യമൂന്നുവരികളിയായിരുന്ന മുപ്പതോളം പേർ സംസാരിച്ചു. 3.50-ന് തുടങ്ങി 7.10 വരെ നീണ്ട പരിപാടി പൂർണമായും മീരാകുമാർ നിയന്ത്രിച്ചു. എം.പി.മാർക്ക് സംസാരിക്കാൻ സമയംനൽകുന്നതിൽ അവർ കർശന ചിട്ട പാലിച്ചു.