മുംബൈ: വീഡിയോകോണ്‍ ഗ്രൂപ്പിന് ഐ.സി.ഐ.സി.ഐ. ബാങ്ക് ക്രമംവിട്ട് വായ്പയനുവദിച്ചെന്ന കേസില്‍ സിബിഐ അറസ്റ്റ് ചെയ്ത ബാങ്ക് മുന്‍ സി.ഇ.ഒ.യും എം.ഡി.യുമായ ചന്ദാ കൊച്ചാറിനെയും ഭര്‍ത്താവ് ദീപക് കൊച്ചാറിനെയും വിട്ടയക്കാന്‍ ഉത്തരവ്. അറസ്റ്റ് നിയമപരമല്ലെന്ന് ചൂണ്ടിക്കാട്ടി ബോംബെ ഹൈക്കോടതിയാണ് ഇരുവരേയും വിട്ടയയ്ക്കാന്‍ ഉത്തരവിട്ടത്.

To advertise here,

വീഡിയോകോണ്‍ ഗ്രൂപ്പിന് 3250 കോടി രൂപ വായ്പയായി ലഭിച്ച് മാസങ്ങള്‍ക്കുശേഷം കമ്പനിയുടെ പ്രൊമോട്ടര്‍ വേണുഗോപാല്‍ ധൂത് കോടിക്കണക്കിന് രൂപ നിക്ഷേപിച്ചെന്നാണ് ആരോപണം. കഴിഞ്ഞ ഡിസംബര്‍ 23-നാണ് സിബിഐ ചന്ദാ കൊച്ചാറിനെയും ദീപക് കൊച്ചാറിനെയും അറസ്റ്റ് ചെയ്തത്.

ജസ്റ്റിസുമാരായ രേവതി മോഹിതേ ദേരെ, പൃഥ്വി രാജ് ചവാന്‍ എന്നിവരുടെ ബെഞ്ചാണ് ഇരുവരേയും വിട്ടയക്കാന്‍ ഇടക്കാല ഉത്തരവിട്ടത്. സിആര്‍പിസി 41 എ പ്രകാരമല്ല അറസ്റ്റെന്നാണ് കോടതി ഉത്തരവില്‍ പറയുന്നത്.

2012-ലാണ് കേസിനാസ്പദമായ സംഭവം നടന്നത്. 2019-ല്‍ ചന്ദാ കൊച്ചാര്‍, ദീപക് കൊച്ചാര്‍, വീഡിയോകോണ്‍ ഗ്രൂപ്പ് ഉടമ വേണുഗോപാല്‍ ധൂത് അദ്ദേഹത്തിന്റെ കമ്പനികളായ വീഡിയോകോണ്‍ ഇന്റര്‍നാഷണല്‍ ഇലക്ട്രോണിക്‌സ് ലിമിറ്റഡ്, വീഡിയോകോണ്‍ ഇന്‍ഡസ്ട്രീസ് ലിമിറ്റഡ് എന്നീ കമ്പനികളെ പ്രതിചേര്‍ത്ത് സി.ബി.ഐ. കേസെടുത്തു.

ചന്ദാ കൊച്ചാറിനെയും ഭര്‍ത്താവ് ദീപക് കൊച്ചാറിനെയും അറസ്റ്റ് ചെയ്തതിന് പിന്നാലെ വീഡിയോകോണ്‍ ഗ്രൂപ്പ് ഉടമ വേണുഗോപാല്‍ ധൂതിനേയും കഴിഞ്ഞ മാസം സിബിഐ അറസ്റ്റ് ചെയ്തിരുന്നു.