ന്യൂഡൽഹി: നോയിഡയിൽ അക്രമാസക്തമായ തൊഴിലാളി സമരത്തിന് പിന്നിലെ മുഖ്യസൂത്രധാരനെ പോലീസ് അറസ്റ്റ്‌ചെയ്തു. ആദിത്യ ആനന്ദ് എന്നയാളെയാണ് ഗൗതംബുദ്ധ നഗർ പോലീസും സ്‌പെഷ്യൽ ടാസ്‌ക് ഫോഴ്‌സും ചേർന്ന് പിടികൂടിയത്. തമിഴ്‌നാട്ടിലെ തിരുച്ചിറപ്പള്ളി റെയിൽവേ സ്റ്റേഷനിൽനിന്നാണ് ഇയാൾ പിടിയിലായതെന്നും പോലീസ് പറഞ്ഞു.

To advertise here,

ദിവസങ്ങൾക്ക് മുൻപ് നോയിഡയിൽ നടന്ന തൊഴിലാളി സമരം പിന്നീട് കലാപത്തിലേക്ക് നീങ്ങിയിരുന്നു. സമരം അക്രമാസക്തമായതിനും കലാപം അഴിച്ചുവിട്ടതിനും പിന്നിൽ ആനന്ദ് ആണെന്നാണ് പോലീസിന്റെ കണ്ടെത്തൽ. തുടർന്ന് മുഖ്യസൂത്രധാരനായ ഇയാൾക്കെതിരേ പോലീസ് കേസെടുത്തിരുന്നു.

ഇയാൾ ഒളിവിൽപോയതോടെ പ്രതിയെക്കുറിച്ച് വിവരം നൽകുന്നവർക്ക് പോലീസ് ഒരുലക്ഷം രൂപ പാരിതോഷികം പ്രഖ്യാപിച്ചിരുന്നു. ഗൗതംബുദ്ധ നഗർ പോലീസ് രജിസ്റ്റർചെയ്ത കേസിൽ ആനന്ദിനെതിരേ കോടതി ജാമ്യമില്ലാ വാറന്റും പുറപ്പെടുവിച്ചിരുന്നു. ഇതിനിടെ പോലീസ് പ്രതിക്കായി വിവിധ സംസ്ഥാനങ്ങളിൽ തിരച്ചിൽ നടത്തി. തുടർന്നാണ് തമിഴ്‌നാട്ടിലെ തിരുച്ചിറപ്പള്ളിയിൽനിന്ന് പ്രതിയെ കസ്റ്റഡിയിലെടുത്തത്.