ന്യൂഡൽഹി: തിരഞ്ഞെടുപ്പ് പെരുമാറ്റച്ചട്ടത്തിന്റെ ഭാഗമായുള്ള 48 മണിക്കൂർ നിശബ്ദ പ്രചാരണ കാലയളവിനെ പ്രചരണായുധമാക്കി പ്രധാനമന്ത്രി നരേന്ദ്ര മോദി. പശ്ചിമ ബംഗാളിലെ വോട്ടെടുപ്പിന് തൊട്ടുമുമ്പുള്ള ദിവസങ്ങളിൽ സിക്കിമിൽ കുട്ടികളോടൊപ്പം ഫുട്ബോൾ കളിച്ചതും ഉത്തർപ്രദേശിലെ ഗംഗാ എക്സ്പ്രസ് വേ ഉദ്ഘാടനം ചെയ്തതും ഇതിന്റെ ഉത്തമ ഉദാഹരണങ്ങളാണ്.

To advertise here,

സിക്കിമിലെ പച്ചപ്പണിഞ്ഞ മൈതാനത്ത് കുട്ടികൾക്കൊപ്പം ഫുട്ബോൾ കളിക്കുന്ന പ്രധാനമന്ത്രിയുടെ ദൃശ്യങ്ങൾ ഫുട്ബോളിനെ നെഞ്ചേറ്റുന്ന ബംഗാളി വോട്ടർമാരുടെ മനസ്സിൽ ഇടംപിടിക്കാൻ ലക്ഷ്യമിട്ടുള്ളതായിരുന്നു. അതുപോലെ തന്നെ, ഉത്തർപ്രദേശിലെ ഗംഗാ എക്സ്പ്രസ് വേ ഉദ്ഘാടനം ചെയ്തതും യാദൃശ്ചികമല്ല. ബംഗാളികളുടെ സാംസ്കാരികവും മതപരവുമായ വികാരങ്ങളുമായി അലിഞ്ഞുചേർന്ന ഗംഗാ നദിയുടെ പേര് വോട്ടർമാരിൽ വലിയ സ്വാധീനം ചെലുത്തുമെന്ന് അദ്ദേഹം കണക്കുകൂട്ടുന്നു. ഗംഗാസാഗർ മേള ആഘോഷിക്കുന്ന ബംഗാളിലെ ജനതയ്ക്ക് ഈ പേര് നൽകുന്ന സന്ദേശം വളരെ വലുതാണെന്നാണ് വിലയിരുത്തൽ.

മോദിയുടെ ഈ സൂക്ഷ്മമായ തന്ത്രങ്ങളെ പ്രതിപക്ഷം പലപ്പോഴും വേണ്ടവിധം തിരിച്ചറിയുന്നില്ലെന്ന് നിരീക്ഷകർ വിലയിരുത്തുന്നു. ബംഗാൾ വോട്ടർമാരുടെ വികാരങ്ങൾക്കൊപ്പം സഞ്ചരിക്കാനാണ് മോദി ശ്രമിക്കുന്നത്. എന്നാൽ വോട്ടെടുപ്പ് ദിവസം കോൺഗ്രസ് നേതാവ് രാഹുൽ ഗാന്ധി നിക്കോബാർ ദ്വീപുകളിലെ വികസന പദ്ധതികളെ വിമർശിക്കുന്നത് ബംഗാളിലെ വോട്ടർമാരുടെ ചിന്താഗതിയുമായി ഒത്തുപോകുന്നില്ലെന്നാണ് വിമർശനം.

വോട്ടെടുപ്പ് ദിവസങ്ങളിൽ മോദി നടത്തുന്ന ഇത്തരം യാത്രകൾക്ക് കൃത്യമായ ഒരു പാറ്റേണുണ്ട്. 2021-ലെ ബംഗാൾ തിരഞ്ഞെടുപ്പ് കാലത്ത് വോട്ടെടുപ്പ് ദിവസം അദ്ദേഹം ബംഗ്ലാദേശിലെ മതുവ വിഭാഗത്തിന്റെ ആത്മീയ കേന്ദ്രമായ ഒറകാണ്ടി സന്ദർശിച്ചിരുന്നു. അതുപോലെ ഡൽഹി തിരഞ്ഞെടുപ്പ് സമയത്ത് മഹാകുംഭത്തിൽ സ്നാനം നടത്തിയതും ഝാർഖണ്ഡ് തിരഞ്ഞെടുപ്പ് വേളയിൽ ഭോജ്പുരി വംശജർ ധാരാളമുള്ള ഗയാന സന്ദർശിച്ചതും വോട്ടർമാരെ സ്വാധീനിക്കാനുള്ള കരുതിക്കൂട്ടിയുള്ള നീക്കങ്ങളായിരുന്നു. ഓരോ സന്ദർശനവും ആ പ്രത്യേക മേഖലയിലെ വോട്ടർമാരുടെ താൽപ്പര്യങ്ങളുമായി നേരിട്ട് ബന്ധപ്പെട്ടിരിക്കുന്നു.

വടക്കുകിഴക്കൻ സംസ്ഥാനങ്ങളിലെ വികസന കാഴ്ചപ്പാടുകൾ പങ്കുവെച്ചും തമിഴ്‌നാട്ടിലെ കന്യാകുമാരിയിലെ വിവേകാനന്ദ റോക്ക് മെമ്മോറിയലിൽ 45 മണിക്കൂർ നീണ്ട ധ്യാനം നടത്തിയും മോദി മുന്പ് മാധ്യമശ്രദ്ധ നേടിയിരുന്നു. സ്വാമി വിവേകാനന്ദൻ ധ്യാനിച്ചിരുന്ന അതേ സ്ഥലത്ത് മോദിയും എത്തിയത് ഒരു വികസന നായകന്റെ ചിത്രം പൊതുജനമധ്യത്തിൽ എത്തിക്കാൻ ലക്ഷ്യമിട്ടുള്ളതായിരുന്നു. അതോടൊപ്പം ഹിന്ദു കോർ വോട്ടുകളെ കൂടെക്കൂട്ടാനുള്ള തന്ത്രവും. കഠിനമായ പ്രചാരണത്തിന് ശേഷം അദ്ദേഹം സ്വീകരിക്കുന്ന ഈ ധ്യാനരൂപം വലിയ മാധ്യമശ്രദ്ധ നേടുകയും ചെയ്തു.