ഇംഫാൽ: സംഘർഷം തുടരുന്നതിനിടെ മണിപ്പൂരിൽനിന്ന് ആയുധങ്ങൾ കണ്ടെടുത്ത് സുരക്ഷാ സേന. സ്നൈപ്പർ റൈഫിളുകൾ, പിസ്റ്റളുകൾ, ​ഗ്രനേഡുകൾ തുടങ്ങിയവ ഇക്കൂട്ടത്തിലുണ്ട്. സംഭവത്തിന്റെ ചിത്രങ്ങൾ പുറത്തുവന്നപ്പോൾ ഏവരുടേയും ശ്രദ്ധപതിഞ്ഞത് ആയുധങ്ങളിലേക്കായിരുന്നില്ല, പകരം കൂട്ടത്തിലുള്ള മറ്റൊന്നിലേക്കായിരുന്നു. ഇലോൺ മസ്കിന്റെ സ്റ്റാര്‍ലിങ്കിന്റേത് എന്ന് സംശയിക്കപ്പെടുന്ന ഒരു ഉപകരണമായിരുന്നു ഇത്.

To advertise here,

ഈ മാസം 13-ന് ഈസ്റ്റ് ഇംഫാലിൽ ഇന്ത്യൻ സൈന്യവും ആസാം റൈഫിൾസും  സംയുക്തമായി നടത്തിയ തിരച്ചിലിലാണ് ആയുധങ്ങൾ ഉൾപ്പെടെയുള്ളവ കണ്ടെത്തിയത്. ചുരാചന്ദ്പുർ, ചന്ദേൽ, ഇംഫാൽ ഈസ്റ്റ്, കാ​ഗ്പോക്പി എന്നിവിടങ്ങളിൽനിന്നുള്ള മണിപ്പൂർ പോലീസും തിരച്ചിലിന് സഹായിച്ചു. തിരച്ചിലിൽ കണ്ടെത്തിയ വസ്തുക്കൾ ദിമാപുർ ആസ്ഥാനമായ സ്പിയർ കോർപ്സ് സംഘം എക്സിലൂടെ പുറത്തുവിട്ടു. ഈ ചിത്രങ്ങളിലൊന്നിലാണ് ആയുധങ്ങൾക്കൊപ്പം സ്റ്റാർലിങ്ക് ലോ​ഗോയോടുകൂടിയ ഇന്റർനെറ്റ് ഉപകരണവും ഉള്ളത്. 

നിലവിൽ മണിപ്പൂരിൽ ഇന്റർനെറ്റ് ബന്ധം വിച്ഛേദിക്കപ്പെട്ട അവസ്ഥയാണുള്ളത്. ഈ സാഹചര്യം നിലനിൽക്കേയാണ് ഇത്തരമൊരു ഉപകരണം സൈന്യം കണ്ടെത്തിയിരിക്കുന്നത്.

അതേസമയം ഇത് യഥാർത്ഥ സ്റ്റാർ ലിങ്ക് ഉപകരണമാണോ എന്ന് ഔദ്യോ​ഗിക സ്ഥിരീകരണം വന്നിട്ടില്ല. ഇന്ത്യയിൽ പ്രവർത്തിക്കാനുള്ള ലൈസൻസ് സ്റ്റാർലിങ്കിനില്ല എന്നതും ശ്രദ്ധിക്കേണ്ട വസ്തുതയാണ്. നിരവധി പേരാണ് സ്റ്റാർലിങ്ക് ഉടമ ഇലോൺ മസ്കിനെ ടാ​ഗ് ചെയ്തുകൊണ്ട്  എക്സിലൂടെ ഈ ചിത്രങ്ങൾ പങ്കുവെച്ചത്. സ്റ്റാർലിങ്ക് ഇന്ത്യയിൽ തീവ്രവാദ പ്രവർത്തനങ്ങൾക്ക് ഉപയോ​ഗിക്കുന്നുവെന്നും ചിലർ അഭിപ്രായപ്പെട്ടു. 

എന്നാൽ ഇക്കാര്യം നിഷേധിച്ചുകൊണ്ട് പിന്നീട് സാക്ഷാൽ മസ്ക് തന്നെ രം​ഗത്തെത്തി. ഇന്ത്യക്ക് മേലേയുള്ള സ്റ്റാർലിങ്ക് സാറ്റലൈറ്റ് ബീം ഓഫ് ചെയ്തുവെച്ചിരിക്കുകയാണെന്ന് അദ്ദേഹം വ്യക്തമാക്കി. അതേസമയം ഇന്ത്യയുടെ മ്യാൻമർ അതിർത്തിയിൽനിന്നോ ബം​ഗ്ലാദേശ് അതിർത്തിയിൽനിന്നോ കടത്തിക്കൊണ്ടുവന്നതാകാം ഈ ഉപകരണമെന്നും ചർച്ചകളുണ്ട്.