ന്യൂഡൽഹി: ബിഹാർ, അസം ഉൾപ്പെടെയുള്ള സംസ്ഥാനങ്ങളിലേയും കേന്ദ്രഭരണപ്രദേശങ്ങളിലേയും എസ്.ഐ.ആർ. ഉത്തരവുകൾ മുഖ്യ തിരഞ്ഞെടുപ്പ് കമ്മിഷണറും തിരഞ്ഞെടുപ്പ് കമ്മിഷണർമാരും ഐകകണ്‌ഠ്യേനയാണ് അംഗീകരിച്ചതെന്ന് അറിയിച്ച് കമ്മിഷൻ വൃത്തങ്ങൾ. ഫോം 6-ൽ ഒരുമാറ്റവും വരുത്തിയിട്ടില്ലെന്ന് കമ്മിഷൻ വ്യക്തമാക്കി തൊട്ടടുത്ത ദിവസമാണ് ഈ അറിയിപ്പ്. പുതിയ വോട്ടർമാർ ഫോം 6-നൊപ്പം സമർപ്പിക്കേണ്ട ഒരു സത്യപ്രസ്താവന ഫോംകൂടി അംഗീകരിച്ച ഉത്തരവുകളിൽ ഉൾപ്പെടുന്നു. ഈ സത്യപ്രസ്താവന ഒരധിക ആവശ്യകത മാത്രമാണെന്നും നിലവിലുള്ള ഫോം 6-ൽ മാറ്റം വരുത്തുന്നില്ലെന്നുമാണ് കേന്ദ്ര തിരഞ്ഞെടുപ്പ് കമ്മിഷന്റെ വാദം.

To advertise here,

എന്നാൽ, ഓൺലൈൻ ഫോം 6-ൽ ഈ പ്രത്യേക സത്യപ്രസ്താവന ഉൾപ്പെടുത്തിയതിനെതിരേ തിരഞ്ഞെടുപ്പ് കമ്മിഷണർമാരായ സുഖ്ബീർ സിങ് സന്ധുവും വിവേക് ജോഷിയും മുൻപ് എതിർപ്പ് പ്രകടിപ്പിച്ചിരുന്നതായി 'ദി ഇന്ത്യൻ എക്‌സ്പ്രസ്' റിപ്പോർട്ട് ചെയ്യുന്നു. 1960-ലെ ഇലക്ട്രോഴ്‌സ് രജിസ്‌ട്രേഷൻ ചട്ടങ്ങൾ നിശ്ചിത പ്രക്രിയയിലൂടെ ഭേദഗതി ചെയ്യാതെ നിയമപരമായ ഫോമുകൾ മാറ്റാൻ കഴിയില്ലെന്നായിരുന്നു ഇവരുടെ നിലപാട്. എസ്.ഐ.ആർ. നടപ്പാക്കലിനിടെ ഫോം 6-ൽ വരുത്തിയ മാറ്റങ്ങൾക്കെതിരേ മേയ് മാസത്തിൽ ജോഷി മുന്നറിയിപ്പ് നൽകുകയും, ചട്ടങ്ങൾ ഭേദഗതി ചെയ്യാതെയുള്ള ഈ നടപടി അനധികൃതവും നിയമവിരുദ്ധവുമാണെന്നും ഉടൻ നീക്കം ചെയ്യണമെന്നും സന്ധു വ്യക്തമാക്കുകയും ചെയ്തിരുന്നു. മുൻ ചീഫ് ഇലക്ഷൻ കമ്മിഷണർ ഒ.പി. റാവത്തും മുൻ ഇലക്ഷൻ കമ്മിഷണർ അശോക് ലവാസയും സന്ധുവിന്റേയും ജോഷിയുടേയും എതിർപ്പുകളെ പിന്തുണച്ചിരുന്നു.

ഫോം 6-ൽ മാറ്റമൊന്നും വരുത്തിയിട്ടില്ലെന്നും Annexure D എന്നപേരിൽ ഒരു പ്രത്യേക സത്യപ്രസ്താവനയാണ് ഫോമിനൊപ്പം അധികമായി ചേർത്തതെന്നും തിരഞ്ഞെടുപ്പ് കമ്മിഷൻ വിശദീകരിച്ചു. അംഗീകൃത ഫോം ആറും എസ്.ഐ.ആറുമായി ബന്ധിപ്പിച്ച അധിക സത്യപ്രസ്താവനയും തമ്മിൽ വ്യക്തമായ വ്യത്യാസമുണ്ടെന്ന് കമ്മിഷൻ ചൂണ്ടിക്കാട്ടി. മാതാപിതാക്കളുടേയോ മുത്തശ്ശിമുത്തശ്ശന്മാരുടേയോ വിവരങ്ങൾ ബന്ധിപ്പിക്കുന്നതിനുള്ള നിർദേശം നിലവിലുള്ള ഫോം 6-നൊപ്പം നൽകേണ്ട അധിക സത്യപ്രസ്താവന മാത്രമാണെന്നാണ് കമ്മിഷൻ നൽകുന്ന വിശദീകരണം.