ന്യൂഡൽഹി: ഇന്ത്യൻപൗരത്വം നേടുന്നതിനുമുൻപേ വോട്ടർപട്ടികയിൽ സോണിയാഗാന്ധിയുടെ പേരുൾപ്പെടുത്തിയെന്നാരോപിച്ചുള്ള പരാതിയിൽ സ്വീകരിച്ച നടപടികളുടെ റിപ്പോർട്ട് പോലീസിനോടാവശ്യപ്പെട്ട് ഡൽഹി റൗസ് അവന്യൂ കോടതി. ജുഡീഷ്യൽ ഒന്നാം ക്ലാസ് മജിസ്‌ട്രേറ്റ് വിനോദ് ജോഷിയാണ് ഉത്തരവിട്ടത്.

To advertise here,

സോണിയക്കെതിരായ ബി.ജെ.പി. ആരോപണത്തിനുപിന്നാലെ വികാസ് ത്രിപാഠിയെന്ന അഭിഭാഷകനാണ് കോടതിയെ സമീപിച്ചത്. ഹർജി നവംബർ 28-ന് വീണ്ടും പരിഗണിക്കും. കഴിഞ്ഞവർഷം സെപ്റ്റംബറിൽ അഡീഷണൽ ചീഫ് ജുഡീഷ്യൽ മജിസ്‌ട്രേറ്റ് ഹർജി തള്ളിയതിനെതിരായ അപ്പീലിന്മേൽ ഹർജി വീണ്ടും പരിഗണിക്കാൻ ഈ സെപ്റ്റംബറിൽ സെഷൻസ് കോടതി ഉത്തരവിട്ടിരുന്നു.

1983-ൽ ഇന്ത്യൻ പൗരത്വം കിട്ടുന്നതിനു മൂന്നുവർഷംമുൻപ്‌ 1980-ൽ ന്യൂഡൽഹി മണ്ഡലത്തിലെ വോട്ടർപട്ടികയിൽ സോണിയാഗാന്ധിയുടെ പേരുണ്ടായിരുന്നെന്നാണ് ആരോപണം. ഹർജി രാഷ്ട്രീയപ്രേരിതമാണെന്നാണ് സോണിയയുടെ നിലപാട്.