ന്യൂഡൽഹി: തീവ്ര വോട്ടർപട്ടിക പരിഷ്കരണത്തിലെ (എസ്ഐആർ) ക്രമക്കേടുകളുടെ പശ്ചാത്തലത്തിൽ ചീഫ് ഇലക്ഷൻ കമ്മീഷണർ ഗ്യാനേഷ് കുമാറിനെ ഉടൻ സ്ഥാനത്തുനിന്ന് നീക്കണമെന്ന് കോൺഗ്രസ് അധ്യക്ഷൻ മല്ലികാർജുൻ ഖാർഗെ. സംഭവത്തിൽ കമ്മീഷനുമേൽ സമ്മർദം ചെലുത്തിയതിന്റെ ധാർമിക ഉത്തരവാദിത്വമേറ്റെടുത്ത് പ്രധാനമന്ത്രി നരേന്ദ്ര മോദി രാജിവെക്കണമെന്നും ഖാർഗെ ആവശ്യപ്പെട്ടു. ന്യൂഡൽഹിയിൽ ചേർന്ന കോൺഗ്രസ് പ്രവർത്തക സമിതി (സിഡബ്ല്യുസി) യോഗത്തിൽ സംസാരിക്കവെയായിരുന്നു ഖാർഗെയുടെ പ്രതികരണം.

To advertise here,

68 അംഗങ്ങൾ പങ്കെടുത്ത സിഡബ്ല്യുസി യോഗത്തിൽ അഞ്ച് ആവശ്യങ്ങളാണ് ഖാർഗെ മുന്നോട്ടുവെച്ചത്. വോട്ടർപട്ടികയിലെ മാറ്റങ്ങളുടെ പൂർണവിവരങ്ങൾ പരസ്യപ്പെടുത്തുക, വിവരങ്ങൾ എളുപ്പത്തിൽ ലഭ്യമാകുന്ന രീതിയിൽ രാഷ്ട്രീയ പാർട്ടികൾക്ക് സമയബന്ധിതമായി നൽകുക, വൈരുദ്ധ്യങ്ങളിൽ സമയബന്ധിതമായ അന്വേഷണം നടത്തുക എന്നിവയാണ് പ്രധാന ആവശ്യങ്ങൾ.

കൂടാതെ, വോട്ടർപട്ടികയിൽനിന്ന് പേരുകൾ ഒഴിവാക്കപ്പെട്ട വോട്ടർമാരെ വിവരമറിയിക്കുകയും അപ്പീൽ നൽകാൻ അവസരം നൽകുകയും ചെയ്യണമെന്നും വിജ്ഞാപനങ്ങളിലും തീരുമാനങ്ങളിലും സുതാര്യത ഉറപ്പാക്കണമെന്നും അദ്ദേഹം ആവശ്യപ്പെട്ടു.

പത്തുവർഷംമുമ്പ് നോട്ടുനിരോധനം വഴി രാജ്യത്തിന്റെ സമ്പദ്‌വ്യവസ്ഥയെ തകർത്ത പ്രധാനമന്ത്രി, ഇപ്പോൾ 'വോട്ടുബന്ധി' എന്ന ഗൂഢാലോചനയിലൂടെ ജനാധിപത്യത്തെ തകർക്കുകയാണെന്ന് ഖാർഗെ ആരോപിച്ചു. പാവപ്പെട്ടവരും ദളിതരും ചൂഷിതരുമാണ് ഇതിന്റെ ദുരിതം അനുഭവിക്കുന്നതെന്നും അവരുടെ പ്രധാന ആയുധമായ വോട്ടവകാശമാണ് ഇല്ലാതാകുന്നതെന്നും അദ്ദേഹം പറഞ്ഞു.

പുതിയ വോട്ടർമാരുടെ രജിസ്ട്രേഷനുള്ള ഫോം 6-ൽ വരുത്തിയ മാറ്റങ്ങൾ നിയമവിരുദ്ധമാണെന്നും യുവാക്കളുടെ വോട്ടവകാശം തടയാനാണ് കേന്ദ്രസർക്കാർ ശ്രമിക്കുന്നതെന്നും അദ്ദേഹം ആരോപിച്ചു. 1988-ൽ രാജീവ് ഗാന്ധി സർക്കാർ വോട്ടവകാശത്തിനുള്ള പ്രായം 21-ൽ നിന്ന് 18 ആയി കുറച്ച് യുവാക്കളെ ശാക്തീകരിച്ചപ്പോൾ, മോദി സർക്കാർ യുവാക്കളുടെ വോട്ടവകാശം ഇല്ലാതാക്കാൻ ശ്രമിക്കുകയാണെന്ന് ഖാർഗെ പറഞ്ഞു. 

മറ്റു രണ്ട് ഇലക്ഷൻ കമ്മീഷണർമാർ തന്നെ ഗ്യാനേഷ് കുമാറിൻ്റെ നടപടികൾ ഏകപക്ഷീയവും അനുചിതവുമാണെന്ന് ചൂണ്ടിക്കാണിച്ചിട്ടുണ്ടെന്ന് ഖാർഗെ പറഞ്ഞു. ഇലക്ഷൻ കമ്മീഷണർമാരായ സുഖ്ബീർ സിങ് സന്ധുവും വിവേക് ജോഷിയും കഴിഞ്ഞ 10 മാസത്തിനിടെ 14 തവണ സിഇഒയുടെ തീരുമാനങ്ങളിൽ ഔദ്യോഗികമായി എതിർപ്പുകൾ രേഖപ്പെടുത്തിയിട്ടുണ്ടെന്ന് റിപ്പോർട്ടുകൾ വന്നിരുന്നു. വരാനിരിക്കുന്ന അഞ്ച് സംസ്ഥാനങ്ങളിലെ നിയമസഭാ തിരഞ്ഞെടുപ്പുകളുടെ പശ്ചാത്തലത്തിൽ ഓരോ പൗരന്റെയും വോട്ട് സുരക്ഷിതമാണെന്ന് ഉറപ്പാക്കേണ്ടത് അത്യാവശ്യമാണെന്ന് ഖാർഗെ കൂട്ടിച്ചേർത്തു.

'വോട്ട് ചോരി' പ്രചാരണത്തിലൂടെ ഇന്ത്യൻ ജനാധിപത്യത്തിലെ ഏറ്റവും വലിയ വിഷയം ഏറ്റെടുത്തതിന് രാഹുൽ ഗാന്ധിയെ സിഡബ്ല്യുസി അഭിനന്ദിച്ചു. കഴിഞ്ഞ 19 മാസങ്ങളായി ഇവിഎമ്മുകളും വോട്ടർപട്ടികയും അട്ടിമറിക്കപ്പെട്ടിരിക്കുകയാണെന്നും ഇവ ബിജെപിയുടെ തിരഞ്ഞെടുപ്പ് വിജയത്തിനായി ദുരുപയോഗം ചെയ്യുകയാണെന്നും കോൺഗ്രസ് സംഘടനാ ജനറൽ സെക്രട്ടറി കെ.സി. വേണുഗോപാൽ വാർത്താസമ്മേളനത്തിൽ അറിയിച്ചു.

കോൺഗ്രസ് പാർലമെന്ററി പാർട്ടി അധ്യക്ഷ സോണിയ ഗാന്ധി, ലോക്‌സഭാ പ്രതിപക്ഷ നേതാവ് രാഹുൽ ഗാന്ധി, ജനറൽ സെക്രട്ടറിമാരായ പ്രിയങ്ക ഗാന്ധി വദ്ര, ജയറാം രമേശ്, സച്ചിൻ പൈലറ്റ്, മുകുൾ വാസ്‌നിക്, പി. ചിദംബരം തുടങ്ങിയ മുതിർന്ന നേതാക്കളും കർണാടക ഉപമുഖ്യമന്ത്രി ഡി.കെ. ശിവകുമാർ, കേരള മുഖ്യമന്ത്രി വി.ഡി. സതീശൻ, തെലങ്കാന മുഖ്യമന്ത്രി എ. രേവന്ത് റെഡ്ഡി, ഹിമാചൽ പ്രദേശ് മുഖ്യമന്ത്രി സുഖ്‌വിന്ദർ സിങ് സുഖു എന്നിവരും യോഗത്തിൽ പങ്കെടുത്തു. വരാനിരിക്കുന്ന 'ഇന്ത്യ' മുന്നണി യോഗത്തിലും ഈ വിഷയങ്ങൾ ഉന്നയിക്കുമെന്ന് നേതാക്കൾ അറിയിച്ചു.