ദുര്ഗ്: ഛത്തീസ്ഗഢില് അറസ്റ്റിലായ മലയാളി കന്യാസ്ത്രീകള് ജയിലില് തുടരും. ബുധനാഴ്ച ജാമ്യംതേടി ദുര്ഗിലെ സെഷന്സ് കോടതിയെ സമീപിച്ചെങ്കിലും കോടതി ജാമ്യാപേക്ഷ പരിഗണിച്ചില്ല. മനുഷ്യക്കടത്ത് അടക്കമുള്ള വകുപ്പുകള് ചുമത്തിയതിനാല് ജാമ്യാപേക്ഷ പരിഗണിക്കാന് തങ്ങള്ക്ക് അധികാരമില്ലെന്നായിരുന്നു സെഷന്സ് കോടതിയുടെ നിലപാട്. വിഷയത്തില് ബിലാസ്പുരിലെ എന്ഐഎ കോടതിയെ സമീപിക്കാനും കോടതി നിര്ദേശിച്ചു.
കന്യാസ്ത്രീകള്ക്ക് ജാമ്യം ലഭിച്ചില്ലെന്ന് അറിഞ്ഞതോടെ കോടതിക്ക് പുറത്ത് ബജ്റങ്ദള് പ്രവര്ത്തകരുടെ വന് ആഘോഷപ്രകടനം അരങ്ങേറി. ജാമ്യാപേക്ഷ പരിഗണിക്കുമെന്ന വിവരമറിഞ്ഞ് ബുധനാഴ്ച രാവിലെ മുതല്തന്നെ ജ്യോതിശര്മ അടക്കമുള്ള നേതാക്കളുടെ നേതൃത്വത്തില് ബജ്റങ്ദള് പ്രവര്ത്തകര് കോടതിക്ക് മുന്നില് തടിച്ചുകൂടിയിരുന്നു.
കന്യാസ്ത്രീകള്ക്ക് ജാമ്യംനല്കരുതെന്ന് ആവശ്യപ്പെട്ട് പ്രവര്ത്തകര് മുദ്രാവാക്യവും മുഴക്കി. തുടര്ന്ന് കേസ് പരിഗണിച്ചതിന് പിന്നാലെ കന്യാസ്ത്രീകള്ക്ക് ജാമ്യം കിട്ടിയില്ലെന്ന് ബജ്റങ്ദളിന്റെ അഭിഭാഷകര് പുറത്തെത്തി അറിയിച്ചു. ഇതോടെയാണ് ബജ്റങ്ദള് പ്രവര്ത്തകര് കരഘോഷം മുഴക്കി മുദ്രാവാക്യം വിളികളുമായി ആഘോഷങ്ങള് ആരംഭിച്ചത്.
സിറോ മലബാര് സഭയുടെ കീഴില് ചേര്ത്തല ആസ്ഥാനമായ അസീസി സിസ്റ്റേഴ്സ് ഓഫ് മേരി ഇമ്മാക്യുലേറ്റ് (ഗ്രീന് ഗാര്ഡന്സ്) സന്ന്യാസസഭയിലെ സിസ്റ്റര്മാരായ വന്ദന, പ്രീതി എന്നിവരാണ് ഛത്തീസ്ഗഢില് അറസ്റ്റിലായത്. മതപരിവര്ത്തനവും മനുഷ്യക്കടത്തും ആരോപിച്ച് കഴിഞ്ഞ വെള്ളിയാഴ്ചയാണ് കന്യാസ്ത്രീകളെ ദുര്ഗ് റെയില്വേ സ്റ്റേഷനില്നിന്ന് പോലീസ് അറസ്റ്റ് ചെയ്തത്.
ആഗ്രയിലെ ഫാത്തിമ ആശുപത്രിയില് ജോലിചെയ്യുന്ന ഇവര് ഗാര്ഹിക ജോലികള്ക്കായി മൂന്നു പെണ്കുട്ടികളെ കൂട്ടിക്കൊണ്ടുപോകാനായി ദുര്ഗ് റെയില്വേ സ്റ്റേഷനില് ചെന്നതാണ്. ഒരു പെണ്കുട്ടിയുടെ സഹോദരനും കൂടെയുണ്ടായിരുന്നു. ഇതിനിടെ ബജ്റങ്ദള് പ്രവര്ത്തകര് ഇവരെ തടഞ്ഞുവെക്കുകയും പോലീസിനെ അറിയിക്കുകയുമായിരുന്നു.
ദുര്ഗിലെ ജയിലില് റിമാന്ഡില്കഴിയുന്ന കന്യാസ്ത്രീകള് കഴിഞ്ഞദിവസം ജാമ്യംതേടി മജിസ്ട്രേറ്റ് കോടതിയെ സമീപിച്ചെങ്കിലും ജാമ്യാപേക്ഷ കോടതി തള്ളിയിരുന്നു. ഇതിനുപിന്നാലെയാണ് ബുധനാഴ്ച സെഷന്സ് കോടതിയില് ജാമ്യാപേക്ഷ നല്കിയത്. അതിനിടെ, യുഡിഎഫ് എംപിമാര് കഴിഞ്ഞദിവസം കന്യാസ്ത്രീകളെ ജയിലിലെത്തി സന്ദര്ശിച്ചു. ബുധനാഴ്ച ഇടതുനേതാക്കളും എം.പിമാരും ജയിലിലെത്തി കന്യാസ്ത്രീകളുമായി സംസാരിച്ചു.
കോണ്ഗ്രസിന്റെ പ്രതിഷേധം
തിരുവനന്തപുരം/ന്യൂഡല്ഹി: ഛത്തീസ്ഗഢില് കന്യാസ്ത്രീകളെ അറസ്റ്റ് ചെയ്തതില് പ്രതിഷേധിച്ച് കോണ്ഗ്രസ് തിരുവനന്തപുരത്ത് രാജ്ഭവനിലേക്ക് പ്രതിഷേധ നടത്തം സംഘടിപ്പിച്ചു. പ്രതിപക്ഷ നേതാവ് വി.ഡി. സതീശന്, ദീപാദാസ് മുന്ഷി, രമേശ് ചെന്നിത്തല, കെപിസിസി അധ്യക്ഷന് സണ്ണി ജോസഫ് തുടങ്ങിയവര് നേതൃത്വം നല്കി. പ്രതിഷേധത്തിനിടെ കെ.സി. ജോസഫ് കുഴഞ്ഞുവീണു.
ബുധനാഴ്ച ലോക്സഭയിലും കോണ്ഗ്രസ് വിഷയം ഉന്നയിച്ചു. ബുധനാഴ്ച രാവിലെ പാര്ലമെന്റ് കവാടത്തില് യുഡിഎഫ് എംപിമാര് പ്ലക്കാര്ഡുകളുമായി പ്രതിഷേധിച്ചു. വിഷയത്തില് കേന്ദ്രസര്ക്കാര് അടിയന്തരമായി ഇടപെടണമെന്ന് കെ.സി. വേണുഗോപാല് സഭയില് ആവശ്യപ്പെട്ടു. ലോക്സഭയില് യുഡിഎഫ് എംപിമാര് നടുത്തളത്തിലിറങ്ങി പ്രതിഷേധിക്കുകയുംചെയ്തു.
Content Highlights: Two Kerala nuns arrested in Chhattisgarh for alleged forced conversions were denied bail.
Published: 30 Jul 2025, 12:48 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented