മുംബൈ: പ്രതിസന്ധി രൂക്ഷമായതോടെ ആഭ്യന്തര വിമാനക്കമ്പനിയായ ഗോ ഫസ്റ്റ് എയര്ലൈന്സ് മേയ് 15 വരെ ടിക്കറ്റ് വില്പ്പന നിര്ത്തിയതായി ഡയറക്ടര് ജനറല് ഓഫ് സിവില് ഏവിയേഷനെ (ഡിജിസിഎ) അറിയിച്ചു. പാപ്പരത്ത നടപടിക്കായി ദേശീയ കമ്പനി നിയമ ട്രിബ്യൂണലിന് (എന്.സി.എല്.ടി.) അപേക്ഷ നല്കിയതിന് പിന്നാലെ ഡി.ജി.സി.എയുടെ കാരണംകാണിക്കല് നോട്ടീസിനുള്ള മറുപടിയിലാണ് ഗോ ഫസ്റ്റ് ഇക്കാര്യം അറിയിച്ചത്.
കമ്പനിയുടെ അപേക്ഷയിന്മേല് ദേശീയ കമ്പനി നിയമ ട്രിബ്യൂണലിന്റെ തീരുമാനം അനുസരിച്ച് തുടര്നടപടികള് സ്വീകരിക്കുമെന്നാണ് ഗോ ഫസ്റ്റ് അറിയിച്ചതെന്ന് ഡിജിസിഎ പറഞ്ഞു. നിലവിലെ സാഹചര്യത്തില് ചട്ടത്തില് പറയുന്ന സമയപരിധിക്കുള്ളില് ടിക്കറ്റ് ബുക്ക് ചെയ്ത യാത്രക്കാര്ക്ക് മുഴുവന് പണവും തിരിച്ചുനല്കണമെന്നും ഡിജിസിഎ ഉത്തരവിട്ടിട്ടുണ്ട്.
അതിനിടെ, മേയ് ഒമ്പത് വരെ എല്ലാ വിമാന സര്വീസുകളും സസ്പെന്ഡ് ചെയ്തതായി ഗോ ഫസ്റ്റ് വാര്ത്താ കുറിപ്പിലൂടെ അറിയിച്ചു. സര്വീസുകളുടെ നടത്തിപ്പ് സാധ്യമാകാത്ത സാഹചര്യത്തിലാണ് നടപടിയെന്നും യാത്രയ്ക്ക് തടസം നേരിട്ടവര്ക്ക് ആവശ്യമായ സഹായം നല്കുമെന്നും കമ്പനി അധികൃതര് വ്യക്തമാക്കി. നേരത്തെ മേയ് മൂന്ന് മുതല് മൂന്ന് ദിവസത്തേക്ക് സര്വീസ് റദ്ദാക്കുന്നുവെന്നായിരുന്നു കമ്പനി അറിയിച്ചിരുന്നത്.
വാഡിയ ഗ്രൂപ്പിന്റെ ഉടമസ്ഥതയിലുള്ള ഗോ ഫസ്റ്റ് പാപ്പരത്തനടപടിക്കായി കഴിഞ്ഞ ദിവസമാണ് അപേക്ഷ നല്കിയിരുന്നത്. തകരാറിലായവയ്ക്ക് പകരമുള്ള എന്ജിനുകള് അമേരിക്കന് എന്ജിന് കമ്പനിയായ പ്രാറ്റ് ആന്ഡ് വിറ്റ്നി ലഭ്യമാക്കാത്തതാണ് പ്രതിസന്ധിക്ക് കാരണമെന്നാണ് ഗോ ഫസ്റ്റ് പറയുന്നത്. പാപ്പരത്തനടപടിക്ക് അപേക്ഷ നല്കിയത് കമ്പനി വില്ക്കാന് ഉദ്ദേശിച്ചല്ലെന്നും ബാങ്കുകള് ഏറ്റെടുക്കുന്നത് ഒഴിവാക്കാനും ആയിരക്കണക്കിനുപേരുടെ തൊഴില് സംരക്ഷിക്കാനുമാണ് നടപടിയെന്നും കമ്പനി വ്യക്തമാക്കിയിരുന്നു.
അഞ്ചുബാങ്കുകള്ക്ക് കിട്ടാനുള്ളത് 6,521 കോടി
ഗോ ഫസ്റ്റ് പാപ്പരത്തനടപടിയിലേക്കു നീങ്ങിയതോടെ പ്രതിസന്ധിയിലായി വായ്പ നല്കിയിട്ടുള്ള ബാങ്കുകള്. അഞ്ചുബാങ്കുകള് ചേര്ന്ന് 6,521 കോടി രൂപയുടെ വായ്പ നല്കിയിട്ടുണ്ടെന്നാണ് ഗോ ഫസ്റ്റിന്റെ പാപ്പരാകാനുള്ള അപേക്ഷയില് പറയുന്നത്. ബാങ്ക് ഓഫ് ബറോഡ, സെന്ട്രല് ബാങ്ക്, ഐ.ഡി.ബി.ഐ. ബാങ്ക്, ആക്സിസ് ബാങ്ക്, ഡോയിച്ചെ ബാങ്ക് എന്നിവയാണ് വായ്പ നല്കിയ ബാങ്കുകള്. ഈ ബാങ്കുകളെ അറിയിക്കാതെയാണ് ഗോ ഫസ്റ്റ് പാപ്പരത്തനടപടിക്ക് അപേക്ഷ നല്കിയത്.
Content Highlights: Cash-strapped Go First stops ticket sales till May 15
Published: 04 May 2023, 03:23 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented