തിയേറ്ററുകളിൽ വലിയ വിജയം നേടി പ്രദർശനം തുടരുന്ന രജനീകാന്ത് ചിത്രം 'ജയിലർ 2' വ്യാഴാഴ്ച ഒ.ടി.ടിയിലെത്തും. നേരത്തെ, ഒ.ടി.ടി. റിലീസ് പ്രഖ്യാപിക്കും മുമ്പ് ചിത്രത്തെക്കുറിച്ച് അഭ്യൂഹങ്ങൾ പ്രചരിച്ചിരുന്നു. 30 മിനിറ്റ് അൺകട്ട് വേർഷനാവും ഒ.ടി.ടിയിലെത്തുക എന്നായിരുന്നു പ്രചാരണം.

To advertise here,

എന്നാൽ, അൺകട്ട് വേർഷനോ ഒഴിവാക്കിയ രംഗങ്ങളോ ഒ.ടി.ടിയിൽ പ്രതീക്ഷിക്കുന്ന ആരാധകർക്ക് നിരാശപ്പെടേണ്ടി വരുമെന്നാണ് പുതിയ റിപ്പോർട്ടുകൾ. സ്ട്രീമിങ് പതിപ്പിൽ പ്രത്യേകമായി ഡിലീറ്റഡ് സീനുകൾ ഒന്നും ഉൾപ്പെടുത്തിയിട്ടില്ലെന്നാണ് റിപ്പോർട്ടുകൾ സൂചിപ്പിക്കുന്നത്.

രണ്ട് മണിക്കൂർ 45 മിനിറ്റാണ് തിയേറ്റർ പതിപ്പിന്റെ ദൈർഘ്യം. വ്യാഴാഴ്ച ആമസോൺ പ്രൈം വീഡിയോയിൽ റിലീസ് ചെയ്യുന്ന പതിപ്പിന്റെ ദൈർഘ്യം രണ്ട് മണിക്കൂർ 43 മിനിറ്റ് എന്നാണ് സ്ട്രീമിങ് പ്ലാറ്റ്‌ഫോമിൽ കാണിക്കുന്നത്. ഇതോടെ, ചിത്രത്തിൽ വെട്ടിപ്പോയ മോഹൻലാലിന്റെ സീനുകൾ ഉൾപ്പെടെ പ്രതീക്ഷിച്ചിരുന്ന ആരാധകർ നിരാശയിലായി. തിയേറ്റർ പതിപ്പിൽ ഉൾപ്പെടുത്താത്ത രംഗങ്ങൾ അണിയറപ്രവർത്തകർ പിന്നീട് പുറത്തുവിടുമോ എന്നാണ് ഇപ്പോൾ ആരാധകർ ഉറ്റുനോക്കുന്നത്.

നെൽസൺ ദിലീപ്കുമാർ സംവിധാനം ചെയ്ത ചിത്രം നാല് ആഴ്ചയ്ക്ക് ശേഷമാണ് ഒ.ടി.ടിയിലെത്തുന്നത്. നിർമാതാക്കളും ആമസോൺ പ്രൈം വീഡിയോയും തമ്മിലുള്ള കരാർ പ്രകാരമാണ് തിയേറ്റർ റിലീസിന് നാല് ആഴ്ചകൾക്ക് ശേഷം ചിത്രം ഒ.ടി.ടിയിൽ എത്തുന്നത്. ചിത്രം ഇതുവരെ 800 കോടി രൂപയിലധികം ആഗോള ഗ്രോസ് കളക്ഷൻ നേടിയതായാണ് റിപ്പോർട്ട്.

സൺ പിക്‌ചേഴ്‌സ് നിർമിച്ച ചിത്രത്തിൽ രമ്യാ കൃഷ്ണൻ, മോഹൻലാൽ, മിർണ, ശിവരാജ്കുമാർ, ഹൃതിക് റോഷൻ, വിദ്യാബാലൻ, മിഥുൻ ചക്രവർത്തി, എസ്.ജെ. സൂര്യ എന്നിവരാണ് പ്രധാന വേഷങ്ങളിൽ എത്തിയത്. അനിരുദ്ധ് രവിചന്ദർ ആണ് സംഗീത സംവിധാനം നിർവഹിച്ചത്.