ബോളിവുഡിൽ നന്നായി നൃത്തംചെയ്യുന്ന യുവതാരങ്ങളുടെ പട്ടികയെടുത്താൽ അക്കൂട്ടത്തിൽ മുന്നിലുണ്ടാവും ടൈ​ഗർ ഷ്റോഫ്. ഓൺസ്ക്രീനിനുപുറമേ താരസാന്നിധ്യമുള്ള സ്റ്റേജ് ഷോകളിലും ടൈ​ഗർ തന്റെ നൃത്തപാടവം പുറത്തെടുത്തിട്ടുണ്ട്. കഴിഞ്ഞദിവസം നടന്ന സീ സിനി അവാർഡ്സ്-2025 നോടനുബന്ധിച്ചും ടൈ​ഗറിന്റെ നൃത്തമുണ്ടായിരുന്നു. എന്നാൽ ഈ നൃത്തത്തിന്റെ പേരിൽ അതിരൂക്ഷമായ പരിഹാസമാണ് യുവതാരം ഇപ്പോൾ നേരിട്ടുകൊണ്ടിരിക്കുന്നത്.

To advertise here,

തന്റെ ചില ​ഗാനങ്ങൾക്കൊപ്പമാണ് ടൈ​ഗർ ഷ്റോഫ് പരിപാടിയിൽ നൃത്തം ചെയ്തത്. ഊർജസ്വലമായ നൃത്തച്ചുവടുകൾ ആരാധകരിൽ ആവേശം വാനോളമുയർത്തി. എന്നാൽ നൃത്തത്തിനപ്പുറം അദ്ദേഹത്തിന്റെ വസ്ത്രധാരണമായിരുന്നു ചർച്ചാവിഷയമായത്. തിളങ്ങുന്ന ലെതർ കറുത്ത പാന്റ്സിനൊപ്പം അധികം ഇറക്കമില്ലാത്ത സ്ലീവ് ലെസ് മെറ്റാലിക് മേൽവസ്ത്രമായിരുന്നു ടൈ​ഗർ ധരിച്ചിരുന്നത്. ഇതാകട്ടെ ഇറുകിപ്പിടിച്ചായിരുന്നു കിടന്നത്. താരത്തിന്റെ ഈ ഡ്രസ് കോമ്പിനേഷൻ ട്രോളാകാൻ അധികനേരമൊന്നും വേണ്ടിവന്നില്ല.

ഇതൊരു ബ്ലൗസാണോ അതോ ടോപ്പാണോ? എന്നാണ് പുറത്തുവന്ന വീഡിയോ കണ്ട ഒരു ഫോളോവർ ചോദിച്ചത്. തനിക്കും ഇതുപോലൊരു ടോപ്പുണ്ടെന്നും ബ്ലൗസ് കൊള്ളാമല്ലോ എന്നും ഏതെങ്കിലും നടിമാരുടെ വസ്ത്രവുമായി ടൈ​ഗറിന്റെ ഡ്രസ് മാറിപ്പോയതാണോ എന്നെല്ലാം നീളുന്നു പരിഹാസ കമന്റുകൾ.

എന്നാൽ അദ്ദേഹത്തെ പിന്തുണച്ചെത്തുന്ന പ്രതികരണങ്ങളും വരുന്നുണ്ട്. "ടൈഗർ ആ വേഷം അദ്ദേഹത്തിന് മാത്രം കഴിയുന്ന രീതിയിൽ ധരിച്ചു. അത് ബോൾഡ് ആണോ, വിചിത്രമാണോ, അതോ കണ്ണഞ്ചിപ്പിക്കുന്നതാണോ എന്ന് നിങ്ങൾ കരുതിയാലും, ആ മനുഷ്യൻ അത് തലയെടുപ്പോടെ ധരിച്ചു. അഞ്ച് ബാക്ക്ഫ്ലിപ്പുകൾ ചെയ്തിട്ടും താളം തെറ്റിച്ചില്ല. നിങ്ങൾ നൃത്തം കാണാൻ വന്നതാണോ അതോ വസ്ത്രധാരണത്തിലെ സസ്പെൻസിനായി നിന്നതാണോ എന്നത് പ്രശ്നമല്ല, ഒരുകാര്യം ഉറപ്പാണ്: അദ്ദേഹം നമുക്ക് ഓർമ്മിക്കാൻ ഒരു രാത്രി സമ്മാനിച്ചു." അദ്ദേഹത്തെ പിന്തുണച്ചുവന്ന ഒരു പ്രതികരണം ഇങ്ങനെയായിരുന്നു.

ബഡേ മിയാൻ ഛോട്ടേ മിയാൻ, സിം​ഗം എ​ഗെയ്ൻ എന്നിവയാണ് ടൈ​ഗർ ഷ്റോഫിന്റേതായി ഒടുവിൽ പുറത്തുവന്ന ചിത്രങ്ങൾ. ബാഘി-4 ആണ് താരത്തിന്റേതായി ഇനി വരാനിരിക്കുന്നത്.