നീണ്ട ഇടവേളയ്ക്കുശേഷം സംവൃതാ സുനിൽ സിനിമാലോകത്തേക്ക് മടങ്ങി വരുന്നു. 'തങ്കം' എന്ന ശ്രദ്ധേയ ചിത്രത്തിന് ശേഷം സംവിധായകൻ ഷഹീദ് അറഫാത്ത് സംവിധാനം ചെയ്യുന്ന ചിത്രത്തിലൂടെയാണ് നടിയുടെ തിരിച്ചുവരവ്. നവരസ ഫിലിംസിന്റെയും സ്റ്റോൺ ബെഞ്ച് സ്റ്റുഡിയോയുടെയും ബാനറിൽ ഒരുങ്ങുന്ന ചിത്രം പ്രഖ്യാപിച്ചു. സ്വിച്ച് ഓൺ, പൂജാച്ചടങ്ങുകൾ തിങ്കളാഴ്ച നടന്നു.

To advertise here,

നവരസ പ്രൊഡക്ഷൻ നമ്പർ 3 എന്ന് താത്കാലികമായി പേരിട്ടിരിക്കുന്ന ചിത്രം ശ്രീജിത്ത് കെ.എസും കാർത്തികേയൻ എസും ചേർന്നാണ് നിർമിക്കുന്നത്. ധിലോർ, റിജോഷ്, മോൻസി, ബ്ലെസി എന്നിവർ സഹനിർമാതാക്കളാണ്. 'കെട്ട്യോളാണ് എന്റെ മാലാഖ', 'അഡിയോസ് അമിഗോസ്' എന്നീ ചിത്രങ്ങളുടെ രചന നിർവഹിച്ച തങ്കം ആണ് ചിത്രത്തിന്റെ തിരക്കഥ.

ദിലീഷ് പോത്തൻ, അൽഫോൺസ് പുത്രൻ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങൾ. ജിബിൻ ഗോപിനാഥ്, അഭിജിത്ത് സുരേഷ്, അശ്വതി മനോഹരൻ, റിയാസ് ഖാൻ, ശ്രുതി ജയൻ, ബിസാൽ പ്രസന്ന എന്നിവരും ചിത്രത്തിന്റെ ഭാഗമാണ്.

'ആട് ജീവിതം' എന്ന ചിത്രത്തിന് ശേഷം സുനിൽ കെ.എസ്. ഛായാഗ്രഹണം നിർവഹിക്കുന്ന ചിത്രമാണിത്. 'ഗപ്പി', 'അമ്പിളി', 'ആശാൻ' എന്നീ ചിത്രങ്ങളുടെ സംവിധായകൻ ജോൺപോൾ ജോർജ് ചിത്രത്തിന് സംഗീതം ഒരുക്കുന്നു.

എക്‌സിക്യൂട്ടീവ് പ്രൊഡ്യൂസർ: അഭിജിത്ത് സുരേഷ്, എഡിറ്റർ: കിരൺ ദാസ്, ഒറിജിനൽ സ്‌കോർ: അജീഷ് ആന്റോ, പ്രൊഡക്ഷൻ ഡിസൈനർ: സുഭാഷ് കരുൺ, ചീഫ് അസോസിയേറ്റ് ഡയറക്ടർ: വിപിൻ വിജയൻ, പ്രൊഡക്ഷൻ കൺട്രോളർ: ബിനു മുരളി, ലൈൻ പ്രൊഡ്യൂസർ: അശ്വിൻ കെ.വി, മേക്കപ്പ്: റോണക്‌സ് സേവ്യർ, കോസ്റ്റ്യൂംസ്: ധന്യ ബാലകൃഷ്ണൻ, ഓൺലൈൻ മാർക്കറ്റിങ്: ഒബ്‌സ്‌ക്യൂറ, ഡിസൈൻസ്: യെല്ലോടൂത്ത്സ്, പി.ആർ.ഒ: വൈശാഖ് സി. വടക്കേവീട്, ജിനു അനിൽകുമാർ.