തിരുവനന്തപുരം: കാലമേറെക്കഴിഞ്ഞിട്ടും തിളക്കം കുറയാത്ത ഒരു ചുരികച്ചുഴറ്റുപോലെ 'ഒരു വടക്കന്‍ വീരഗാഥ' എന്ന ടൈറ്റില്‍ സ്‌ക്രീനില്‍ തെളിഞ്ഞു. 'ഇരുമ്പാണിക്കു പകരം മുളയാണിവെച്ചും, പൊന്‍കാരം കൊണ്ടു വിളക്കിയും' ചതി ഒളിപ്പിച്ച മാറ്റച്ചുരിക ആരോമലുണ്ണിയും കണ്ണപ്പനുണ്ണിയും വീണ്ടും കൈയിലെടുത്തു. പുത്തന്‍ തികവോടെ മലയാളത്തിന്റെ ചന്തു വീണ്ടും തിയേറ്ററില്‍ കൈയടി നിറച്ചു. പുത്തന്‍ സാങ്കേതികവിദ്യയില്‍ റീ-റിലീസ് ചെയ്ത 'ഒരു വടക്കന്‍ വീരഗാഥ'യാണ് ക്ഷണിക്കപ്പെട്ട സദസ്സില്‍ പ്രദര്‍ശിപ്പിച്ചത്.
ദൃശ്യ-ശ്രാവ്യ മികവോടെ എത്തിയ ചിത്രം നിറഞ്ഞ സദസ്സിലാണ് പ്രദര്‍ശിപ്പിച്ചത്. ഗൃഹലക്ഷ്മി പ്രൊഡക്ഷനുവേണ്ടി സിനിമ നിര്‍മിച്ച പി.വി.ഗംഗാധരന് ആദരമര്‍പ്പിച്ചാണ് നിളാ തിയേറ്ററില്‍ പ്രത്യേക പ്രദര്‍ശനം ഒരുക്കിയത്. മമ്മൂട്ടിയുടെ ഓരോ ഡയലോഗിനും കൈയടിയും ആര്‍പ്പുവിളിയും നിറഞ്ഞപ്പോള്‍ പുത്തന്‍ മമ്മൂട്ടി ചിത്രം റിലീസ് ചെയ്ത പ്രതീതിയായിരുന്നു തിയേറ്ററില്‍.
എം.ടി.-ഹരിഹരന്‍-മമ്മൂട്ടി കൂട്ടുകെട്ടിന്റെ നിത്യവിസ്മയമായ സിനിമ കാണാന്‍ പ്രതിപക്ഷ നേതാവ് വി.ഡി.സതീശന്‍, കോണ്‍ഗ്രസ് നേതാവ് എം.എം.ഹസന്‍, നടന്‍ സുധീര്‍ കരമന, മജീഷ്യന്‍ ഗോപിനാഥ് മുതുകാട് തുടങ്ങി നിരവധി പ്രമുഖര്‍ എത്തി. പി.വി.ഗംഗാധരന്റെ ഭാര്യ ഷെറിന്‍, മക്കളായ ഷെനുഗ, ഷെര്‍ഗ എന്നിവരും പ്രദര്‍ശനം കാണാനെത്തി. മമ്മൂട്ടി ഫാന്‍സ് അസോസിയേഷന്റെ നേതൃത്വത്തില്‍ തിയേറ്ററില്‍ കേക്ക് മുറിച്ചും ചെണ്ടമേളം നടത്തിയുമാണ് പ്രദര്‍ശനത്തെ വരവേറ്റത്.
Content Highlights: Mammootty`s Vadaakkan Veeragatha re-released to packed audience. Experience the classic Malayalam
Published: 13 Feb 2025, 07:53 am IST
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented