രാജമൗലി ചിത്രം ആർ.ആർ.ആറിനെ പ്രശംസിച്ച് ഹോളിവുഡ് താരം ക്രിസ് ഹെംസ്‌വർത്ത്. രാംചരണിനും ജൂനിയർ എൻ.ടി.ആറിനുമൊപ്പം അഭിനയിക്കാനുള്ള ആ​ഗ്രഹവും ക്രിസ് പ്രകടിപ്പിച്ചിട്ടുണ്ട്. ഓസ്ട്രേലിയൻ നടനായ ക്രിസ് ഹെംസ്‌വർത്ത് മാർവൽ ചിത്രങ്ങളിലെ 'തോർ' എന്ന സൂപ്പർഹീറോ കഥാപാത്രത്തിലൂടെയാണ് ജനപ്രിയനായത്. 

To advertise here,

ഈയടുത്താണ് ആർ.ആർ.ആർ കണ്ടതെന്ന് ക്രിസ് പറഞ്ഞു. രാം ചരണിന്റേയും ജൂനിയർ എൻ.ടി.ആറിന്റെയും പേരുകൾ ഓർമയില്ലാത്തതിൽ ക്ഷമ ചോദിച്ച ക്രിസ് ഇരു താരങ്ങളേയും പ്രശംസിച്ചു. ഇവർക്കൊപ്പം അഭിനയിക്കാനുള്ള ആ​ഗ്രഹവും നടൻ പ്രകടിപ്പിച്ചു. ഇവർക്കൊപ്പം പ്രവർത്തിക്കാൻ ഭാ​ഗ്യം ലഭിച്ചാൽ അത് ​ഗംഭീരമായിരിക്കുമെന്ന് ക്രിസ് പറഞ്ഞു. 

എക്സ്ട്രാക്ഷൻ 2 ആണ് ക്രിസ് ഹെംസ്‌വർത്ത് നായകനായെത്തുന്ന പുതിയ ചിത്രം. ഗംഭീര ആക്‌ഷൻ രംഗങ്ങളാൽ സമ്പന്നമായ ട്രെയിലർ ഈയടുത്ത് റിലീസ് ചെയ്തിരുന്നു. ജോ റൂസോയും ആന്റണി റൂസോയുമാണ് പുതിയ ഭാഗം എഴുതിയിരിക്കുന്നത്. സാം ഹാർഗ്രേവ് ആണ് ചിത്രം സംവിധാനം ചെയ്യുന്നത്.

2020 ൽ പുറത്തിറങ്ങിയ എക്‌സ്ട്രാക്ഷൻറെ രണ്ടാംഭാ​ഗമാണിത്. എക്‌സ്ട്രാക്ഷൻ ആദ്യഭാ​ഗത്തിൽ പങ്കജ് ത്രിപാഠി, രൺദീപ് ഹൂഡ, നേഹ മഹാജൻ, രുദ്രാക്ഷ ജെെവാൾ, സുദീപ്തോ ബാലവ് തുടങ്ങി ഒട്ടേറെ ഇന്ത്യൻ താരങ്ങളാണ് പ്രധാനവേഷത്തിലെത്തിയത്. 

ഗോൾഷിഫ്റ്റെ ഫറഹാനി, ആദം ബെസ്സ, ഡാനിയൽ ബെർൺഹാർഡ് എന്നിവരാണ് രണ്ടാം ഭാ​ഗത്തിലെ പ്രധാനതാരങ്ങൾ. ജോ റൂസ്സോ, ആന്റണി റൂസോ, ക്രിസ് ഹെംസ്‌വർത്ത് എന്നിവർ ചേർന്നാണ് ചിത്രം നിർമിക്കുന്നത്. ജൂൺ 16-ന് നെറ്റ്ഫ്ലിക്സിൽ സ്‌ട്രീമിങ് ആരംഭിക്കും.

നിരവധി ഹോളിവുഡ് താരങ്ങൾ ആർ.ആർ.ആറിനെ പ്രശംസിച്ച് രം​ഗത്തെത്തിയിട്ടുണ്ട്. കഴിഞ്ഞ ദിവസം ആർ.ആർ.ആറിന്റെ രണ്ടാം ഭാ​ഗത്തിൽ അഭിനയിക്കാനുള്ള ആ​ഗ്രഹം വെളിപ്പെടുത്തി ട്രാൻസ്ഫോമേഴ്സ് താരവും ​ഗായകനുമായ ടോബി വീ​ഗ്വേ എത്തിയിരുന്നു. 

ആർ.ആർ.ആർ തന്റെ പ്രിയപ്പെട്ട ചിത്രങ്ങളിൽ ഒന്നാണെന്ന് ടോബി പറഞ്ഞു. ​ആർ.ആർ.ആർ ​ഗംഭീരസിനിമയാണെന്ന് അഭിപ്രായപ്പെട്ട താരം ചിത്രത്തിന്റെ രണ്ടാം ഭാ​ഗം ഒരുക്കുകയാണെങ്കിൽ അതിൽ അഭിനയിക്കാൻ ആ​ഗ്രഹമുണ്ടെന്നും വെളിപ്പെടുത്തി. ജൂനിയർ എൻ.ടി.ആറിനെ പ്രകീർത്തിക്കാനും താരം മറന്നില്ല. ജൂനിയർ എൻ.ടി.ആർ അസാധാരണ പ്രതിഭയാണെന്നും ട്രാൻസ്ഫോമേഴ്സ് ഹിന്ദിയിൽ ഒരുക്കിയിരുന്നെങ്കിൽ തന്റെ വേഷം ചെയ്യാൻ യോജിച്ചത് ജൂനിയർ എൻ.ടി.ആർ ആണെന്നും ടോബി കൂട്ടിച്ചേർത്തു. 

സ്വാതന്ത്ര്യസമര സേനാനികളായ അല്ലൂരി സീതാരാമരാജു, കൊമരം ഭീം എന്നിവരുടെ കഥയാണ് ഫാന്റസിയുടെ അകമ്പടിയില്‍ രാജമൗലി 'ആര്‍.ആര്‍.ആറി'ല്‍ അവതരിപ്പിച്ചത്. രാമരാജുവായി രാംചരണ്‍ തേജയും കൊമരം ഭീം ആയി ജൂനിയര്‍ എന്‍.ടി.ആറുമാണ് എത്തിയത്. അജയ് ദേവ്ഗണ്‍, ആലിയാ ഭട്ട്, ശ്രീയാ ശരണ്‍, സമുദ്രക്കനി, ഒലിവിയാ മോറിസ്, റേ സ്റ്റീവന്‍സണ്‍ എന്നിവരാണ് മറ്റുവേഷങ്ങളിലെത്തിയത്.