തമിഴ്നാട് മുഖ്യമന്ത്രികൂടിയായ വിജയ്‌യേക്കുറിച്ചും അദ്ദേഹത്തിന്റെ അർപ്പണമനോഭാവത്തേക്കുറിച്ചും തുറന്നുപറഞ്ഞ് നിർമാതാവ് അർച്ചന കല്പാത്തി. അർച്ചനയും പങ്കാളിയായ എജിഎസ് എന്റർടെയ്ന്മെന്റ് നിർമിച്ച ബിഗിൽ എന്ന ചിത്രത്തെ മുൻനിർത്തിയായിരുന്നു അവർ ഇക്കാര്യം പറഞ്ഞത്. വലിയ നിർമ്മാണച്ചെലവ് കാരണം ബിഗിൽ സാമ്പത്തികമായി വിജയിച്ചോ എന്ന കാര്യത്തിൽ സോഷ്യൽ മീഡിയയിലും സിനിമാ വ്യവസായത്തിലും അരങ്ങേറിയിരുന്ന തർക്കങ്ങളെ അവർ തള്ളിക്കളഞ്ഞു. എജിഎസ് എന്റർടെയ്ന്മെന്റിന്റെ ചരിത്രത്തിലെ തന്നെ ഏറ്റവും കൂടുതൽ ലാഭം കൊയ്ത ചിത്രമാണ് 'ബിഗിൽ' എന്നും അർച്ചന വ്യക്തമാക്കി.

To advertise here,

തൻ്റെ പിതാവും നിർമാതാവുമായ കല്പാത്തി എസ്. അഘോരത്തെ കാണാൻ വിജയ്‌ ഇടയ്ക്കിടെ വീട്ടിൽ വരികയും ഒരുമിച്ച് പ്രവർത്തിക്കുന്നതിനെക്കുറിച്ച് നിരവധി ചർച്ചകൾ നടത്തിയിട്ടും അദ്ദേഹത്തെ കാണാൻ താൻ ഭയപ്പെട്ടിരുന്നെന്ന് ടൂറിംഗ് ടോക്കീസുമായുള്ള അഭിമുഖത്തിൽ, അർച്ചന പറഞ്ഞു. സൂപ്പർ താരമെന്ന നിലയിലാണ് അദ്ദേഹത്തെ കണ്ടിരുന്നത്. എന്നാൽ ഒരു മനുഷ്യനെന്ന നിലയിൽ സാധാരണക്കാരന്റെ പ്രതീക്ഷകൾക്കൊത്തുയരാൻ അവർക്ക് പലപ്പോഴും സാധിക്കാറില്ല. അതുകൊണ്ടാണ് വിജയ്‌യെ കാണാൻ ശ്രമിക്കാതിരുന്നത്. തന്നേക്കാളധികം തന്റെ ഭർത്താവാണ് വിജയ്‌യെ കണ്ടിട്ടുള്ളതെന്നും അർച്ചന വിശദീകരിച്ചു.

2019-ൽ ബിഗിൽ എന്ന ചിത്രത്തിലാണ് വിജയ്‌യും അർച്ചന കല്പാത്തിയും ഒരുമിച്ച് പ്രവർത്തിച്ചത്. തന്റെ പ്രതീക്ഷകൾക്കൊത്ത് ഉയരുക മാത്രമല്ല, തൊഴിൽപരമായ അച്ചടക്കം കൊണ്ടും വിനയം കൊണ്ടും വിജയ് തന്നെ അതിശയിപ്പിച്ചു. ബിഗിലിനായുള്ള വിജയ്‌യുടെ തയ്യാറെടുപ്പിൻ്റെ പ്രതിബദ്ധതയെയും അർച്ചന പ്രശംസിച്ചു. ബോഡി ഡബിളിനെ ആശ്രയിക്കുന്നതിനു പകരം കളിയുടെ ചലനങ്ങൾ സ്വയം പഠിക്കാൻ താരം നിർബന്ധം പിടിച്ചതായി അവർ പറഞ്ഞു.

"ഞാൻ അദ്ദേഹത്തോടൊപ്പം പ്രവർത്തിക്കാൻ തുടങ്ങിയപ്പോഴാണ്, അദ്ദേഹം നിങ്ങളുടെ പ്രതീക്ഷകൾക്ക് ഒത്തുയരുന്ന, അതിലും ഉപരിയായി അതിശയിപ്പിക്കുന്ന അപൂർവ്വം ചിലരിൽ ഒരാളാണെന്ന് ഞാൻ തിരിച്ചറിഞ്ഞത്. അദ്ദേഹത്തിൻ്റെ ജോലിയോടുള്ള ആത്മാർത്ഥത, അച്ചടക്കം, എല്ലാറ്റിനുമുപരിയായി അദ്ദേഹത്തിൻ്റെ ലാളിത്യം എന്നെ അത്ഭുതപ്പെടുത്തി. അദ്ദേഹം അവിശ്വസനീയമാംവിധം സാധാരണക്കാരനാണ്. അദ്ദേഹം സ്വന്തമായി കുട എടുക്കുന്നു, ചുറ്റും ആളുകളെ കൂട്ടുന്നില്ല. തൊഴിലിനോട് അദ്ദേഹത്തിന് ആത്മാർത്ഥമായ സ്നേഹമുണ്ട്, എപ്പോഴും മികച്ചത് നൽകാൻ അദ്ദേഹം ശ്രമിക്കുന്നു," അവർ പറഞ്ഞു.

"ഒരു ഫുട്ബോൾ കളിക്കാരനല്ലെങ്കിലും, ബിഗിലിലെ ഫുട്ബോൾ രംഗങ്ങൾ അഭിനയിക്കുന്നതിന് മുമ്പ് അദ്ദേഹം കളിയുടെ ചലനങ്ങൾ സ്വയം പഠിച്ചു. അദ്ദേഹം ഒരു ബോഡി ഡബിളിനെ ആശ്രയിച്ചില്ല. എല്ലാ ദിവസവും രാവിലെ 7.30ന് അദ്ദേഹം സെറ്റിൽ കൃത്യമായി എത്തുമായിരുന്നു - അദ്ദേഹത്തെക്കാൾ മുമ്പ് ഞങ്ങൾ എത്തേണ്ടി വരുമായിരുന്നു. കാരണം അദ്ദേഹം എപ്പോഴും സമയനിഷ്ഠ പാലിക്കുന്നയാളായിരുന്നു. ഷൂട്ട് ചെയ്യാൻ ഷെഡ്യൂൾ ചെയ്തത് എന്താണെന്ന് അദ്ദേഹത്തിന് കൃത്യമായി അറിയാമായിരുന്നു. ഡയലോഗ് ഷീറ്റുകൾ ഏകദേശം ഒരു ആഴ്ച മുമ്പ് അദ്ദേഹം ചോദിച്ചു വാങ്ങുമായിരുന്നു. എനിക്ക്, അത്തരം അച്ചടക്കമുള്ള ഒരു കലാകാരനോടൊപ്പം പ്രവർത്തിച്ചത് ഒരു അവിശ്വസനീയമായ അനുഭവമായിരുന്നു," അർച്ചനയുടെ വാക്കുകൾ.

വലിയ ബജറ്റിൽ ഒരുങ്ങിയതുകൊണ്ട് ചിത്രം നഷ്ടത്തിലാണെന്ന് കരുതുന്നവരുടെ ധാരണ പൂർണ്ണമായും തെറ്റാണെന്നും, സിനിമാ മേഖലയിലുള്ള എല്ലാവർക്കും ഈ ചിത്രത്തിന്റെ യഥാർത്ഥ ബിസിനസിനെക്കുറിച്ചും ബോക്സ് ഓഫീസ് കളക്ഷനെക്കുറിച്ചും കൃത്യമായി അറിയാമെന്നും അവർ ചൂണ്ടിക്കാട്ടി. ചിത്രത്തിന്റെ സാമ്പത്തിക വിജയത്തിന് പിന്നിലെ പ്രധാന കാരണം അതിന്റെ കൃത്യമായ ഫണ്ടിംഗ് രീതിയായിരുന്നു. ഉയർന്ന പലിശ ഈടാക്കുന്ന വ്യക്തിഗത ധനസഹായങ്ങൾക്ക് പകരം ബാങ്ക് പലിശയെ ആശ്രയിച്ചാണ് ഈ പ്രോജക്റ്റ് പൂർത്തിയാക്കിയത്. ഇത് ചിത്രത്തെ സാമ്പത്തികമായി കൂടുതൽ ശക്തമാക്കാൻ സഹായിച്ചുവെന്നും അർച്ചന കല്പാത്തി വ്യക്തമാക്കി.

അറ്റ്‌ലി സംവിധാനം ചെയ്ത 'ബിഗിൽ' വിജയ്‌യുടെ കരിയറിലെ തന്നെ ഏറ്റവും വലിയ ബ്ലോക്ക്ബസ്റ്ററുകളിൽ ഒന്നാണ്. ചിത്രത്തിൽ വിജയ് ഇരട്ട വേഷത്തിലാണ് പ്രത്യക്ഷപ്പെട്ടത്. നയൻതാര, ജാക്കി ഷ്രോഫ്, കതിർ, വിവേക്, യോഗി ബാബു, ഇന്ദുജ രവിചന്ദ്രൻ, ഡാനിയൽ ബാലാജി എന്നിവരായിരുന്നു ചിത്രത്തിൽ അണിനിരന്നത്. ഓസ്കാർ ജേതാവ് എ.ആർ. റഹ്മാനാണ് ചിത്രത്തിന് സംഗീതം നൽകിയത്.