മോഹൻലാൽ ഞങ്ങളെ ചേർത്തുപിടിച്ചു, ആ കണ്ണു നിറയുന്നത് ഞാൻ കണ്ടു- സത്യൻ അന്തിക്കാട്

ഗ്രാമത്തിൽനിന്ന് നഗരത്തിലേക്ക് ചേക്കേറിയ സിനിമാ പശ്ചാത്തലത്തെ കുറിച്ച്

ഇത് നാട്ടിൻപുറത്ത് നടക്കുന്ന ഒരു കഥയല്ലാത്തതുകൊണ്ട് തന്നെ കുറച്ച് ഭാഗം കൊച്ചിയിലും ബാക്കി പുണെയിലുമാണ് ചിത്രീകരിച്ചത്. അഖിൽ ഈ കഥയെ കുറിച്ച് പറയുമ്പോൾ മനസ്സിൽ തെളിഞ്ഞ ഇടമാണ് പുണെ. കാരണം ഒരു മിലിട്ടറി പശ്ചാത്തലമുള്ള സ്ഥലമാണത്. മിലിട്ടറി പശ്ചാത്തലം ഈ സിനിമയുടെ പിറകിലുമുണ്ട്. ലോക്കേഷൻ ചെന്ന് നോക്കിയപ്പോൾ എനിക്ക് വലിയ ഇഷ്ടമായി. കാരണം നിറയെ മരങ്ങൾ, പിന്നെ ആ നഗരത്തിന്റെ ഒരു ആംബിയൻസ്... അതൊക്കെ വച്ചുനോക്കുമ്പോൾ മുംബൈയെക്കാളും ബെംഗളൂരുവിനെക്കാളും പുണെ തന്നെയാണ് നല്ലത് എന്ന് തോന്നി. കഥാപരിസരം മാറിയെങ്കിലും എന്റെ കഥാപാത്രങ്ങൾ എപ്പോഴും ഇടത്തരക്കാരന്റെ മനസ്സുള്ള കഥാപാത്രങ്ങളാണ്. സന്ദീപ് ബാലകൃഷ്ണനും ഉള്ളിൽ ഒരു ഇടത്തരക്കാരനാണ്. സാമ്പത്തിക പ്രതിസന്ധികളോ കുടുംബ പ്രാരബ്ധങ്ങളോ  ഒന്നും ഈ കഥാപാത്രത്തിന് ഇല്ലെങ്കിലും അതിനെക്കാൾ സങ്കീർണമാണ് സന്ദീപിന്റെ ജീവിതം. ബാലഗോപാലന്‍റെയും ഗോപാലകൃഷ്ണപ്പണിക്കരുടെയും ഒക്കെ ഒരു സഹോദരനായിട്ട് സന്ദീപ് ബാലകൃഷ്ണനെ കാണാം. മറ്റ് ടെൻഷനുകൾ ഒന്നും ഇല്ലാതെ കുടുംബങ്ങൾക്ക് കണ്ട് ആസ്വദിക്കാനുള്ള ഒരു മോഹൻലാൽ ചിത്രവുമായി മലയാളികൾക്ക് മുന്നിൽ വരാൻ കഴിഞ്ഞു എന്നത് വലിയ സന്തോഷം. പിന്നെ മോഹൻലാലിന്റെ ആദ്യ സിങ്ക് സൗണ്ട് ചിത്രമാണ് 'ഹൃദയപൂർവ്വം' എന്ന ഒരു പ്രത്യേകത കൂടി ഈ ചിത്രത്തിനുണ്ട്. മോഹൻലാൽ അഭിനയിക്കുമ്പോളുള്ള ഓരോ ശ്വാസഗതിപോലും നമുക്ക് ഈ സിനിമയിൽ കേൾക്കാം.

'ഹൃദയപൂർവ്വ'ത്തിന്റെ സ്‌ക്രീനിലും അണിയറയിലും പുതിയ തലമുറയുടെ വൻനിരയുണ്ട്. ആ ഒരു മാറ്റത്തെക്കുറിച്ച്.

ഒരു ന്യൂജെൻ ടച്ച് 'ഹൃദയപൂർവ്വ'ത്തിന് ഉണ്ട്. ഈ സിനിമയുടെ ആശയം ചെറിയ കഥയുടെ രൂപമായി കഴിഞ്ഞപ്പോഴേക്കും അഖിൽ അവന്റെ 'സർവ്വംമായ' എന്ന സിനിമയുടെ തിരക്കുകളിലേക്ക് പോയി. അനൂപ് അവന്റെ, തുടങ്ങാൻ ആലോചിക്കുന്ന, ഒരു സിനിമയുടെ പണികളിലേക്കും നീങ്ങി. ആദ്യം വിചാരിച്ചത് ഞാൻ സ്വയം എഴുതാം എന്നാണ്. അങ്ങനെ ഒറ്റയ്ക്ക് എഴുതുകയാണെങ്കിൽ പോലും നമുക്ക് ആരോടെങ്കിലും സംസാരിക്കാൻ വേണം. മുമ്പാണെങ്കിൽ ലോഹിതദാസിനൊപ്പവും ശ്രീനിവാസനോടൊപ്പവും ഞാൻ കഥ ഡിസ്‌കസ് ചെയ്യാറുണ്ടായിരുന്നു. അവരുടെ കോൺട്രിബ്യൂഷൻസ് ഉപയോഗിക്കാറുണ്ടായിരുന്നു. ആ സാഹചര്യങ്ങൾ അടഞ്ഞുപോയപ്പോൾ പിന്നെ ഏത് എഴുത്തുകാരൻ എന്ന് ഞാൻ ആലോചിച്ചു. ആ ആലോചനയിലാണ് 'നൈറ്റ് കോൾ' എന്ന ഒരു ഷോർട്ട് ഫിലിം ചെയ്ത ടി.പി. സോനു ചിന്തയിലേക്ക് എത്തുന്നത്. പുതിയ തലമുറയുടെ കഥയാണ്, അപ്പോൾ പുതിയ ഒരാളോട് ഒന്ന് സംസാരിച്ച് നോക്കാം എന്ന് കരുതി. ആ ഡോക്യുമെന്ററി കണ്ട് വിളിച്ച് സംസാരിച്ച പരിചയം വച്ച് അവനെ വിളിച്ചു. ഒരു ചെറിയ കഥയുടെ ആശയം പറയാം, അതിൽ ഒരു സിനിമയാക്കാൻ പറ്റുന്ന ത്രെഡ് ഉണ്ടെങ്കിൽ നമുക്ക് ബാക്കി സംസാരിക്കാം എന്ന് മാത്രമേ തുടക്കത്തിൽ പറഞ്ഞുള്ളൂ. കഥ കേട്ടയുടൻ അവൻ അതിൽ ഇംപ്രസ്ഡ് ആയി. അവൻ വളരെ പോസ്റ്റീവ് വൈബ് ഉള്ള ഒരു പയ്യനാണ്. അങ്ങനെ ഞങ്ങൾ ഒന്നിച്ചിരുന്ന് അതിന്റെ തിരക്കഥ വർക്ക് ചെയ്യുകയും അവനോട് ഡയലോഗ് എഴുതാൻ പറയുകയും ഒക്കെ ചെയ്തു. സിനിമയിലേക്ക് തിരക്കഥാകൃത്ത് എന്ന നിലയിൽ ഒരാളെക്കൂടി അവതരിപ്പിക്കാൻ കഴിയുന്നു എന്നതിൽ സന്തോഷമുണ്ട്.

ക്യാമറാമാനായി അനു മൂത്തേടത്ത് വന്നു. യുവസംഗീത സംവിധായകരിൽ ഏറ്റവും മിടുക്കനായ ജസ്റ്റിൻ പ്രഭാകരൻ സംഗീത സംവിധാനം ഏറ്റെടുത്തു. മനു മഞ്ജിത്ത് എഴുതി. സംഗീത് പ്രതാപും മാളവിക മോഹനനും ഉൾപ്പെടെ പുതിയ അഭിനേതാക്കൾ എത്തി. യുവതലമുറയുടെ ആവേശമായ സിദ് ശ്രീരാം പാട്ടുപാടാൻ എത്തി. അങ്ങനെ ഹൃദയപൂർവ്വത്തിൽ ഭൂരിഭാഗം പുതിയ തലമുറയായി.

'കുറുക്കന്റെ കല്യാണം' മുതൽ ഇങ്ങോട്ട് 'ഹൃദയപൂർവ്വം' വരെ പല തലമുറകൾ താങ്കളുടെ സിനിമകൾ കണ്ടു. ജെൻസി കാലത്ത് സിനിമ ചെയ്യുന്നതിന്റെ ആശങ്കയുണ്ടോ.

തലമുറകൾ മാറുന്നതൊന്നും ഞാനറിയുന്നേയില്ല. ഇതുപോലെ പറയുമ്പോൾ അല്ലെങ്കിൽ ചോദിക്കുമ്പോളാണ് ഞാൻ അതിനെക്കുറിച്ച് ചിന്തിക്കുന്നത്. ഞാൻ 'കുറുക്കന്റെ കല്യാണം' തുടങ്ങിയിടത്ത് നിൽക്കുകയല്ലല്ലോ . ഞാനീ കേരളത്തിൽ തന്നെ ജീവിക്കുകയും എല്ലാ പുതിയ സിനിമക്കാരുടെയും സൃഷ്ടികൾ കാണുകയും അവരുടെ കൂടെ തന്നെ സഞ്ചരിക്കുകയും ചെയ്യുന്നതുകൊണ്ട് ഈ പറയുന്ന മാറ്റം ഞാൻ അറിയുന്നില്ല. കാലത്തിനും തലമുറകൾക്കും ഉണ്ടാവുന്ന മാറ്റം പോലെ തന്നെ ഞാനും മാറിക്കൊണ്ടിരിക്കുന്നു എന്നാണ് എനിക്ക് തോന്നുന്നത്. ആദ്യ സിനിമ എടുത്തപോലെയല്ല ഞാൻ 'ഹൃദയപൂർവ്വം' എടുക്കുന്നത്. അതിൽ ഈ പുതിയ തലമുറയുടെ എല്ലാ ഫീലിങ്​സുമുണ്ട്.

സാങ്കേതികമായി ഉണ്ടാവുന്ന മാറ്റങ്ങൾ പോലെ തന്നെ പ്രേക്ഷകരുടെ അഭിരുചിയിലും മാറ്റങ്ങൾ ഉണ്ടാവുന്നുണ്ട്. അത് സ്വാഭാവികമാണ് കാരണം ആളുകൾക്ക് അധികം ക്ഷമ ഇല്ലാതായി. നീട്ടി വലിച്ച് ഒരു കാര്യം പറയേണ്ട കാര്യമില്ല, വളരെ ക്രിസ്പ് ആയിട്ട് പറഞ്ഞാൽ മതി. ഇതൊക്കെ നമ്മൾ തന്നെ അറിയാതെ പഠിച്ചുവരുന്ന പാഠങ്ങളാണ്. ഒരു ജനറേഷൻ ഗ്യാപ്പ് എന്നെ സംബന്ധിച്ചിടത്തോളം ഫീൽ ചെയ്തിട്ടില്ല. അത്തരം ആശങ്കളുമില്ല. സംവിധാനം തുടങ്ങിയ സ്ഥലത്ത് നിന്നിട്ട് ഞാൻ ഒരു സീനിയർ മാനാണെന്ന് പറഞ്ഞ് പുതിയ തലമുറയെ ദൂരെ നിന്ന് നോക്കിക്കാണുമ്പോഴാണ് ആ ഒരു ടെൻഷൻ ഉണ്ടാവുക എന്ന് തോന്നുന്നു.

ശ്രീനിവാസന്റെ അസാന്നിധ്യം

'ടി.പി. ബാലഗോപാലൻ എംഎ'യിൽ തുടങ്ങിയതാണ് ഞങ്ങളുടെ കൂട്ടുകെട്ട്. ഒരു നീണ്ടകാലമാണ് ഞങ്ങൾ ഒരുമിച്ച് യാത്ര ചെയ്തത്. ശ്രീനിവാസൻ എന്ന സുഹൃത്ത് ഇല്ലായിരുന്നെങ്കിൽ ഒരിക്കലും ഇത്രയും നല്ല സിനിമകൾ എനിക്ക് ചെയ്യാൻ കഴിയില്ലായിരുന്നു. ഒപ്പം പ്രവർത്തിച്ചപ്പോൾ മാത്രമല്ല ശ്രീനിയോടൊപ്പം തിരക്കഥ ചർച്ചയ്ക്ക് ഇരുന്നപ്പോൾ ഞാൻ പഠിച്ച പാഠങ്ങൾ മറ്റ് എഴുത്തുകാരുടെ കഥകൾ സിനിമയാക്കിയപ്പോളും എന്നെ സഹായിച്ചിട്ടുണ്ട്. മുളന്തുരുത്തിയിൽ ഷൂട്ടിങ് നടക്കുമ്പോൾ ഒരു ദിവസം ശ്രീനിവാസൻ ലൊക്കേഷനിൽ വന്നിരുന്നു. മോഹൻലാൽ എന്നെയും ശ്രീനിവാസനെയും ചേർത്തുപിടിച്ചു. മോഹൻലാലിന്റെ കണ്ണ് നിറയുന്നത് ഞാൻ കണ്ടു.