ആളുകൾ എല്ലാം ശ്രദ്ധിക്കുന്നുണ്ട്, നമ്മളറിയാത്ത തെറ്റുകളും അവർ കണ്ടുപിടിക്കും- മഷർ ഹംസ

റെ‍ഡിമെയ്ഡ് ഒന്നും എടുക്കാതെ വസ്ത്രങ്ങൾ മുഴുവൻ തയ്ച്ച് എടുത്ത് ഒരു സിനിമ ചെയ്യണമെന്ന് എനിക്ക് ആ​ഗ്രഹമുണ്ടായിരുന്നു. റെെഫിൾ ക്ലബ്ബിലൂടെ അത് സാധിച്ചു. തൊണ്ണൂറുകളിലൊക്കെ നടക്കുന്ന കഥയാണ് ചിത്രം പറയുന്നത്. അതുകൊണ്ട് തന്നെ എല്ലാ കഥാപാത്രങ്ങളുടെ വസ്ത്രവും തയ്പ്പിച്ചതാണ്. ചിത്രത്തിൻ്റെ വർക്ക് ഒക്കെ ഏകദേശം കഴിഞ്ഞു. ചിത്രത്തിൻ്റെ അപ്ഡേറ്റ് വെെകാതെ വരും. 

ആളുകൾ എല്ലാം ശ്രദ്ധിക്കുന്നുണ്ട്, നമ്മളറിയാത്ത തെറ്റുകളും അവർ കണ്ടുപിടിക്കും

പടത്തിൻ്റെ ഷൂട്ട് നടക്കുമ്പോൾ ഭൂരിഭാ​ഗം സമയത്തും ലൊക്കേഷനിൽ ഉണ്ടാകും. ചില സമയത്ത് രണ്ട് ചിത്രങ്ങൾ ഒക്കെ ഒരുമിച്ച് ചിത്രീകരണം  നടക്കുമ്പോൾ മാത്രമാണ് പ്രയാസമുണ്ടാവുക. കോസ്റ്റ്യൂം ഡിസെെൻ ചെയ്തിട്ട് അഭിനേതാക്കളോട് പറയും. അവരുടെ നിർദേശങ്ങൾ കേൾക്കും. മാറ്റങ്ങൾ എന്തെങ്കിലും ഉണ്ടെങ്കിൽ അവർ പറയാറുണ്ട്.

മേക്കപ്പിനെക്കുറിച്ചും വസ്ത്രാലങ്കാരത്തെക്കുറിച്ചും ടെക്നിക്കൽ വശത്തെക്കുറിച്ചുമെല്ലാം ഇന്ന് ആളുകൾ ഭയങ്കരമായിട്ട് ശ്രദ്ധിക്കുന്നുണ്ട്. പണ്ടത്തെപ്പോലെയല്ല ഇന്ന്. ഓരോ ആൾക്കാർക്കും ഇന്ന് ഇഷ്ടമുള്ള മേക്കപ്പ് ആർട്ടിസ്റ്റും കോസ്റ്റ്യൂം ഡിസെെനറും ഒക്കെയുണ്ട്. എല്ലാവരേയും അവർ നിരീക്ഷിക്കാറുണ്ട്. എനിക്ക് ആളുകളുടെ മെസേജുകൾ ഒരുപാട് വരാറുണ്ട്. ഞാൻ പോലും ശ്രദ്ധിക്കാത്ത് ഒരുപാട് കാര്യങ്ങൾ ആളുകൾ മെസേജ് അയച്ച് പറയാറുണ്ട്. അവരെന്താണ് പറയുന്നതെന്ന് അറിയാനായി ഞാൻ എല്ലാ മെസേജുകളും വായിക്കാറുമുണ്ട്. സിനിമ എന്നും നിലനിൽക്കുന്ന ഒന്നാണല്ലോ. അതുകൊണ്ട് ചെയ്യുന്ന കാര്യം വൃത്തിക്ക് തന്നെ ചെയ്യാനാണ് ശ്രമിക്കുന്നത്.

ഒരുപാട് സിനിമകൾ കാണണം, സീനിൻ്റെ മൂഡ് മനസ്സിലാക്കണം

ഈ മേഖലയിലേയ്ക്ക് കടന്നുവരാൻ ആ​ഗ്രഹമുള്ള ഒരാൾ തീർച്ചയായും ധാരാളം സിനിമകൾ കാണണം. സിനിമ കാണുമ്പോൾ ഓരോ സീനിലും എന്താണ് കൊടുത്തിരിക്കുന്നതെന്ന് മനസ്സിലാക്കാം. ഓരോ സീനിനും ഓരോ മൂഡ് ഉണ്ട്. സിനിമ കാണുന്നവർക്ക് ആ സീൻ ഇമ്പാക്ട് ഉണ്ടാക്കണം. വസ്ത്രങ്ങൾ ആണെങ്കിലും മറ്റേത് പ്രോപ്പർട്ടി ആണെങ്കിലും മുഴച്ചുനിൽക്കാൻ പാടില്ല. സീനുമായി അത് ചേർന്നുപോകണം. വസ്ത്രങ്ങൾ എടുത്ത് കാണുകയാണെങ്കിൽ അത് സീനിന് ഡിസ്ട്രാക്ഷൻ ഉണ്ടാക്കും. ഓരോ സീനിന്റേയും മൂഡ്, കളർ, കോസ്റ്റ്യൂം ഒക്കെ മനസ്സിലാക്കിയാൽത്തന്നെ ഡിസെെനിങ് ചെയ്യാൻ പറ്റും.

കമ്മട്ടിപ്പാടത്തിലൂടെ അഭിനയത്തിലേയ്ക്ക്, ചെന്നെെയിൽ നിന്നും കോഴിക്കോട്ടേക്കുള്ള പാച്ചിൽ

സിനിമയിൽ അഭിനയിക്കുമ്പോൾ ആ സമയത്ത് വേറെ പരിപാടി ഒന്നും നടക്കില്ല. ആ ലൊക്കേഷനിൽ തന്നെ നിൽക്കേണ്ടിവരും. അപ്പോൾ കോസ്റ്റ്യൂം ഡിസെെൻ ചെയ്യുന്ന സിനിമകളുടെ ലൊക്കേഷനിലേയ്ക്ക് പോകാനാകില്ല. അതൊരു ബുദ്ധിമുട്ടാണ്.

തല്ലുമാലയിൽ അഭിനയിക്കാൻ നിന്ന സമയത്ത് അപ്പുറത്ത് രോമാഞ്ചത്തിൻ്റെ ഷൂട്ട് നടക്കുകയാണ്. രോമാഞ്ചത്തിൻ്റെ ആവശ്യത്തിനായി ഞാൻ ചെന്നെെയിലായിരുന്നു. ആ സമയത്ത് എനിക്ക് മനസ്സമാധാനം ഉണ്ടായിരുന്നില്ല. തല്ലുമാലയിൽ അഭിനയിക്കാനുള്ള രം​ഗമുണ്ടായിരുന്നു. ചെന്നെെയിൽ ആയിരുന്ന എന്നെ വന്നേ പറ്റൂവെന്ന് പറഞ്ഞ് ഫ്ലൈറ്റ് ടിക്കറ്റൊക്കെ എടുത്ത് നൽകി കോഴിക്കോട്ടേയ്ക്ക് കൊണ്ടുവന്നു.

അഭിനയത്തോട് ഇപ്പോൾ ഒരു എക്സെെറ്റ്മെന്റ് ഇല്ലാത്തതിന്റെ കാരണം അതാണ്. അഭിനയിക്കാൻ നിന്നാൽ എന്റെ മറ്റ് പരിപാടികളൊന്നും നടക്കില്ല. എനിക്ക് രണ്ടും കൂടി ഒരുമിച്ച് കൊണ്ടുപോകുന്നത് ടെൻഷനുള്ള കാര്യമായാണ് തോന്നുന്നത്.

വീട്ടുകാർ അറിഞ്ഞില്ല ഞാൻ സിനിമയിലാണെന്ന്

ഞാൻ സിനിമാക്കാരനാകാൻ പോകുന്നതിൽ വീട്ടിൽ നിന്ന് യാതൊരു തടസ്സവും ഉണ്ടായിരുന്നില്ല. കാരണം ഞാൻ എന്താണ് ചെയ്യുന്നതെന്ന് അവർക്ക് അറിയില്ലായിരുന്നു. ഞാൻ എറണാകുളത്ത് ആണെന്ന് മാത്രമേ അവർക്ക് അറിവുണ്ടായിരുന്നുള്ളു.

ആദ്യ ചിത്രം ഇറങ്ങി പത്രത്തിൽ വാർത്തയൊക്കെ വന്നപ്പോഴാണ് വീട്ടുകാർ കാര്യങ്ങൾ മനസ്സിലാക്കിത്തുടങ്ങുന്നത്. അതുവരെ ഡ്രസ്സിൻ്റെ ഡിസെെനിങ്ങാണ് എന്നൊക്കെയെ കരുതിയിരുന്നുള്ളു. എന്നോട് അതെക്കുറിച്ച് ചോദിക്കുകയോ ഞാൻ പറയുകയോ ചെയ്തിരുന്നില്ല. ആളുകൾ പറഞ്ഞൊക്കെയാണ് അവർ അറിയുന്നത്. ഇന്ന് എൻ്റെ കാര്യത്തിൽ അവർക്ക് അഭിമാനമുണ്ട്. ഉപ്പയുടെ കൂട്ടുകാരൊക്കെ എന്റെ പടമൊക്കെ കണ്ടിട്ടുണ്ടെന്ന് പറയുമ്പോൾ അവർക്ക് ഒരുപാട് സന്തോഷമാകും. ഉമ്മ തിയേറ്ററിൽ നിന്നും എൻ്റെ പടം കണ്ടിട്ടില്ല, ടിവിയിലാണ് കാണാറുള്ളത്.

സിനിമയിലെ കൂട്ടുകാർ ജീവിതത്തിലും, കരിയറിലെ നഷ്ടം

സിനിമ കരിയറിൽ സൗഹൃദങ്ങൾ ഒരുപാട് സഹായിച്ചിട്ടുണ്ട്. ഞാൻ വർക്ക് ചെയ്യുന്ന മിക്ക ചിത്രങ്ങളും സുഹൃത്തുക്കൾക്കൊപ്പമാണ്. സമീറിക്ക, സൗബിനിക്ക്, ഖാലിദ് റഹ്മാൻ എന്നിവരൊക്കെയായിട്ടാണ് ഇന്നും വർക്ക് ചെയ്യുന്നത്. സിനിമ കഴിഞ്ഞാലും കാണുന്നത് ഇവരെയൊക്കെയാണ്. സിനിമയില്ലെങ്കിലും ഇവരൊക്കെ തന്നെയാണ് ജീവിതത്തിലെ സുഹൃത്തുക്കൾ.

എന്റെ കരിയറിലെ ഏറ്റവും വലിയ നഷ്ടം 'ഭീഷ്മപർവ്വം' ചെയ്യാനാകാത്തതാണ്. ചിത്രത്തിലേയ്ക്ക് അമൽ ഏട്ടൻ (അമൽ നീരദ്) വിളിച്ചപ്പോൾ തിരക്ക് കാരണം എനിക്ക് 'നോ' പറയേണ്ടിവന്നു. അന്നങ്ങനെ പറഞ്ഞതിൽ പിന്നീട് എനിക്ക് കുറ്റബോധം തോന്നിയിട്ടുണ്ട്. അമൽ ഏട്ടൻ രണ്ടുമൂന്ന് വട്ടം വിളിച്ചിരുന്നു. അദ്ദേഹത്തിൻ്റെ പടത്തിൽ വർക്ക് ചെയ്യുമ്പോൾ നമ്മൾ മുഴുവൻ സമയവും കൂടെയുണ്ടാകണം. എനിക്ക് ആ സമയം വേറെ വർക്കുകൾ ഉണ്ടായിരുന്നു. പക്ഷേ ഒന്ന് ട്രെെ ചെയ്ത് നോക്കാത്തതിൽ പിന്നീട് നിരാശ തോന്നി. 

മോഹൻലാൽ, ആസിഫ്, ഫഹദ്- പുതിയ ചിത്രങ്ങൾ

ഞാൻ ആവേശത്തോടെ കാത്തിരിക്കുന്ന ചില ചിത്രങ്ങൾ വരാൻ പോകുകയാണ്. ആഷിഖ് ഇക്കയുടെ (ആഷിഖ് അബു) പുതിയ ചിത്രമായ റെെഫിൾ ക്ലബ്ബിൽ വർക്ക് ചെയ്യാൻ സാധിച്ചതിന്റെ ത്രില്ലിലാണ് ഞാൻ. ഫഹദ് ഇക്കയെ നായകനാക്കി അൽത്താഫ് സലീം സംവിധാനം ചെയ്യുന്ന ‘ഓടും കുതിര ചാടും കുതിര’, നസ്ലിനും ലുക്മാനും ഒന്നിക്കുന്ന ഖാലിദ് റ​ഹ്മാൻ ചിത്രം എന്നിവയുടെ വർക്കുകൾ പുരോഗമിക്കുകയാണ്.

''കാസർ​ഗോൾഡി’ന് ശേഷം ആസിഫ് ഇക്കയോടൊപ്പം (ആസിഫ് അലി) ‘അഡിയോസ് അമിഗോ’ എന്ന ചിത്രത്തിൽ ഒരുമിക്കുന്നുണ്ട്. ആഷിഖ് ഉസ്മാൻ നിർമിക്കുന്ന ചിത്രത്തിൽ സുരാജ് ഏട്ടനുമുണ്ട്. നഹാസ് നാസറാണ് സംവിധാനം. സിനിമയുടെ ഷൂട്ട് കഴിഞ്ഞു, വെെകാതെ റിലീസുണ്ടാകും. മറ്റ് ഇൻഡസ്ട്രിയിൽ നിന്ന് വിളികൾ വരാറുണ്ട്. പക്ഷേ  ഇവിടുത്തെ തിരക്കുകൾ കാരണം പോകാനായിട്ടില്ല.