കൈകൊണ്ടുതിരിക്കുന്ന പ്രൊജക്ടറിൽനിന്ന് മുന്നിലെ തുണിയിൽ പൂവിരിഞ്ഞപ്പോൾ, ഫാൽക്കേക്കും മുൻപേ നടന്നയാൾ

‘ഫോട്ടോയും പ്രൊജക്ടറും അക്കാദമിയിൽ സ്ഥാപിച്ചു’

കമൽ -സംവിധായകൻ, കേരളചലച്ചിത്ര അക്കാദമി മുൻ ചെയർമാൻ

കെ.ഡബ്ല്യു. ജോസഫ് എനിക്കും ഒരു വികാരമാണ്. ഞാൻ ചലച്ചിത്ര അക്കാദമി ചെയർമാനായിരിക്കെയാണ് ഒരു വാർത്ത കണ്ടത് -തൃശ്ശൂർ സപ്ന തിയേറ്റർ പൊളിക്കുന്നു, ആദ്യകാല പ്രൊജക്ടർ ആക്രിയാക്കി വിൽക്കാൻപോകുന്നെന്ന്. കാട്ടൂക്കാരൻ കുടുംബാംഗവുമായി സംസാരിച്ചു. അദ്ദേഹം പ്രൊജക്ടർ സൗജന്യമായി അക്കാദമിക്ക് നൽകി. തിരുവനന്തപുരത്ത് അക്കാദമിയിൽ കൊണ്ടുവന്ന് പ്രൊജക്ടർ പ്രവർത്തനക്ഷമമായ രീതിയിലാക്കി സ്ഥാപിച്ചു. കൂടെ ജോസഫിന്റെ ചിത്രവും അദ്ദേഹത്തെക്കുറിച്ചുള്ള വിവരണവും നൽകി. വിഗതകുമാരൻ സംവിധാനംചെയ്ത ജെ.സി. ഡാനിയേലിന്റെയും നായിക പി.കെ. റോസിയുടെയും കഥയാണ് സെല്ലുലോയ്ഡ് എന്ന എന്റെ സിനിമ. ഡാനിയേലും ജോസഫും തമ്മിൽ എന്തെങ്കിലും പരിചയമുണ്ടായിരുന്നതായി ഒരു രേഖയിലും എനിക്ക് കണ്ടെത്താനായില്ല. സിനിമയിൽ മനഃപൂർവം മാറ്റിനിർത്തിയതല്ല. ഒരുരംഗത്ത് വിഗതകുമാരൻ കാട്ടൂക്കാരന്റെ കൊട്ടകയിലും പ്രദർശിപ്പിച്ചുവെന്ന് പറയുന്നുമുണ്ട്. ജോസഫിനെക്കുറിച്ച് ഇനിയും സിനിമയ്ക്കും ഡോക്യുമെന്ററിക്കും സാധ്യതയുണ്ട്. ചരിത്രം പുതുതലമുറ അറിയേണ്ടതുണ്ട്. വൈകാരികതലങ്ങൾ ഉള്ള ജീവിതമുഹൂർത്തങ്ങളാണ് സിനിമയ്ക്ക്‌ ചേരുക. കാട്ടുക്കാരന് തീർച്ചയായും അങ്ങനെയുള്ള അനുഭവങ്ങളുണ്ടായിട്ടുണ്ടാവും. പക്ഷേ, നമുക്ക് രേഖകളോ തെളിവുകളോ ഇല്ല. അതിനാൽ കാട്ടുക്കാരന് കൂടുതൽ ചേരുക ഡോക്യുമെന്ററിയാണ്. കാട്ടുക്കാരന് സിനിമ ബിസിനസ് ആയിരുന്നു, മോശമെന്നല്ല. ഡാനിയേലിന് ഫാൽക്കെയെപ്പോലെയാകണമെന്ന വികാരമായിരുന്നു. ജോസഫിനെക്കുറിച്ച് ഡോക്യുമെന്ററിക്ക് ശ്രമം നടത്താവുന്നതാണ്. പക്ഷേ, പുതുതലമുറയ്ക്ക് താത്പര്യമുണ്ടാവുമോ, ഫണ്ടിങ്ങും പ്രശ്നമാണ്. ചലച്ചിത്ര അക്കാദമിക്ക് പ്രൊപ്പോസൽ നൽകി ചെയ്യാവുന്നതാണ്.

‘മക്കളുടെ ടാക്കീസിൽ പടം കണ്ട ഓർമ്മകളുണ്ട് ’

സി.എൽ. ജോസ് -നാടകാചാര്യൻ

കാട്ടൂക്കാരൻ ജോസഫ് ഞാൻ ജനിക്കുന്നതിനുമുൻപേ അന്തരിച്ചു. മൂത്തമകൻ വാറുവിന്റെ ടെന്റ് ടാക്കീസിൽ ചിത്രങ്ങൾ കണ്ടതിന്റെ ഓർമ്മയെനിക്കുണ്ട്. ഞാനന്ന് പുതുക്കാട്ട് മൂന്നാംക്ലാസിൽ പഠിക്കുകയാണ്. പുതുക്കാട്ട് കൊയ്ത്തുകഴിഞ്ഞ പാടത്ത് ടെന്റടിച്ചാണ് സിനിമ കളിക്കുക. മുന്നിൽ പൂഴിത്തറ, പിന്നിൽ ബെഞ്ച്. വെടിവെച്ചിട്ടൊരു കാട്ടുപോത്തിനുമേൽ കാൽകയറ്റിവെച്ച് തോക്കുംപിടിച്ച് നിൽക്കുന്ന കാട്ടൂക്കാരൻ വാറുവിന്റെ സ്ലൈഡ്‌ ആണ് ആദ്യംതന്നെ. ഒരു സിനിമ ഒരാഴ്ചയോളം ജ്ഞാനാംബിക, മിശിഹാചരിത്രം അങ്ങനെ കണ്ടത് ഓർമ്മയുണ്ട്. ചിത്രങ്ങൾ കളിക്കുന്നെന്ന് വിളിച്ചുപറഞ്ഞ് പ്ലക്കാർഡുമായി ഒരാൾ നടക്കും, ചെണ്ടകൊട്ടി വേറൊരാളും. തൃശ്ശൂര് ജോസ് തിയേറ്ററിൽ പടംകണ്ടതാണ് മറ്റൊരു ഓർമ്മ. പിന്നിൽ കസേരയ്ക്ക് എട്ടണ, ബെഞ്ചിന് നാലണ, തറയ്ക്ക് രണ്ടണ എന്നാണ് ടിക്കറ്റ് ചാർജ്. പടം അവസാനിക്കുന്ന ദിവസം പകുതിചാർജ്. വാഴ്‌കൈ കണ്ടത് ഓർമ്മയുണ്ട്. തറയിലിരുന്ന് കണ്ടു. രണ്ടാഴ്ച ഒരു സിനിമ. ആഴ്ച അവസാനം ശനിയാഴ്ച രാത്രി നാടകമാണ്. തിയേറ്റർ വാടകയ്ക്ക് നൽകുന്നതാണ്. സ്‌ക്രീൻ മാറ്റും, സ്റ്റേജ് കാണാം. കസേര മുന്നിലെത്തും, ബെഞ്ച് നടുവിൽ, തറ പിന്നിൽ -കാണാനൊക്കെ ബുദ്ധിമുട്ടാ. തിക്കുറിശ്ശിയും അഗസ്റ്റിൻ ജോസഫും സെബാസ്റ്റ്യൻ കുഞ്ഞുകുഞ്ഞു ഭാഗവതരും നാടകം കളിച്ചശേഷം പുറത്തേക്കുപോകുന്നത് കാണാനും എനിക്ക് ഇഷ്ടമായിരുന്നു