എങ്ങനെ ഞാൻ നായികയായി? 'ധബാരി ക്യൂരുവി'യിലെ നായിക മീനാക്ഷി സംസാരിക്കുന്നു

സംവിധായകൻ പ്രിയനന്ദനും നഞ്ചിയമ്മയ്ക്കുമൊപ്പം മീനാക്ഷി | ഫോട്ടോ: അറേഞ്ച്ഡ്

"എന്റെ പ്ലസ്‌ വൺ കാലത്താണ് ഒരു സിനിമാ ഷൂട്ടിം​ഗ് അട്ടപ്പാടിയിൽ നടന്നത്. അന്ന് നഞ്ചിയമ്മ എന്ന എന്റെ അട്ടപ്പാടിയിലെ മുത്തശ്ശി ഒരു പാട്ടുപാടി. അന്ന് എനിക്ക് നല്ല ആഗ്രഹമുണ്ടായിരുന്നു ആ മുത്തശ്ശിയെ കാണണം, സംസാരിക്കണം എന്നെല്ലാം. പക്ഷേ അത് ഒരിക്കലും നടക്കില്ല  എന്നുതോന്നി. അങ്ങനെ ഞാൻ അതെല്ലാം മറന്ന് എന്റെ പ്ലസ്‌ ടു പഠനം പൂർത്തിയാക്കി. അവസാനത്തെ പരീക്ഷ കഴിഞ്ഞ് വീട്ടിൽ വന്നതിന്റെ പിറ്റേന്ന് ഒരു ഫോൺ കാൾ വന്നു. നോക്കിയപ്പോൾ എനിക്ക് പരിചയമുണ്ടായിരുന്ന സിബിച്ചൻ മാഷായിരുന്നു. അന്ന് എന്നെ വിളിച്ചു പറഞ്ഞ കാര്യം ഇന്നും എന്റെ മനസ്സിൽ ഉണ്ട്. 'നിനക്ക് ഒരു സിനിമയിൽ അഭിനയിക്കാൻ പറ്റുമോ?, രണ്ട് ആദിവാസി പെൺകുട്ടികളെ ആവശ്യമുണ്ട്, നിനക്ക് പോകൻ പറ്റുമോ' എന്നായിരുന്നു മാഷ് ചോദിച്ചത്. സമ്മതംമൂളിയ അപ്പോൾ തന്നെ മാഷ് എന്നെ പുഴയുടെ കരയിൽ കൊണ്ട് പോയി ഒരു പരിചയപ്പെടുത്തൽ വീഡിയോ എടുത്ത് ഓഡിഷന് അയച്ചു."

ഈ ഓഡിഷനിൽ വിജയിച്ചതോടെയാണ് മീനാക്ഷി ധബാരി ക്യൂരുവിയിലെ നായികയായത്. എന്തു പറയണം എന്ന് അറിയില്ലായിരുന്നു എന്നതാണ് സത്യമെന്ന് മീനാക്ഷി പറയുന്നു. തന്നിലെ നടിയെ പുറത്ത് കൊണ്ട് വന്നത് സംവിധായകൻ പ്രിയനന്ദനൻ ആണെന്നും അഭിനയമല്ല ജീവിതമായിരുന്നു അദ്ദേഹം ആവശ്യപ്പെട്ടതെന്നും മീനാക്ഷി പറഞ്ഞു. എല്ലാവരും സത്യത്തിൽ ജീവിക്കുകയായിരുന്നു. സിനിമയുടെ ടീം നല്ല പിന്തുണയാണ് തന്നത്. ഒത്തിരി സന്തോഷമുണ്ട്. നമ്മൾ ഉറച്ച വിശ്വാസത്തോടെ ആഗ്രഹിച്ചാൽ അതുനേടിയെടുക്കാനാവും എന്നതാണ് തൻ്റെ ധബാരി ക്യൂരുവി അനുഭവമെന്നും മീനാക്ഷി കൂട്ടിച്ചേർത്തു.