ഇടക്കാലത്തുണ്ടായ വിലയിടിവിനുശേഷം അന്താരാഷ്ട്ര വിപണിയിലും ആഭ്യന്തര വിപണിയിലും സ്വർണവില വീണ്ടും ഉയർന്നേക്കുമെന്ന് സൂചന. ഓഗസ്റ്റ് മാസത്തിൽ മാത്രം 15 ശതമാനത്തിന്റെ വർധനയാണ് രേഖപ്പെടുത്തിയത്. സ്വർണ ഇ.ടി.എഫുകളിലേക്കുള്ള നിക്ഷേപം കൂടിയതും വിവിധ രാജ്യങ്ങളിലെ കേന്ദ്രബാങ്കുകൾ വൻതോതിൽ സ്വർണം വാങ്ങിക്കൂട്ടിയതുമാണ് പ്രധാന കാരണം.

To advertise here,

തിരിച്ചുവരവ്

ഈ വർഷത്തിന്റെ തുടക്കത്തിൽ ട്രോയ് ഔൺസിന് 5,500 ഡോളർ എന്ന റെക്കോഡ് നിലവാരത്തിലെത്തിയശേഷം സ്വർണവില 4,600 ഡോളറിലേക്ക് ഇടിഞ്ഞിരുന്നു. നിലവിൽ 15 ശതമാനം വർധനയോടെ സ്വർണം വീണ്ടും കരുത്താർജിക്കുകയാണെങ്കിലും ആഗോള വിപണിയിലെ റെക്കോഡ് വിലയേക്കാൾ 16 ശതമാനം താഴെയാണ് ഇപ്പോഴത്തെ നിരക്ക്.

ഇറാൻ യുദ്ധഭീതിയെത്തുടർന്ന് അസംസ്‌കൃത എണ്ണവില ഉയർന്നതും യു.എസ്. ഫെഡറൽ റിസർവ് പലിശനിരക്ക് ഉയർത്തിയേക്കുമെന്ന ആശങ്കയുമാണ് വിപണിയിൽ അസ്ഥിരതയുണ്ടാക്കിയത്.

വിലവർധനയ്ക്ക് പിന്നിലെ ഘടകങ്ങൾ

ഇ.ടി.എഫ്. നിക്ഷേപം: വേൾഡ് ഗോൾഡ് കൗൺസിലിന്റെ കണക്കുപ്രകാരം ആഗോളതലത്തിൽ സ്വർണ ഇ.ടി.എഫ്. (ETF) ഹോൾഡിങ്ങുകളിൽ വൻ വർധനയുണ്ടായി. ഓഗസ്റ്റിൽ മാത്രം 45 ടൺ സ്വർണമാണ് ഇ.ടി.എഫുകളിലേക്ക് അധികമായി എത്തിയത്.

കേന്ദ്രബാങ്കുകളുടെ കരുതൽ ശേഖരം: ലോകമെമ്പാടുമുള്ള കേന്ദ്രബാങ്കുകൾ സ്വർണനിക്ഷേപം ഉയർത്തുകയാണ്. രണ്ടാം പാദത്തിൽ മാത്രം 288.9 ടൺ സ്വർണം ബാങ്കുകൾ വാങ്ങി. മുൻവർഷത്തെ അപേക്ഷിച്ച് 62 ശതമാനം വർധനയാണിത്. ദക്ഷിണ കൊറിയ 13 വർഷത്തിനുശേഷം വീണ്ടും സ്വർണം വാങ്ങാൻ തുടങ്ങി.

പലിശനിരക്ക്: യു.എസ്. ഫെഡറൽ റിസർവ് പലിശനിരക്കിൽ തൽക്കാലം മാറ്റം വരുത്തില്ലെന്നാണ് നിക്ഷേപകരുടെ വിലയിരുത്തൽ. ഇത് സ്വർണനിക്ഷേപങ്ങൾക്ക് അനുകൂല അന്തരീക്ഷമൊരുക്കുന്നു.

കടപ്പത്ര തിരിച്ചെടുക്കൽ: യു.എസ്. ട്രഷറി ബോണ്ട് തിരിച്ചെടുക്കൽ (Bond Buyback) നാലു ബില്യൺ ഡോളറായി ഉയർത്തി. ഇതോടെ കടപ്പത്ര ആദായത്തിൽ കുറവുണ്ടാവുകയും സ്വർണത്തോടുള്ള താല്പര്യം കൂടുകയും ചെയ്തു.

ഡോളർ മൂല്യം: അന്താരാഷ്ട്ര വിപണിയിൽ ഡോളറിന്റെ മൂല്യം ഇടിഞ്ഞതോടെ മറ്റ് കറൻസികൾ ഉപയോഗിക്കുന്നവർക്ക് കുറഞ്ഞ വിലയ്ക്ക് സ്വർണം വാങ്ങാൻ അവസരമൊരുങ്ങി.

പ്രതിമാസ വർധന

15%

റെക്കോഡ് വില

$5,500

(ഒരു ഔൺസിന്)

കുറഞ്ഞ വില

(ഓഗസ്റ്റ്)

$4,600

രണ്ടാം പാദത്തിലെ

കേന്ദ്ര ബാങ്ക് വാങ്ങൽ

288.9 ടൺ

ഓഗസ്റ്റിലെ ETF 

വർധന

45 ടൺ

വില ഇനിയും കൂടുമോ?

നിക്ഷേപത്തിലെ വർധന: ഏഷ്യൻ രാജ്യങ്ങളിൽനിന്നുള്ള വാങ്ങലുകളും ഓവർ ദി കൗണ്ടർ (ഒ.ടി.സി.) ഇടപാടുകളും സ്വർണ നിക്ഷേപവളർച്ചയുടെ പ്രധാന ചാലകശക്തിയായി തുടരും.

ആഭരണ വിപണി: സ്വർണവില ഉയർന്നനിലയിൽ തുടരുന്നത് ആഭരണങ്ങളുടെ ആവശ്യകത കുറയാൻ ഇടയാക്കും.

ഖനനവും പുനരുപയോഗവും: വിലയിലുണ്ടാകുന്ന വർധന സ്വർണഖനനത്തിലോ പുനരുപയോഗത്തിലോ (Recycling) ഉടൻ കാര്യമായ മാറ്റങ്ങൾ വരുത്തില്ല.

ഇ.ടി.എഫ്. നിക്ഷേപം: പാശ്ചാത്യ രാജ്യങ്ങളിലെ ഇ.ടി.എഫ്. നിക്ഷേപം യു.എസ്. ഡോളറിന്റെ മൂല്യത്തിനും പലിശനിരക്ക് നയങ്ങൾക്കും അനുസരിച്ചാവും മാറുക.

ഭൗമരാഷ്ട്രീയ സംഘർഷങ്ങളും സാമ്പത്തിക അനിശ്ചിതത്വങ്ങളും നിലനിൽക്കുന്ന സാഹചര്യത്തിൽ, നിക്ഷേപ സന്തുലിതാവസ്ഥ ഉറപ്പാക്കാൻ (Portfolio Diversification) സ്വർണം മികച്ചൊരു മാർഗമാണ്. സ്വർണഖനന കമ്പനികളുടെ ഓഹരികളിൽ നിക്ഷേപിക്കാൻ അനുയോജ്യമായ സമയമാണിതെന്നും വിദഗ്ധർ ചൂണ്ടിക്കാട്ടുന്നു.