ജലാശയങ്ങൾ നശിപ്പിക്കുന്നതിന്റെ പേരിൽ ചർച്ചകളിൽ നിറയാറുള്ള സസ്യമാണ് കുളവാഴകൾ. എന്നാൽ കുളവാഴകളെ സാരി നിർമാണത്തിനായി ഉപയോ​ഗിക്കാൻ ഒരുങ്ങുകയാണ് പശ്ചിമ ബം​ഗാൾ. നിരവധി സ്ത്രീകൾക്ക് തൊഴിൽ സാധ്യത കൂടി ഉറപ്പാക്കുന്ന ഈ പദ്ധതിയിലൂടെ സ്ത്രീശാക്തീകരണം കൂടിയാണ് ലക്ഷ്യമിടുന്നത്. 

To advertise here,

സ്വഛത പുകാരെ, നേച്ചർ ക്രാഫ്റ്റി എന്നീ എൻജിഒ-കളാണ് പദ്ധതിക്ക് പിന്നിൽ. കുളവാഴകളിൽ നിന്നെടുക്കുന്ന ഫൈബറിൽ നിന്ന് തയ്യാറാക്കുന്ന നൂലുകളും ബം​ഗാളിലെ പരമ്പരാ​ഗത ടാന്റ് സാരികൾ തയ്യാറാക്കാൻ ഉപയോ​ഗിക്കുന്ന കോട്ടണും ഉപയോ​ഗിച്ചാണ് സാരി നിർമാണംമെന്ന് സ്വഛതാ പുകാരെയുടെ ഡയറക്ടർ ​ഗൗരവ് ആനന്ദ് പറയുന്നു. 

ജൂട്ടിൽ നിന്ന് ഫൈബർ വേർതിരിച്ചെടുക്കുന്നതിന് സമാനമായ രീതിയിലാണ് കുളവാഴകളിൽ നിന്നും ഫൈബർ വേർതിരിച്ചെടുക്കുക. തുടക്കത്തിൽ ആയിരത്തോളം സാരികളാണ് നിർമിക്കാനൊരുങ്ങുന്നത്. ജൂൺ, ജൂലൈയോടെ ഉത്പന്നം വിപണിയിലെത്തും. 

ഇരുനൂറോളം സ്ത്രീകൾക്കും പദ്ധതിയിലൂടെ തൊഴിൽ ലഭ്യമാക്കിയിട്ടുണ്ടെന്ന് ​ഗൗരവ് പറയുന്നു. പശ്ചിമബം​ഗാളിലെ വിവിധയിടങ്ങളിലുള്ള ഉപയോ​ഗശൂന്യമായ ജലാശയങ്ങളിൽ നിന്ന് കുളവാഴകൾ ശേഖരിക്കാൻ ഇവർക്ക് നിർദേശം നൽകിക്കഴിഞ്ഞു. 

വെള്ളത്തിൽ നിന്ന് കുളവാഴകൾ എടുത്തതിനു ശേഷം ഉണക്കിയെടുത്താണ് നേർത്ത ഫൈബറുകൾ വേർതിരിച്ചെടുത്ത് നൂൽനിർമാണത്തിനായി മാറ്റുന്നത്. ഇരുപതുലക്ഷത്തോളം രൂപയാണ് പദ്ധതിക്കായുള്ള മുതൽമുടക്കായി കണക്കാക്കുന്നത്. 

പദ്ധതി വിജയിച്ചാൽ തൊഴിൽ ലഭിച്ചിട്ടുള്ള സ്ത്രീകൾക്ക് മാസം തോറും അയ്യായിരം രൂപ വരെ നേടാനാവുമെന്നും ​ഗൗരവ് പറയുന്നു. ജലാശയങ്ങൾ സംരക്ഷിക്കപ്പെടുന്നതിനൊപ്പം സ്ത്രീകളുടെ തൊഴിലും ഉറപ്പു വരുത്തുകയാണ് പദ്ധതി വിഭാവനം ചെയ്യുന്നതെന്നും അദ്ദേഹം പറയുന്നു. 

Content Highlights: Saris made from water hyacinths to empower women