ഋഷി കപൂറുമായുള്ള രസകരമായ ഓര്മ പങ്കുവെച്ച് നടന് വീര് ദാസ്. ഒരു വിമാനയാത്രയ്ക്കിടയില് ഋഷി കപൂറിനേയും ഭാര്യയും നടിയുമായ നീതു കപൂറിനേയും കണ്ടുമുട്ടിയതിനെ കുറിച്ചും കേക്ക് കഴിക്കാന്വേണ്ടി നീതുവിനോട് ഋഷി വാശി പിടിച്ചതിനെ കുറിച്ചുമാണ് വീര് ദാസ് അഭിമുഖത്തില് പറഞ്ഞത്. സാക്ഷി ശിവ്ദാസാനിയും നൈന ഭാനും ചേര്ന്ന് അവതരിപ്പിക്കുന്ന 'മൊമന്റ് ഓഫ് സൈലന്സ്' എന്ന പോഡ്കാസ്റ്റില് സംസാരിക്കുകയായിരുന്നു വീര് ദാസ്.
'ഞാന് വിമാനത്തിലെ പിന്സീറ്റിലായിരുന്നു. മുന്വശത്തുള്ള ബിസിനസ് ക്ലാസില് ദമ്പതികള്ക്കിടയില് ചില തര്ക്കങ്ങള് നടക്കുന്നത് ഞാന് കേട്ടു. 'നിങ്ങള്ക്ക് കേക്ക് കഴിക്കാന് പറ്റില്ല' എന്ന് ഭാര്യ പറയുന്നതും അതിന് മറുപടിയായി, 'എനിക്ക് കേക്ക് കഴിക്കണം.' എന്ന് ഭര്ത്താവ് പറയുന്നതും കേട്ടു. 'നിങ്ങള്ക്ക് കേക്ക് കഴിക്കാന് അനുവാദമില്ല. ഡോക്ടര് കേക്ക് പാടില്ലെന്ന് പറഞ്ഞിട്ടുണ്ട്' എന്ന് വീണ്ടും ഭാര്യ പറയുന്നുണ്ട്. 'എനിക്ക് ആ കേക്ക് വേണം. എന്തൊരു കഷ്ടമാണിത്?' എന്ന് ചോദിച്ച് ആ ഭര്ത്താവ് എഴുന്നേറ്റു നിന്നു. അത് ഋഷി കപൂറായിരുന്നു.
ഋഷി എന്നെ കണ്ടതും എന്റെ അടുത്തേക്ക് നടന്നു വന്നു. എന്നിട്ട് തന്റെ കൂടെ സിനിമയില് വന്നവരുടെ ലിസ്റ്റ് അദ്ദേഹം എന്നോട് പറഞ്ഞു. ഈ കഥ പറയുന്നതിനിടയില് എന്റെ കേക്ക് ചൂണ്ടിക്കാട്ടിയിട്ട് 'നീ നിന്റെ കേക്ക് കഴിക്കുന്നുണ്ടോ?' എന്ന് ചോദിച്ചു. ഇല്ല എന്ന് പറഞ്ഞപ്പോള് ഋഷി കപൂര് എന്റെ കേക്ക് കഴിച്ചു.' - വിര് ദാസ് പറയുന്നു.
1980-ലാണ് ഋഷിയും നീതുവും വിവാഹിതരാകുന്നത്. രണ്ബീര് കപൂറും റിധിമ കപൂറുമാണ് മക്കള്. അച്ഛന്റേയും അമ്മയുടേയും വഴിയേ രണ്ബീറും ബോളിവുഡില് സ്വന്തമായി മേല്വിലാസമുണ്ടാക്കിയ നടനാണ്. അര്ബുദത്തോട് പോരാടി 2020 ഏപ്രിലിലാണ് ഋഷി കപൂര് അന്തരിച്ചത്.
Content Highlights: rishi kapoor and neetu kapoor once fought for a cake in flight
Published: 18 Jul 2025, 10:43 pm IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented