പവൻ കല്യാണും ഭാര്യ അന്ന കൊനിഡേലയും വേർപിരിയുന്നു

ആന്ധ്രാപ്രദേശ് ഉപമുഖ്യമന്ത്രിയും ജനസേന പാർട്ടി അധ്യക്ഷനും തെലുങ്ക് ചലച്ചിത്രരംഗത്തെ സൂപ്പർതാരവുമായ പവൻ കല്യാണും ഭാര്യ അന്ന കൊനിഡേലയും വേർപിരിയുന്നു. 13 വർഷം നീണ്ട ദാമ്പത്യ ജീവിതത്തിനൊടുവിലാണ് പരസ്പര സമ്മതത്തോടെയും ബഹുമാനത്തോടെയും ഇരുവരും വേർപിരിയാൻ തീരുമാനിച്ചത്.പവൻ കല്യാണിന്റെ രാഷ്ട്രീയ പാർട്ടിയായ ജനസേന പുറത്തുവിട്ട സംയുക്ത പ്രസ്താവനയിലൂടെയാണ് വ്യക്തിപരമായ ഈ സുപ്രധാന തീരുമാനം ഔദ്യോഗികമായി അറിയിച്ചത്. തങ്ങൾക്കിടയിലെ ദാമ്പത്യബന്ധം അവസാനിക്കുകയാണെങ്കിലും സുഹൃത്തുക്കളായി തുടരുമെന്നും മക്കളുടെ ഭാവി സുരക്ഷിതമാക്കുന്നതിനും അവരുടെ സന്തോഷത്തിനും തന്നെയായിരിക്കും പ്രഥമ പരിഗണനയെന്നും ഇരുവരും വ്യക്തമാക്കിയിട്ടുണ്ട്.

Read Also:കല്യാണത്തിൽ 'ജനറേഷൻ ഗ്യാപ്പ്'; കല്യാണ 'ആലോചന'യിലാണ് ജെൻസി 

തിങ്കളാഴ്ച രാത്രി വൈകി ജനസേനയുടെ ഔദ്യോഗിക മാധ്യമ വിഭാഗം വഴിയാണ് പവൻ കല്യാണും അന്നയും ഒപ്പിട്ട സംയുക്ത പ്രസ്താവന പുറത്തുവന്നത്. വൈകാരികവും എന്നാൽ അങ്ങേയറ്റം ഗൗരവമുള്ളതുമായ കാര്യങ്ങളാണ് ചുരുങ്ങിയ വാക്കുകളിൽ ഇരുവരും കുറിച്ചിരിക്കുന്നത്.

'ജീവിതത്തിന്റെ വലിയൊരു പങ്കും സന്തോഷത്തോടെയും പരസ്പര സ്‌നേഹത്തോടെയും പങ്കിട്ട ശേഷം, പരസ്പര ധാരണയോടും ബഹുമാനത്തോടും കൂടി വേർപിരിയാൻ ഞങ്ങൾ തീരുമാനിച്ചിരിക്കുന്നു. ഞങ്ങളുടെ വിവാഹബന്ധം ഇവിടെ അവസാനിക്കുകയാണെങ്കിലും, വരുംനാളുകളിൽ നല്ല സുഹൃത്തുക്കളായും ഞങ്ങളുടെ പ്രിയപ്പെട്ട മക്കളുടെ സ്‌നേഹനിധികളായ മാതാപിതാക്കളായും ഞങ്ങൾ തുടരും. മക്കളുടെ സന്തോഷത്തിനും അവരുടെ ക്ഷേമത്തിനുമായിരിക്കും ഞങ്ങളുടെ എപ്പോഴത്തെയും ഒന്നാമത്തെ മുൻഗണന.'

ജീവിതത്തിലെ ഈ നിർണായകമായ പരിവർത്തന ഘട്ടത്തിൽ തങ്ങളുടെയും കുടുംബത്തിന്റെയും സ്വകാര്യതയെ എല്ലാവരും മാനിക്കണമെന്ന് ഇരുവരും അഭ്യർത്ഥിച്ചു. കഴിഞ്ഞ 13 വർഷത്തോളമായി തങ്ങൾക്ക് നൽകിയ പിന്തുണയ്ക്കും സ്‌നേഹത്തിനും ആരാധകരോടും അഭ്യുദയകാംക്ഷികളോടും നന്ദി രേഖപ്പെടുത്താനും അവർ മറന്നില്ല.എന്നാൽ, ദീർഘകാലത്തെ ബന്ധം അവസാനിപ്പിക്കാനുണ്ടായ കാരണങ്ങളെക്കുറിച്ചോ, ഇതിന്റെ നിയമപരമായ നടപടിക്രമങ്ങളെക്കുറിച്ചോ സംയുക്ത പ്രസ്താവനയിൽ പരാമർശങ്ങളൊന്നുമില്ല.

റഷ്യൻ മോഡലും അഭിനേത്രിയുമായിരുന്ന അന്ന ലെസ്‌നെവയും പവൻ കല്യാണും തമ്മിലുള്ള ബന്ധത്തിന് വർഷങ്ങളുടെ പഴക്കമുണ്ട്. 2011-ൽ പുറത്തിറങ്ങിയ 'തീൻ മാർ' എന്ന സൂപ്പർഹിറ്റ് തെലുങ്ക് ചിത്രത്തിന്റെ ചിത്രീകരണത്തിനിടെയാണ് ഇരുവരും ആദ്യമായി കണ്ടുമുട്ടുന്നതും പരിചയപ്പെടുന്നതും. ചിത്രത്തിൽ ഒരു ചെറിയ വേഷത്തിൽ അന്നയും അഭിനയിച്ചിരുന്നു.

പരിചയം പിന്നീട് അടുത്ത സൗഹൃദത്തിലേക്കും പ്രണയത്തിലേക്കും വഴിമാറി. തുടർന്ന് 2013 ഡിസംബറിൽ ഹൈദരാബാദിൽ വെച്ച് ലളിതമായ ചടങ്ങുകളോടെ ഇരുവരും വിവാഹിതരായി. സാംസ്‌കാരികമായും ഭൂമിശാസ്ത്രപരമായും വലിയ വ്യത്യാസങ്ങളുണ്ടായിരുന്നിട്ടും അന്ന ഇന്ത്യൻ സംസ്‌കാരവും ആന്ധ്രയുടെ പാരമ്പര്യവും വേഗത്തിൽ ഉൾക്കൊണ്ടത് ഏറെ ശ്രദ്ധിക്കപ്പെട്ടിരുന്നു.

ഇവർക്ക് രണ്ട് മക്കളാണുള്ളത് മകൾ പോളെന അഞ്ചന പവനോവയും മകൻ മാർക്ക് ശങ്കർ പവനോവിച്ചും. പവൻ കല്യാണിന്റെ രാഷ്ട്രീയ ജീവിതത്തിലും വ്യക്തിജീവിതത്തിലും വലിയൊരു പിന്തുണയായി അന്ന എപ്പോഴും ഒപ്പമുണ്ടായിരുന്നു. അടുത്തിടെ സിംഗപ്പൂർ യൂണിവേഴ്‌സിറ്റിയിൽ നിന്ന് അന്ന ഉന്നത ബിരുദം നേടിയ ചടങ്ങിൽ പവൻ കല്യാൺ നേരിട്ടെത്തി പങ്കെടുത്തത് സമൂഹമാധ്യമങ്ങളിൽ വലിയ വാർത്തയായിരുന്നു.

ആന്ധ്ര രാഷ്ട്രീയത്തിലും തെലുങ്ക് സിനിമാ വ്യവസായത്തിലും ഒരേപോലെ സ്വാധീനമുള്ള നേതാവാണ് പവൻ കല്യാൺ. എങ്കിലും അദ്ദേഹത്തിന്റെ വ്യക്തിജീവിതം പലപ്പോഴും വാർത്തകളിൽ ഇടംപിടിച്ചിട്ടുണ്ട്. അന്ന ലെസ്‌നെവയുമായുള്ള ബന്ധം അദ്ദേഹത്തിന്റെ മൂന്നാമത്തെ വിവാഹമായിരുന്നു. 1997ൽ ആയിരുന്നു പവന്റെ ആദ്യ വിവാഹം. 1997ൽ നന്ദിനിയുമായുള്ള ആദ്യ വിവാഹത്തിന് ശേഷം 1999-ഓടെ ഇരുവരും വേർപിരിഞ്ഞു ജീവിക്കുകയായിരുന്നു. തുടർന്ന് 2009-ലാണ് പ്രശസ്ത നടിയും മോഡലുമായ രേണു ദേശായിയെ പവൻ കല്യാൺ വിവാഹം കഴിക്കുന്നത്. ഈ ബന്ധത്തിൽ അകിര നന്ദൻ എന്ന മകനും ആദ്യ എന്ന മകളുമുണ്ട്. 2012-ൽ രേണു ദേശായിയുമായുള്ള ബന്ധം നിയമപരമായി അവസാനിപ്പിച്ച ശേഷമാണ് 2013-ൽ അന്ന ലെസ്‌നെവ പവൻ കല്യാണിന്റെ ജീവിതസഖിയാകുന്നത്.

ആന്ധ്രാപ്രദേശ് സംസ്ഥാന രാഷ്ട്രീയത്തിൽ വലിയ ജനസമ്മതിയുള്ള ഉപമുഖ്യമന്ത്രിയാണ് പവൻ കല്യാൺ. 2024-ലെ നിയമസഭാ തെരഞ്ഞെടുപ്പിൽ തെലുഗുദേശം പാർട്ടി-ബി.ജെ.പി കൂട്ടുകെട്ടിനൊപ്പം ജനസേന തരംഗം സൃഷ്ടിച്ചപ്പോൾ പവൻ കല്യാൺ തടസ്സമില്ലാത്ത വിജയമാണ് നേടിയത്.

രാഷ്ട്രീയത്തിൽ ഇത്രയധികം തിരക്കുകൾ വർധിക്കുകയും സംസ്ഥാന ഭരണത്തിന്റെ സുപ്രധാന ചുമതലകൾ വഹിക്കുകയും ചെയ്യുന്ന ഘട്ടത്തിൽ തന്നെയാണ് പവൻ കല്യാണിന്റെ കുടുംബജീവിതത്തിലെ ഈ പുതിയ മാറ്റം. എങ്കിലും, ഭരണപരമായ കാര്യങ്ങളിലോ അദ്ദേഹത്തിന്റെ രാഷ്ട്രീയ പ്രവർത്തനങ്ങളിലോ വ്യക്തിപരമായ ഈ വിഷയം തടസ്സമാകില്ലെന്ന് ജനസേന പാർട്ടിയുമായി അടുത്ത കേന്ദ്രങ്ങൾ വ്യക്തമാക്കുന്നു. അതുപോലെതന്നെ, വൻകിട സിനിമകളുടെ ചിത്രീകരണവും റിലീസുകളും വരാനിരിക്കെ, തികച്ചും പക്വതയോടെയും പരസ്പര ബഹുമാനത്തോടെയുമാണ് ഇരുവരും വേർപിരിയൽ പ്രഖ്യാപിച്ചത്.