ബോളിവുഡിന്റെ ഗ്ലാമർ ലോകത്ത് താൻ നേരിടേണ്ടി വന്ന കയ്‌പേറിയ അനുഭവങ്ങളെക്കുറിച്ച് തുറന്നുപറഞ്ഞിരിക്കുകയാണ് നടി ശ്വേത കേസ്വാനി. ഒരു അഭിമുഖത്തിലാണ്, ഇൻഡസ്ട്രിയിലെ കാസ്റ്റിംഗ് കൗച്ച്, സ്ത്രീ സമത്വം, ലൈംഗികതയെക്കുറിച്ചുള്ള പൊതുബോധം, അതിരുകൾ നിശ്ചയിക്കേണ്ടതിന്റെ പ്രാധാന്യം എന്നിവയെക്കുറിച്ച് അങ്ങേയറ്റം ധീരവും അടിയുറച്ചതുമായ നിലപാടുകൾ ശ്വേത പങ്കുവെച്ചത്. തന്റെ പതിനാലാം വയസ്സിൽ ഒരു ഐസ്‌ക്രീം പരസ്യത്തിലൂടെയാണ് ശ്വേത അഭിനയരംഗത്തേക്ക് കടന്നുവരുന്നത്. തുടക്കത്തിൽ കോളേജ് പഠനകാലത്തെ ചെറിയൊരു പോക്കറ്റ് മണി കണ്ടെത്താനായി തുടങ്ങിയ ഈ യാത്ര, പിന്നീട് ടെലിവിഷൻ ലോകത്തെ വൻ വിജയങ്ങളിലേക്ക് നയിക്കുകയായിരുന്നു. അന്നത്തെ കാലത്ത് സാങ്കേതിക സൗകര്യങ്ങളോ സ്മാർട്ട്‌ഫോണുകളോ ഇല്ലായിരുന്നെങ്കിലും, സിനിമാ-സീരിയൽ രംഗത്ത് സുരക്ഷിതമല്ലാത്ത അന്തരീക്ഷം നിലനിന്നിരുന്നു. അമ്മ എപ്പോഴും തനിക്കൊപ്പം സെറ്റുകളിൽ വരുമായിരുന്നതിനെക്കുറിച്ചും എന്നാൽ പിന്നീട് സ്വന്തമായി തീരുമാനങ്ങളെടുക്കാനും 'നോ' എന്ന് ഉറക്കെ പറയാനുമുള്ള പ്രാപ്തി താൻ കൈവരിച്ചതിനെക്കുറിച്ചും ശ്വേത ഓർത്തെടുക്കുന്നു. 'താര', 'കഹാനി ഘർ ഘർ കീ' തുടങ്ങിയ ഹിറ്റ് പരമ്പരകളിലൂടെ രാജ്യമെമ്പാടുമുള്ള ടെലിവിഷൻ പ്രേക്ഷകരുടെ പ്രിയങ്കരിയായി മാറാൻ ശ്വേതയ്ക്ക് അധിക സമയം വേണ്ടിവന്നില്ല.

To advertise here,

കാസ്റ്റിംഗ് കൗച്ച്

അഭിമുഖത്തിലുടനീളം താൻ നേരിട്ട പീഡനശ്രമങ്ങളെയും മോശം പെരുമാറ്റങ്ങളെയും കുറിച്ച് വളരെ കൃത്യമായ ഭാഷയിലാണ് ശ്വേത സംസാരിച്ചത്. പ്രമുഖരായ പ്രൊഡ്യൂസർമാരിൽ നിന്നും സംവിധായകരിൽ നിന്നും നേരിടേണ്ടി വന്ന അപമാനകരമായ അനുഭവങ്ങൾ അവർ തുറന്നുപറഞ്ഞു. ഒരിക്കൽ ഒരു പ്രൊഡ്യൂസർ തന്നോട് സംസാരിക്കുമ്പോൾ കണ്ണുകളിൽ നോക്കാതെ നെഞ്ചിലേക്ക് നോക്കി സംസാരിച്ചപ്പോൾ പ്രതികരിച്ചതിനെക്കുറിച്ച് അവർ പറഞ്ഞു-, 'എന്റെ കണ്ണുകളിൽ നോക്കി സംസാരിക്കാൻ സാധിക്കുമോ?' എന്ന് മുഖത്തുനോക്കി ചോദിക്കാൻ ശ്വേത മടിച്ചില്ല. ഡിന്നറിന് ശേഷം നിന്റെ സ്ഥലത്തേക്ക് പോകണോ എന്റെ സ്ഥലത്തേക്ക് പോകണോയെന്ന് ദ്വയാർത്ഥത്തിൽ ചോദിച്ച പ്രൊഡ്യൂസർക്ക്, നിങ്ങളുടെ സ്ഥലത്തേക്കും ഞാൻ എന്റെ സ്ഥലത്തേക്കും പോകും എന്ന് മറുപടി നൽകി തിരിഞ്ഞുനടന്ന അനുഭവവും അവർ പങ്കുവെച്ചു. അതുപോലെ അന്ധേരിയിലെ പെട്രോൾ പമ്പിൽ വെച്ച് താൻ ഷോർട്‌സ് ധരിച്ചതിനെ കളിയാക്കുകയും മറ്റുള്ളവരെ വിളിച്ച് കാണിക്കുകയും ചെയ്ത വ്യക്തിയുടെ ചെകിട്ടത്തടിച്ച സംഭവം ശ്വേത വിവരിച്ചു. ഭയപ്പെടാതെ സ്വന്തം അതിരുകൾ കൃത്യമായി വരയ്ക്കുകയും അനാവശ്യമായ പെരുമാറ്റങ്ങൾക്ക് ഇടനൽകാതിരിക്കുകയും ചെയ്യുക എന്നത് തന്നെയാണ് ഇത്തരം സാഹചര്യങ്ങളെ നേരിടാനുള്ള വഴിയെന്ന് അവർ ഉറപ്പിച്ചുപറയുന്നു.

കെമിസ്്ട്രി പാർട്ടികളും വ്യക്തിസ്വാതന്ത്ര്യവും

അമേരിക്ക പോലുള്ള പാശ്ചാത്യ നാടുകളിൽ നിലനിൽക്കുന്ന 'കെമിസ്ട്രി പാർട്ടികളെ'ക്കുറിച്ചും ഓപ്പൺ മാര്യേജുകളെക്കുറിച്ചും ശ്വേത കൃത്യമായ വിശദീകരണം നൽകുന്നുണ്ട്. ഇത്തരം പാർട്ടികളിലേക്ക് തനിയെ പ്രവേശനമില്ലെന്നും വിവാഹിതരായ അല്ലെങ്കിൽ ദമ്പതികളായവർക്ക് മാത്രമേ പങ്കെടുക്കാൻ സാധിക്കൂ എന്നും അവർ പറയുന്നു. 30 മുതൽ 60 വയസ്സ വരെ പ്രായമുള്ള ആളുകൾ ഇത്തരം കൂട്ടായ്മകളിൽ പങ്കുചേരാറുണ്ട്. എന്നാൽ ഇതൊരു റാൻഡം പ്രക്രിയയല്ല; കൃത്യമായ പശ്ചാത്തല പരിശോധനകൾക്കും മുൻപ് പങ്കെടുത്തവരുടെ ശുപാർശകൾക്കും ശേഷം മാത്രമേ ഇതിലേക്ക് പ്രവേശനം ലഭിക്കൂ. പാർട്ടികളിൽ എത്തുന്ന ദമ്പതികൾ മറ്റ് കപ്പിൾസുമായി പരിചയപ്പെടുകയും സ്വന്തം താല്പര്യങ്ങളും അതിരുകളും പരസ്പരം വ്യക്തമാക്കുകയും ചെയ്യുന്നു. ഒരു സ്ത്രീക്ക് മറ്റൊരു സ്ത്രീയെയോ അല്ലെങ്കിൽ മറ്റൊരു പുരുഷനെയോ ഇഷ്ടപ്പെടാം. ഭർത്താക്കന്മാർ അത് സമ്മതിക്കുകയും പരസ്പരം കാണുകയോ ഒന്നിക്കുകയോ ഒക്കെ ചെയ്യുന്നു. ഇത്തരം ജീവിതരീതി നയിക്കുന്ന പലർക്കും ശക്തമായ ദാമ്പത്യബന്ധവും കുട്ടികളുമൊക്കെ ഉണ്ടാകുമെന്നും അവർ പരസ്പരം ആഴത്തിൽ സ്‌നേഹിക്കുന്നവരാണെന്നും ശ്വേത ചൂണ്ടിക്കാണിക്കുന്നു. പാർട്ടികളിൽ പോയി ആസ്വദിക്കുമെങ്കിലും അത് അവിടെ ഉപേക്ഷിച്ച് തിരികെ വീട്ടിലെത്തി കുട്ടികളെ നോക്കുകയും സാധാരണ ജീവിതം നയിക്കുകയും ചെയ്യുന്നവരാണ് ഇവർ. പരസ്പര വഞ്ചനയോ ഒളിച്ചോട്ടമോ ഇല്ലാതെ, അസൂയയോ സുരക്ഷിതത്വമില്ലായ്മയോ ഇല്ലാതെ ദാമ്പത്യത്തിൽ കൂടുതൽ അടുപ്പം പുലർത്താൻ ഇത് സഹായിക്കുന്നുവെന്നാണ് അവർ വ്യക്തമാക്കുന്നത്.

നടി ഷഹാന ഗോസ്വാമി തനിക്ക് ഒരേസമയം 5 പങ്കാളികൾ ഉണ്ടെന്നും അവർക്കെല്ലാം പരസ്പരം അറിയാമെന്നും വെളിപ്പെടുത്തിയപ്പോൾ സോഷ്യൽ മീഡിയയിൽ ഉയർന്ന അധിക്ഷേപങ്ങൾക്കെതിരെയും ശ്വേത ശക്തമായി പ്രതികരിച്ചു. പങ്കാളികൾക്കെല്ലാം കാര്യങ്ങൾ വ്യക്തമായി അറിയാം എന്നതിനാൽ അവിടെ ആരും ആരെയും വഞ്ചിക്കുന്നില്ലെന്ന് അവർ സമർത്ഥിക്കുന്നു. മറ്റുള്ളവരുടെ കാര്യങ്ങളിൽ ഇടപെടുവാൻ പോകുന്ന ആളുകൾക്ക് സ്വന്തം ജീവിതത്തിൽ ഒന്നും ചെയ്യാനില്ലാത്തതുകൊണ്ടാണ് ഇങ്ങനെയുള്ള മോശം കമന്റുകൾ ഇടുന്നതെന്നും സ്വന്തമായി ഇത് ചെയ്യാൻ കഴിയാത്തതിന്റെ അസൂയയായിരിക്കും ഇതിന് പിന്നിലെന്നും ശ്വേത തുറന്നടിച്ചു. പുരുഷന്മാർ അവിഹിത ബന്ധങ്ങൾ വെച്ചുപുലർത്തുമ്പോൾ ആരും ഒന്നും പറയില്ലെന്നും, എന്നാൽ ഒരു സ്ത്രീ ലൈംഗികമായി സജീവമാകുമ്പോൾ അവൾക്കെതിരെ അധിക്ഷേപങ്ങളുമായി എത്തുന്ന രീതി വലിയൊരു ഇരട്ടത്താപ്പാണെന്നും അവർ എടുത്തുപറഞ്ഞു.

തന്റെ ജീവിതത്തിൽ ഉണ്ടായിട്ടുള്ള വൺ നൈറ്റ് സ്റ്റാൻഡ് അനുഭവങ്ങളെക്കുറിച്ചും ശ്വേത ഒട്ടും മടിയില്ലാതെ സംസാരിച്ചു. ജീവിതത്തിൽ ഒന്നോ രണ്ടോ തവണ മാത്രമേ താൻ അങ്ങനെ ചെയ്തിട്ടുള്ളൂ എന്നും, തികച്ചും അപരിചിതരായ ആളുകളുമായി പെട്ടെന്ന് ബന്ധത്തിൽ ഏർപ്പെടാൻ തനിക്ക് കഴിയില്ലെന്നും അവർ പറയുന്നു. അതിനെ 'Stranger Danger' എന്നാണ് ശ്വേത വിശേഷിപ്പിച്ചത്. ആ വ്യക്തിയെ ആഴ്ചകളോ മാസങ്ങളോ ആയി കുറച്ചെങ്കിലും അറിഞ്ഞിരിക്കണം എന്ന നിർബന്ധം അവർക്കുണ്ടായിരുന്നു. തനിക്ക് മാനസികമായി ഒരു ആകർഷണം തോന്നിയാൽ മാത്രമേ ഏതൊരു ബന്ധത്തിലേക്കും കടക്കാറുള്ളൂ എന്നും അങ്ങനെ തുടങ്ങിയ ബന്ധങ്ങളിൽ പലതും പിന്നീട് ദീർഘകാല സൗഹൃദങ്ങളോ ചെറിയ റിലേഷൻഷിപ്പുകളോ ആയി മാറിയിട്ടുണ്ടെന്നും അവർ വെളിപ്പെടുത്തി. ഒരു വ്യക്തിയോടൊപ്പം കിടപ്പറ പങ്കിട്ടപ്പോൾ ലൈംഗികമായി തൃപ്തി നൽകാൻ അയാൾക്ക് കഴിഞ്ഞില്ലെങ്കിൽ, 'നീ ബെഡിൽ വളരെ മോശമാണ്, എനിക്ക് നിന്നെ വീണ്ടും കാണാൻ കഴിയില്ല' എന്ന് അയാളുടെ മുഖത്തുനോക്കിത്തന്നെ തുറന്നുപറയാൻ താൻ മടിക്കാറില്ലെന്നും ശ്വേത വ്യക്തമാക്കി.

വിദേശത്തു ജീവിച്ച അനുഭവത്തിൽ നിന്ന് ശ്വേത മുന്നോട്ടുവെക്കുന്ന പ്രധാന ആശയം ലൈംഗികത എന്നത് ഒരു പാപമോ വിലക്കപ്പെട്ട കനിയോ അല്ല എന്നതാണ്. അത് സന്തോഷത്തിന് വേണ്ടിയും പരീക്ഷണങ്ങൾക്കും വേണ്ടിയും ചെയ്യുന്ന ഒന്നാണ്. തനിക്ക് എന്താണ് വേണ്ടതെന്ന് തുറന്നുപറയാനും എവിടെ അതിരുകൾ നിശ്ചയിക്കണമെന്ന് തീരുമാനിക്കാനും ഓരോ വ്യക്തിക്കും പൂർണ്ണ സ്വാതന്ത്ര്യമുണ്ട്. മറ്റൊരാളെ സന്തോഷിപ്പിക്കാൻ വേണ്ടി സ്വന്തം താല്പര്യങ്ങൾ മാറ്റിവെക്കേണ്ടതില്ലെന്നും അവർ അടിവരയിടുന്നു. സമൂഹത്തിന്റെ വെറുപ്പുനിറഞ്ഞ സദാചാര ആക്രമണങ്ങളെ ഭയപ്പെടാതെ, സ്വന്തം തത്വങ്ങളിലും നിലപാടുകളിലും ഉറച്ചുനിന്ന് ജീവിക്കുന്ന ഒരു സ്ത്രീയുടെ തുറന്നുപറച്ചിലാണ് ശ്വേത കേസ്വാനിയുടെ വാക്കുകളിൽ തെളിയുന്നത്.

നിലപാടുകളിൽ ഉറച്ചുനിൽക്കുന്ന വ്യക്തിത്വം

തനിക്ക് കരിയറിൽ അവസരങ്ങൾ നഷ്ടപ്പെട്ടാലും സ്വയം അടിയറവ് വെക്കാൻ തയ്യാറായിരുന്നില്ലെന്ന് ശ്വേത വ്യക്തമാക്കുന്നു. നല്ല തമാശ പറയുന്ന, ബുദ്ധിയുള്ള പുരുഷന്മാരെയാണ് താൻ എപ്പോഴും ഇഷ്ടപ്പെട്ടിരുന്നതെന്നും, അതിനാൽ തന്നെ സിനിമാ-സീരിയൽ രംഗത്തുള്ള നടന്മാരെ ഡേറ്റ് ചെയ്യാൻ തോന്നിയിട്ടില്ലെന്നും അവർ തമാശരൂപേണ പറഞ്ഞു. സ്വന്തം അധ്വാനത്തിലും വ്യക്തിത്വത്തിലും വിശ്വാസമർപ്പിച്ച് മുന്നോട്ടുപോയതുകൊണ്ടാണ് ഇത്തരം അനാവശ്യ സമ്മർദ്ദങ്ങൾക്ക് കീഴടങ്ങേണ്ടി വരാതിരുന്നത്. അതിനൊപ്പം സ്ത്രീ സമത്വത്തിനും സ്വാതന്ത്ര്യത്തിനുമുള്ള ശക്തമായ സന്ദേശം കൂടിയാണ് നൽകുന്നത്.