ചിത്രകലയെ സ്നേഹിക്കുന്നവർക്ക് മുമ്പിലുള്ള പലതും കാൻവാസുകളായി മാറിയേക്കാം. എന്നാൽ സ്വന്തം ശരീരം തന്നെ കാൻവാസാക്കി മാറ്റിയ ഒരു യുവതിയാണ് ശ്രദ്ധിക്കപ്പെടുന്നത്. നൈജീരിയയിൽ നിന്നുള്ള ഒനി മേരി അയോമിഡ് ആണ് സ്വന്തം ശരീരത്തിൽ ചായംപൂശി വാർത്തയിൽ നിറയുന്നത്.

To advertise here,

പ്രൊഫഷണൽ മേക്അപ് ആർട്ടിസ്റ്റാണ് ഒനി. സാധാരണ പെന്നും പെയിന്റുകളുമൊക്കെയാണ് ചായം പൂശാൻ കണ്ടിട്ടുള്ളതെങ്കിൽ ഒനിയുടേത് വ്യത്യസ്തമാണ്. തന്റെ പ്രൊഫഷനുമായി ബന്ധപ്പെട്ടു നിൽക്കുന്ന വസ്തുക്കൾ കൊണ്ട് ഒനിയുടെ കലാചാതുര്യം. ഐലൈനറുകളും ഫൗണ്ടേഷനും മറ്റ് മേക്അപ് വസ്തുക്കളും ഒക്കെയാണ് ഒനിയുടെ പെയിന്റിങ് ഉപകരണങ്ങൾ. 

ഇരുപത്തിമൂന്നുകാരിയായ ഒനി തന്റെ ശരീരത്തിന്റെ പല ഭാ​ഗങ്ങളിൽ വരയ്ക്കുന്ന ചിത്രങ്ങളുടെ വീഡിയോകളും സമൂഹമാധ്യമത്തിൽ പങ്കുവെക്കാറുണ്ട്. കൂടുതലും സെലിബ്രിറ്റികളുടെയും സമൂഹത്തിൽ പലതലത്തിൽ ശ്രദ്ധിക്കപ്പെട്ടവരുടെയും ചിത്രങ്ങളാണ് ഒനി വരയ്ക്കാറുള്ളത്. 

ആറും ഏഴും മണിക്കൂറുകളെടുത്താണ് ഓരോ പെയിന്റിങ്ങും ഒനി പൂർത്തിയാക്കുന്നത്. ഒരു കണ്ണാടിക്ക് മുന്നിലിരുന്ന് സസൂക്ഷ്മം രൂപങ്ങൾ തന്റെ ശരീരത്തിൽ വരയ്ക്കുകയാണ് ഒനി ചെയ്യുന്നത്. ടിക്ടോക്കിൽ ഒനിയുടെ വീഡിയോകൾക്കും ഓറെ ആരാധകരാണുള്ളത്. ഏഴായിരത്തോളം ഫോളോവേഴ്സാണ് ഒനിക്ക് ടിക്ടോക്കിലുള്ളത്.

എല്ലായ്പ്പോഴും പെയിന്റിങ് ഒറ്റയടിക്ക് തീരണമെന്നില്ല എന്നും ഒനി പറയുന്നു. ചിലപ്പോഴെല്ലാം മൂക്കോ, കണ്ണോ ഒക്കെ വരച്ചു പകുതിയാകുമ്പോഴേക്കും താൻ ഉദ്ദേശിച്ചത്ര പൂർണമായില്ല എന്നു തോന്നും. അപ്പോൾ എല്ലാം മായ്ച്ച് വീണ്ടും ആരംഭിക്കും. ചില സമയങ്ങളിൽ ഇത്തരത്തിൽ രണ്ടുംമൂന്നും വട്ടമൊക്കെ മായ്ച്ച് വീണ്ടും പെയിന്റ് ചെയ്യാറുണ്ടെന്നും ഒനി പറയുന്നു. 

സം​ഗതി പാഷനാണെങ്കിലും ഇതുമൂലം നേരിടുന്ന വെല്ലുവിളിയെക്കുറിച്ചും ഒനി പങ്കുവെക്കുന്നുണ്ട്. സ്വന്തം ശരീരത്തിലാണ് പെയിന്റിങ് ചെയ്യുന്നത് എന്നതിനാൽ തന്നെ മണിക്കൂറുകളോളം ഒരേ ഇരുപ്പാണ്. കുറച്ചുകഴിയുമ്പോഴേക്കും പല ഭാ​ഗങ്ങളും വേദന തുടങ്ങും. കൈകളും ഷോൾഡറും കഴുത്തുമൊക്കെ അസഹ്യമായ വേദന അനുഭവപ്പെടുന്ന ദിനങ്ങൾ ഉണ്ടാകാറുണ്ടെന്നും ഒനി.  

Content Highlights:body painting by oni mary ayomide, body painting artists