അമ്മയാകാൻ ഒരുങ്ങുന്ന ഏതൊരു സ്ത്രീയുടെ ജീവിതത്തിലും ഗർഭകാലം എന്നത് സന്തോഷവും പ്രതീക്ഷകളും നിറഞ്ഞുനിൽക്കുന്ന ഒരു അധ്യായമാണ്. എന്നാൽ, ആ സന്തോഷങ്ങൾക്കിടയിലും ശരീരം നേരിടുന്ന  വ്യതിയാനങ്ങളെക്കുറിച്ചും ശാരീരിക ബുദ്ധിമുട്ടുകളെക്കുറിച്ചും തുറന്നുപറയുകയാണ് ബോളിവുഡ് നടിയും മോഡലുമായ അനുഷ്‌ക രഞ്ജൻ.

To advertise here,

ഇയ്യിടെയാണ് അനുഷ്കയ്ക്കും നടൻ ആദിത്യയ്ക്കും ഇരട്ടക്കുട്ടികൾ പിറന്നത്. ആ കുഞ്ഞുങ്ങൾക്കുവേണ്ടിയുള്ള കാത്തിരിപ്പിന്റെ കാലത്ത് നേരിട്ട അതികഠിനമായ ശാരീരിക വെല്ലുവിളികളെക്കുറിച്ചും ക്ഷീണത്തെക്കുറിച്ചും അനുഷ്‌ക അടുത്തിടെ ഒരു അഭിമുഖത്തിൽ തുറന്നുപറയുകയുണ്ടായി.

സാധാരണ ഗർഭകാല അനുഭവങ്ങളിൽ നിന്ന് വളരെ വ്യത്യസ്തവും കഠിനവുമാണ് ഇരട്ടക്കുഞ്ഞുങ്ങളെ ഗർഭം ധരിക്കുമ്പോൾ ഉണ്ടാകുന്നതെന്ന് അനുഷ്‌ക പറയുന്നു. ഒരേസമയം രണ്ട് ജീവനുകളെ ശരീരത്തിൽ ചുമക്കുമ്പോൾ ഉണ്ടാകുന്ന ക്ഷീണം വാക്കുകൾക്ക് അതീതമാണ്. ദൈനംദിന ജീവിതത്തിലെ ലളിതമായ കാര്യങ്ങൾ ചെയ്യാൻ പോലും ശരീരം വലിയ അളവിൽ ഊർജ്ജം ആവശ്യപ്പെടുന്നുണ്ടെന്നും അവർ പറയുന്നു.

ചില ദിവസങ്ങളിൽ കിടക്കയിൽ നിന്ന് എഴുന്നേൽക്കാൻ പോലും സാധിക്കാത്ത വിധത്തിലുള്ള തളർച്ച അനുഭവപ്പെടാറുണ്ട്. ഗർഭകാലത്തിന്റെ തുടക്കത്തിൽ ഇത്തരം ക്ഷീണങ്ങൾ സാധാരണയാണെങ്കിലും, നാളുകൾ ചെല്ലുന്തോറും ശരീരത്തിന്റെ ഭാരവും സമ്മർദ്ദവും ഇരട്ടിയാകുന്നത് ദൈനംദിന കാര്യങ്ങളെപ്പോലും പ്രതികൂലമായി ബാധിക്കുന്നുണ്ടെന്ന് താരം പറയുന്നു.

ഇരട്ടക്കുഞ്ഞുങ്ങളുള്ള ഗർഭകാലത്ത് ശരീരഭാരം അതിവേഗമാണ് വർദ്ധിക്കുന്നത്. ഇത് ശരീരത്തിന്റെ സ്വാഭാവികതയെ മാറ്റുന്നു. പെട്ടെന്ന് കൂടുന്ന ഭാരം കാരണം നടക്കാനും ഇരിക്കാനും ഉറങ്ങാനുമെല്ലാം വലിയ പ്രയാസമാണ് അനുഭവപ്പെടുന്നതെന്നും അനുഷ്‌ക പറഞ്ഞു.

ശരീരത്തിൽ ഉണ്ടാകുന്ന ഇത്തരം മാറ്റങ്ങൾ പലപ്പോഴും മാനസികമായും വലിയ സമ്മർദ്ദം ഉണ്ടാക്കും, എന്നാൽ, ഈ ഘട്ടത്തിൽ സ്വന്തം ശരീരത്തെ പഴിചാരാതെ, ശരീരം നടത്തുന്ന വലിയൊരു പ്രക്രിയയെ തിരിച്ചറിഞ്ഞ് അതിനോട് സഹകരിക്കുകയാണ് വേണ്ടതെന്ന് അനുഷ്‌ക വ്യക്തമാക്കി.

സോഷ്യൽ മീഡിയയിലും സിനിമകളിലും കാണിക്കുന്നതുപോലെ എപ്പോഴും തിളങ്ങിനിൽക്കുന്നതും സുന്ദരവുമായ ഒന്നുമാത്രമല്ല ഗർഭകാലം എന്ന് അനുഷ്‌ക വ്യക്തമാക്കുന്നു. അതിന് പിന്നിൽ നിരവധി വേദനകളും അസ്വസ്ഥതകളും ഉറക്കമില്ലാത്ത രാവുകളുമുണ്ട്. നിങ്ങളുടെ ശരീരം തളരുമ്പോൾ വിശ്രമിക്കുക, അതിൽ കുറ്റബോധം തോന്നേണ്ടതില്ലെന്നും അവർ പറയുന്നുണ്ട്. എത്രയൊക്കെ ശാരീരിക ബുദ്ധിമുട്ടുകളും തളർച്ചയും നേരിടേണ്ടി വന്നാലും, തങ്ങളുടെ കൈകളിൽ എത്തിച്ചേരാൻ പോകുന്ന ആ രണ്ട് കുഞ്ഞുങ്ങളുടെ മുഖം ഓർക്കുമ്പോൾ എല്ലാ പ്രയാസങ്ങളും മാഞ്ഞുപോകുമെന്നാണ് അനുഷ്‌ക പറയുന്നത്. ഭർത്താവ് ആദിത്യ സീലിന്റെ പൂർണ്ണ പിന്തുണയും കരുതലുമാണ് ഈ അവസ്ഥയിലും തനിക്ക് ഏറ്റവും വലിയ കരുത്തെന്നും താരം തുറന്നുപറഞ്ഞു.