ബന്ധങ്ങളിൽ സ്ത്രീ സാമ്പത്തിക സുരക്ഷിതത്വം ആഗ്രഹിക്കുന്നതിനെ എന്നും സംശയത്തോടെയും പരിഹാസത്തോടെയുമാണ് സമൂഹം സമീപിക്കാറുള്ളത്. ജീവിതത്തിൽ ഉറപ്പുള്ള സാമ്പത്തിക അടിത്തറ വേണമെന്ന് ആഗ്രഹിക്കുന്ന ഒരു സ്ത്രീയെ പെട്ടെന്ന് തന്നെ 'ഗോൾഡ് ഡിഗ്ഗർ' (പണത്തിനായി മാത്രം ബന്ധങ്ങൾ സ്ഥാപിക്കുന്നവൾ) എന്ന് ലേബൽ ചെയ്യാൻ സമൂഹത്തിന് വലിയ എളുപ്പമാണ്. എന്നാൽ, ഇതേ സമൂഹം പുരുഷന്മാരുടെ സ്വാർത്ഥമായ പ്രതീക്ഷകളെയും നിബന്ധനകളെയും എത്ര സ്വാഭാവികമായാണ് ന്യായീകരിക്കുന്നത്?

To advertise here,

അടുത്തിടെ നൽകിയ ഒരു അഭിമുഖത്തിൽ ബോളിവുഡ് താരം അമീഷ പട്ടേൽ ഉന്നയിച്ച ഈ ചോദ്യം ഇപ്പോൾ സാമൂഹിക മാധ്യമങ്ങളിൽ വലിയ ചർച്ചകൾക്ക് വഴിതുറന്നിരിക്കുകയാണ്. ഡേറ്റിംഗിലും വിവാഹത്തിലും പുരുഷന്മാരും സ്ത്രീകളും നേരിടുന്ന ഈ ഇരട്ടത്താപ്പിനെ തുറന്നുകാട്ടിക്കൊണ്ടാണ് താരം ചോദ്യം ഉന്നയിച്ചത്. സാമ്പത്തിക ഭദ്രതയുള്ള പുരുഷനെ ആഗ്രഹിക്കുന്ന സ്ത്രീകളെ നിങ്ങൾ ഗോൾഡ് ഡിഗ്ഗർ എന്ന് വിളിക്കുന്നുവെങ്കിൽ, സ്ത്രീകളിൽനിന്ന് സ്വന്തം സൗകര്യങ്ങൾ മാത്രം പ്രതീക്ഷിക്കുന്ന പുരുഷന്മാരെ എന്താണ് വിളിക്കേണ്ടതെന്നും അവർ ചോദിച്ചു.

സ്ത്രീ ആഗ്രഹിച്ചാൽ സ്വാർത്ഥത, പുരുഷൻ ആഗ്രഹിച്ചാൽ സ്വാഭാവികം

പ്രണയത്തിലും ജീവിതപങ്കാളിയെ തിരഞ്ഞെടുക്കുന്നതിലും കാലങ്ങളായി നിലനിൽക്കുന്ന ചില പൊതുബോധങ്ങളുണ്ട്. ഒരു പുരുഷൻ ജീവിതത്തിൽ നന്നായി സെറ്റിൽഡ് ആയിരിക്കണം, നല്ല വരുമാനവും ഭാവിയും ഉള്ളവനായിരിക്കണമെന്ന്‌ ഒരു സ്ത്രീ ആഗ്രഹിച്ചാൽ അവൾ പണത്തിന് പിന്നാലെ പോകുന്നവളാണെന്ന വിലയിരുത്തൽ ഉടൻ വരും. അതേസമയം, ഒരു പുരുഷൻ തനിക്ക് മനോഹരമായി ഭക്ഷണം പാകം ചെയ്യുന്ന, വീട്ടുജോലികൾ കൃത്യമായി ചെയ്യുന്ന, അല്ലെങ്കിൽ സ്വന്തം കരിയർ പോലും ഉപേക്ഷിച്ച് വീട് നോക്കുന്ന ഒരു പങ്കാളിയെ ആഗ്രഹിക്കുമ്പോൾ സമൂഹം അതിനെ തികച്ചും സ്വാഭാവികമായ പ്രതീക്ഷയായി അംഗീകരിക്കുകയും ചെയ്യുന്നു.

ഈ വൈരുദ്ധ്യത്തെയാണ് അമീഷ പട്ടേൽ ശക്തമായി ചോദ്യം ചെയ്യുന്നത്. സ്ത്രീകൾ പുരുഷനിൽ സാമ്പത്തിക സുരക്ഷിതത്വം ആഗ്രഹിക്കുന്നതിൽ എന്താണ് തെറ്റെന്ന് താരം ചോദിക്കുന്നു. സ്വന്തം ഭാവി ഭദ്രമാക്കാൻ ആഗ്രഹിക്കുന്നത് ഒരു തെറ്റല്ലെന്നും അത് പ്രായോഗികമായ ചിന്ത മാത്രമാണെന്നും അമീഷ ഓർമ്മിപ്പിക്കുന്നു.

സ്ത്രീകൾ സാമ്പത്തിക കാര്യങ്ങളിൽ വ്യക്തത വരുത്തുമ്പോൾ അത് ബന്ധങ്ങളുടെ വിശുദ്ധിക്ക് എതിരാണെന്ന് ചിത്രീകരിക്കുന്നവർ, പുരുഷന്മാർ വച്ചുപുലർത്തുന്ന ഇത്തരം നിബന്ധനകളെ കണ്ടില്ലെന്ന് നടിക്കുകയാണെന്ന് അമീഷ ചൂണ്ടിക്കാണിക്കുന്നു. ആണുങ്ങൾ സ്വന്തം സൗകര്യത്തിന് അനുസരിച്ച് സ്ത്രീകളെ തിരഞ്ഞെടുക്കുമ്പോൾ അവർക്ക് പ്രത്യേക ലേബലുകൾ ഒന്നും സമൂഹം ചാർത്തിക്കൊടുക്കാറില്ല എന്നത് എടുത്തുപറയേണ്ട കാര്യമാണ്.

തന്റെ വ്യക്തിജീവിതത്തിലെ തീരുമാനങ്ങളെക്കുറിച്ചും തുറന്നുപറച്ചിലുകൾ നടത്തി ശ്രദ്ധേയയായ താരമാണ് അമീഷ പട്ടേൽ. കരിയറിന്റെ ഉച്ചസ്ഥായിയിൽ നിൽക്കുമ്പോഴും സ്വന്തം വ്യക്തിത്വത്തിനും സ്വാതന്ത്ര്യത്തിനും പ്രാധാന്യം നൽകിയ അവർ, പരമ്പരാഗതമായ വിവാഹ സങ്കൽപ്പങ്ങളോട് പലപ്പോഴും വിയോജിപ്പ് പ്രകടിപ്പിച്ചിട്ടുണ്ട്.സ്വന്തം കാലിൽ നിൽക്കുന്ന സ്ത്രീകൾക്ക് തങ്ങളുടെ ജീവിതപങ്കാളിയെക്കുറിച്ച് വ്യക്തമായ സങ്കൽപ്പങ്ങൾ ഉണ്ടാകാൻ അവകാശമുണ്ട്. ഒരാളെ സ്‌നേഹിക്കുന്നതിനൊപ്പം തന്നെ സ്വന്തം ഭാവി സുരക്ഷിതമായിരിക്കണമെന്ന്‌ കരുതുന്നത് കുറ്റമല്ലെന്ന് അമീഷയുടെ വാക്കുകൾ വ്യക്തമാക്കുന്നു.